សេចក្តីសម្រេចដែលបានព្រាងដោយសហរដ្ឋអាមេរិក ដែលនឹងគាំទ្រដល់កិច្ចខិតខំប្រឹងប្រែងអន្តរជាតិដើម្បីឈានដល់បទឈប់បាញ់ចំពោះជម្លោះអ៊ីស្រាអែល និងក្រុមហាម៉ាស ត្រូវបានគេរំពឹងថានឹងត្រូវបោះឆ្នោតនៅក្រុមប្រឹក្សាសន្តិសុខអង្គការសហប្រជាជាតិ (UNSC) នៅសប្តាហ៍ក្រោយនេះ។

បន្ទាប់ពីការប្រើប្រាស់អំណាចវេតូរបស់ខ្លួនជាច្រើនដងដើម្បីរារាំងសេចក្ដីសម្រេចផ្សេងៗអំពីការឈានដល់បទឈប់បាញ់មនុស្សធម៌នៅតំបន់ហ្កាហ្សាស្ទ្រីប សហរដ្ឋអាមេរិកបានដាក់ពង្រាងសេចក្ដីសម្រេចមួយទៅកាន់សមាជិកក្រុមប្រឹក្សាសន្តិសុខអង្គការសហប្រជាជាតិ ទាក់ទងនឹងស្ថានភាពនៅតំបន់ហ្កាហ្សា ប្រហែលពីរសប្តាហ៍មុន។

ទោះបីជាយ៉ាងណាក្ដី ថាតើដំណោះស្រាយដែលព្រាងដោយសហរដ្ឋអាមេរិកនោះ នឹងត្រូវបានគាំទ្រដោយសមាជិកក្រុមប្រឹក្សាសន្តិសុខភាគច្រើនឬយ៉ាងណានោះ នៅតែជាចម្ងល់នៅឡើយ ដោយសារតែភាពលម្អៀងរបស់សហរដ្ឋអាមេរិកចំពោះអ៊ីស្រាអែល និងនិយមន័យនៃក្រុមហាម៉ាស ជា «អង្គការភេរវកម្ម» ដោយមហាអំណាចលោកខាងលិចដឹកនាំដោយសហរដ្ឋអាមេរិក។

តាមពិត ក្រុមហាម៉ាស ឬចលនាតស៊ូអ៊ីស្លាម មិនមែនជា «អង្គការភេរវករ» ដែលត្រូវបានចុះបញ្ជីដោយក្រុមប្រឹក្សាសន្តិសុខអង្គការសហប្រជាជាតិនោះទេ ប៉ុន្តែសេចក្ដីសម្រេចដែលព្រាងដោយសហរដ្ឋអាមេរិក នោះ អំពាវនាវឱ្យបញ្ចប់ការផ្តល់ហិរញ្ញប្បទានដល់ «អង្គការភេរវករ» នានា រួមទាំងក្រុមហាម៉ាសផងដែរ៕