បាល់ទាត់៖ ក្រុមអាស៊ីអឺរ៉ុបបានបរាជ័យក្រោមថ្វីជើងក្រុមភ្ញៀវណាហ្គាវើលដ៏ ដោយលទ្ធផល ៥-៣ ក្នុងជំនួបសប្ដាហ៍ទី៨ នៃពានរង្វាន់មិត្តហ្វូនខេមបូឌានលីគកាលពីល្ងាចថ្ងៃទី១៤ ខែកក្កដាម្សិលមិញ។ ប៉ុន្ដែមុនរបូត ៣ពិន្ទុក្នុងដីជាថ្មី ក្រុមលោក សុក វាសនា បានវាយបកលើក្រុមលោក មាស ចាន់ណា គួរឲ្យភ្ញាក់ផ្អើលនៅចុងខែទី១ និងដើមវគ្គទី២។
ជំនួបដ៏ស្វិតស្វាញនៅកីឡដ្ឋាន AEU Sport Park នេះ ៣៤នាទីដំបូង ក្រុមណាហ្គាវើលដ៏បានស៊ុតបំប៉ោងសំណាញ់ទីក្រុមម្ចាស់ផ្ទះ ៤គ្រាប់មុនដោយកីឡាករ Fumiya Kogure ២គ្រាប់នៅនាទីទី៦ និងនាទីទី៩ ខណៈ ២គ្រាប់ទៀតរកបានដោយកីឡាករ នុប តុលា នៅនាទី២៨ និងកីឡាករ Marcio Marques នាទី៣៤។ បន្ទាប់ពីត្រូវក្រុមភ្ញៀវបើកការនាំមុខច្រើនគ្រាប់ អាស៊ីអឺរ៉ុបបានព្យាយាមវាយបកយ៉ាងខ្លាំងរហូតរកបាន ៣គ្រាប់ជាបន្ដបន្ទាប់ក្នុងនោះចុងវគ្គទី១ រកបាន ២គ្រាប់ដោយកីឡាករ សុក ច័ន្ទរស្មី នៅនាទី៣៥ និងកីឡាករ Samuel Ajayi Gbenga នៅនាទី៤២ មុនកីឡាករ សុក ច័ន្ធរស្មី ដដែលរកបានគ្រាប់ទី៣ ឲ្យក្រុមខ្លួននៅនាទី៤៨ បន្ទាប់ពីចប់ការប្រកួតវគ្គទី២ បាន ៣នាទី។
ក្រោយមានគ្រាប់បាល់ប្រកៀកប្រកិតគ្នាបែបនេះ ក្រុមទាំងពីរបានសម្រុកស្វែងរកគ្រាប់បាល់បន្ថែមរៀងៗខ្លួន រហូតដល់នាទី៨៨ កីឡាករ Marcio Marques ក៏បានទាត់បាល់ហ្វ្រីឃីតបញ្ចូលទីក្រុមម្ចាស់ផ្ទះ ១គ្រាប់ទៀត ដែលជួយឲ្យក្រុមណាហ្គាវើលដ៏ធានាបាន ៣ពិន្ទុពេញតែម្ដង បន្ទាប់ពីក្រុមអាស៊ីអឺរ៉ុបព្យាយាមបង្កើតឱកាសក្នុងប្រអប់គ្រោះថ្នាក់ជាច្រើនដង តែធ្វើមិនបានសម្រេច។ ជ័យជម្នះនេះដែរបានធ្វើឲ្យក្រុមណាហ្គាវើលដ៏រកបាន ១៤ពិន្ទុ ស្មើគ្នាជាមួយក្រុមកងយោធពលខេមរភូមិន្ទ បន្ទាប់ពីឆ្លងកាត់ ៧ប្រកួតឈ្នះ ៤ ស្មើ ២ និងចាញ់ ១។ ចំណែកការបន្ដបរាជ័យក្នុងដី ៣ប្រកួតផ្ទួនៗរបស់ក្រុមអាស៊ីអឺរ៉ុប បានធ្វើឲ្យពួកគេបន្ដឈរលេខរៀងទី៩ និងមាន ៦ពិន្ទុបណ្ដោះអាសន្នបន្ទាប់ពីប្រកួតបាន ៨ប្រកួតឈ្នះ ២ និងចាញ់ ៦ប្រកួត៕
អត្ថបទ លី ឈុនឡា,
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
