គ្រួសារប៉ាឡេស្ទីន ដែលកំពុងភៀសខ្លួនចេញពីតំបន់ភាគខាងជើងតំបន់ហ្កាហ្សា បាននិយាយកាលពីថ្ងៃសុក្រថា ពួកគេកំពុងធ្វើដំណើរទៅភាគខាងត្បូងដើម្បីស្វែងរកអាហារ និងការចិញ្ចឹមជីវិត។ 

គ្រួសារលោក Deeb បានអង្គុយក្នុងរទេះសត្វលា ខណៈធ្វើដំណើរឆ្លងកាត់ទីក្រុងនូសេរ៉ាត(Nuseirat) តំបន់ហ្កាហ្សាភាគកណ្តាល។

លោក អ៊ីប្រាហ៊ីម អាម៉េតឌីប(Ibraheem Ahmed Deeb) បានប្រាប់សារព័ត៌មានរ៉យទ័រថា ភាពអត់ឃ្លានកំពុងសម្លាប់យើង ខណៈលោកកំពុងឱបកូនរបស់លោកដែលកំពុងដេក។ ពេលនេះ លោកកំពុងចាកចេញពីភាគខាងជើង ដោយសារពុំមានអាហារ និងទឹកទទួលទាន។ 

បន្ទាប់ពីសង្រ្គាមជាង៥ខែនៅហ្កាហ្សា ទីភ្នាក់ងារជំនួយបានព្រមានថា ប្រជាជន ២,៣លាននាក់នៅតំបន់ហ្កាហ្សា ប្រឈមហានិភ័យកើនឡើងនៃគ្រោះទុរ្ភិក្ស បើគ្មានការផ្គត់ផ្គង់ស្បៀងអាហារកើនឡើង ហើយពួកគេបានចោទប្រកាន់អ៊ីស្រាអែលថា ពុំបានធ្វើអ្វី ដើម្បីធានាបានជំនួយគ្រប់គ្រាន់ចូលមកក្នុងតំបន់នេះ។

អ៊ីស្រាអែលបាននិយាយថា ខ្លួនមិនបានកំណត់ចំនួនជំនួយដែលនឹងអនុញ្ញាតឱ្យចូលទៅក្នុងតំបន់ហ្កាហ្សានោះទេ ហើយបានដាក់កំហុសភាពបរាជ័យរបស់ទីភ្នាក់ងារជំនួយចំពោះការពន្យារពេល។

អង្គការសហប្រជាជាតិ បានព្រមានថា យ៉ាងហោចណាស់មនុស្ស ៥៧៦.០០០នាក់ នៅក្នុងតំបន់ហ្កាហ្សា ស្មើនឹងមួយភាគបួននៃចំនួនប្រជាជន កំពុងស្ថិតលើមាត់ជ្រោះនៃគ្រោះទុរ្ភិក្ស។