ក្រសួងសុខាភិបាលហ្កាហ្សា បាននិយាយនៅក្នុងសេចក្តីថ្លែងការណ៍មួយថា ក្នុងរយៈពេល ២៤ ម៉ោងកន្លងមកនេះ កងទ័ពអ៊ីស្រាអែលបានសម្លាប់ជនជាតិប៉ាឡេស្ទីនចំនួន ១៤៩ នាក់ និងមនុស្ស ៣០០ នាក់ទៀតបានរងរបួស ដោយបានជំរុញឱ្យចំនួនអ្នកស្លាប់សរុបកើនឡើងដល់ ៣១.៤៩០ នាក់ និងអ្នករងរបួសដល់ទៅជិត ៧៣.៥០០ នាក់ចាប់តាំងពីការចាប់ផ្តើមនៃជម្លោះអ៊ីស្រាអែល និងក្រុមហាម៉ាស នៅថ្ងៃទី០៧ ខែតុលា ឆ្នាំ២០២៣ មក។

ការិយាល័យប្រព័ន្ធផ្សព្វផ្សាយរបស់រដ្ឋាភិបាល ដែលគ្រប់គ្រងដោយក្រុមហាម៉ាស នៅតំបន់ហ្កាហ្សា បាននិយាយនៅក្នុងសេចក្តីថ្លែងការណ៍មួយកាលពីថ្ងៃសុក្រ (១៥ មីនា) ថាជនជាតិប៉ាឡេស្ទីនជាង ៣៣ នាក់ត្រូវបានសម្លាប់ និងមនុស្ស ១៥០ នាក់ផ្សេងទៀតបានរងរបួសនៅក្នុងការវាយប្រហាររបស់អ៊ីស្រាអែល លើការប្រមូលផ្តុំជនជាតិប៉ាឡេស្ទីនដែលកំពុងរង់ចាំយកជំនួយនៅទីក្រុងហ្កាហ្សា កាលពីយប់ថ្ងៃព្រហស្បតិ៍។

ការិយាល័យប្រព័ន្ធផ្សព្វផ្សាយក៏បាននិយាយផងដែរថា ក្នុងរយៈពេល ៤៨ ម៉ោងកន្លងមកនេះ កងកម្លាំងអ៊ីស្រាអែលបានធ្វើការវាយប្រហារចំនួនប្រាំដាច់ដោយឡែកពីគ្នាលើមជ្ឈមណ្ឌលចែកចាយជំនួយនៅហ្កាហ្សា ដោយបានសម្លាប់មនុស្ស ៥៦ នាក់ និងរបួសជាង ៣០០ នាក់ផ្សេងទៀត។ ការិយាល័យនេះបានថ្កោលទោសការវាយប្រហាររបស់អ៊ីស្រាអែលលើជនស៊ីវិលប៉ាឡេស្ទីន។

យោធាអ៊ីស្រាអែលបានបដិសេធការអះអាងរបស់ប៉ាឡេស្ទីននៅថ្ងៃដដែលនោះដោយនិយាយថា មិនមានកងកម្លាំងរបស់ខ្លួនណាម្នាក់បានបាញ់សំដៅទៅលើជនស៊ីវិលដែលកំពុងរង់ចាំទទួលជំនួយនោះទេ ហើយយោធាបាននិយាយថា ជនជាតិប៉ាឡេស្ទីនប្រដាប់អាវុធគួរតែទទួលខុសត្រូវចំពោះឧប្បត្តិហេតុនេះ៕