ព្រៃវែង៖ ឯកឧត្តម ខៀវ ភារិទ្ធ រដ្ឋលេខាធិការក្រសួងមហាផ្ទៃ និងជាប្រធានសហភាពសហព័ន្ធយុវជនកម្ពុជា ខេត្តព្រៃវែង បានលើកទឹកចិត្តឲ្យយុវជនចូលរួមការងារសង្គមឲ្យកាន់តែសកម្មបន្ថែមទៀត ជាពិសេសការផ្តល់ឈាមនេះ ផ្តល់អត្ថប្រយោជន៍ដល់យុវជនទ្វេដងក្នុងពេលតែមួយ ដោយអាចជួយការងារមនុស្សធម៌នៅក្នុងសង្គម ជួយដល់អ្នករងគ្រោះដែលត្រូវការឈាមជាចាំបាច់ និងសន្សំបុណ្យកុសលដ៏ថ្លៃថ្លាសម្រាប់បុគ្គលខ្លួនឯងទៀតផង។  

ការថ្លែងបែបនេះនៅក្នុងកម្មវិធីផ្តល់ឈាម ដែលរៀបចំដោយក្រុមការងារចុះជួយសហភាពសហព័ន្ធយុវជនកម្ពុជាស្រុកកំចាយមារ សហការជាមួយសាកលវិទ្យាល័យជាស៉ីមកំចាយមារ និងមជ្ឈមណ្ឌលជាតិផ្តល់ឈាម ធ្វើឡើងនាព្រឹកថ្ងៃទី១៦ ខែមីនា ឆ្នាំ២០២៤ នៅឯសាកលវិទ្យាល័យជាស៊ីមកំចាយមារ។

ឯកឧត្តម ខៀវ ភារិទ្ធ បានប្រសាសន៍ទៅកាន់យុវជនរាប់រយនាក់ឲ្យដឹងថា យុវជនជាសរសៃឈាមដ៏សំខាន់សម្រាប់សង្គមជាតិ ហើយការជួយជ្រោមជ្រែងរបស់យុវជន នឹងធ្វើឲ្យសង្គមកាន់តែរឹងមាំ ហើយការផ្តល់ឈាមនេះ មិនប៉ះពាល់ដល់សុខភាពនោះទេតាមក្បួនវេជ្ជសាស្រ្ត ដូច្នេះសូមយុវជន ចូលរួមឲ្យកាន់តែសកម្មបន្ថែមទៀត។

ឯកឧត្តមបបណ្ឌិត សិទ្ធ ខន សាកលវិទ្យាធិការនៃសាកលវិទ្យាល័យជាស៊ីមកំចាយមារ បានប្រសាសន៍ថា សិស្សនិស្សិតនៅសាកលវិទ្យាល័យជាស៊ីមកំចាយមារ តែងតែចូលរួមការងារសង្គម ជាពិសេសការងារផ្តល់ឈាមនេះ ហើយការផ្សព្វផ្សាយ និងការលើកទឹកចិត្តឲ្យយុវជនចូលរួមការងារសង្គម ពិតជាដើរតួរនាទីសំខាន់ណាស់។

លោកស្រី វេជ្ជបណ្ឌិត មើក សាមាន  អនុប្រធានមជ្ឈមណ្ឌលជាតិផ្តល់ឈាម បានថ្លែងអំណរគុណដល់ក្រុមយុវជនដែលក្លាហាន ហ៊ាន បរិច្ចាគ ឈាម  ដល់មជ្ឈមណ្ឌលជាតិ ហើយលោកស្រីអះអាងថារាល់ការផ្តល់ឈាមនឹងយកទៅដល់គោលដៅជនរងគ្រោះ ។ លើសពីនេះ លោកស្រី មើក សាមាន បន្តអំពាវនាវឲ្យយុវជនចូលរួមកាន់តែច្រើន ខណៈចំនួនអ្នកផ្តល់ឈាម នៅមានចំនួនតិចតួចនៅឡើយ បើប្រៀបធៀបនឹងតម្រូវការជាក់ស្តែង។

លោក ម៉េង ហ៊ុយ ប្រធានក្រុមការងារចុះជួយ ស.ស.យ.ក ស្រុក កំចាយមារ បានថ្លែងថា ក្នុងនាមជាប្រជាពលរដ្ឋម្នាក់ និងជាយុវជនគំរូផងនោះ លោក ចាំបាច់ត្រូវតែបំផុសការផ្តល់ឈាម ដើម្បីជួយសង្រ្គោះអ្នកជម្ងឺដែលកំពុងសង្រ្គោះបន្ទាន់នៅក្នុងមន្ទីរពេទ្យ ជាពិសេស ជាសារមួយបញ្ជាក់ថាការផ្តល់ឈាមគឺជាការចូលរួមផ្តល់ក្តីសង្ឃឹមសម្រាប់អ្នកជម្ងឺ ត្រូវ ការឈាមបន្ទាន់។

ជាមួយ គ្នានេះ លោកបានអំពាវនាវដល់យុវជន សិស្ស និស្សិត សូមចូលរួមផ្តល់ឈាមឱ្យបានគ្រប់ៗគ្នា ព្រោះ ការបរិច្ចាកឈាម១ប្លោកស្មើនឹងការជួយសង្រ្គោះអាយុជីវិតបានមនុស្សម្នាក់។ ម្យ៉ាង ទៀត ការផ្តល់ឈាមនេះទៀតសោត ពុំប៉ះពាល់សុខភាពរបស់យេីងនោះឡើយ។

សូមជម្រាបថា សិស្សនិស្សិត និងក្រុមការងារចុះជួយស.ស.យ.ក ស្រុកកំចាយមារ បានរួមគ្នាផ្តល់ឈាមជួយសង្រោះមនុស្ស យ៉ាងច្រើនកុះករ ហេីយឈាមដែលទទួលបានពីការបរិច្ចាគជិត១២៣កំប្លោក៕