អ៊ីសឡង់ ៖ ក្រុមអាជ្ញាធរ បានជម្លៀសខ្លួនមនុស្សរស់នៅជុំវិញភ្នំភ្លើង ក្រោយភ្នំភ្លើងអ៊ីសឡង់ បានផ្ទុះជាលើកទី ៤កាលពីថ្ងៃសៅរ៍ម្សិលមិញ ចាប់តាំងពីខែធ្នូ ឆ្នាំ ២០២៣ ដោយបានព្រួសផ្សែងផេះទៅលើផ្ទៃអាកាស និងព្រួសកម្អែមកលើជម្រាលភ្នំ ។ 

 ទូរទស្សន៍រដ្ឋ RUV រាយការណ៍ថា ប្រជាពលរដ្ឋ ៤ពាន់នាក់ ត្រូវបានជម្លៀសខ្លួនចេញទីក្រុងនេសាទ Grindavik ដែលស្ថិតនៅជាប់នឹងភ្នំភ្លើង ។ 

 ការផ្ទុះភ្នំភ្លើងនេះដែរ បានកើតមានឡើងក្រោយពេលក្រុមអាជ្ញាធរ បានព្រមានអស់រយៈពេលជាច្រើនសប្តាហ៍មកហើយថា ការផ្ទុះភ្នំភ្លើងជិតកើតឡើងហើយនៅឧបទ្វីប Reykjanes ស្ថិតនៅភាគខាងត្បូងរដ្ឋធានី Reykjavik របស់ប្រទេសអ៊ីសឡង់ ។ 

 ការិយាល័យឧតុនិយមអ៊ីសឡង់ និយាយនៅលើគេហទំព័ររបស់ខ្លួនថា ភ្នំភ្លើងចាប់ផ្តើមផ្ទុះនៅឧបទ្វីប Reykjanes ខណៈដែលអាកាសយានដ្ឋាន Keflavik ស្ថិតក្នុងទីក្រុង Reykjavik នៅតែបន្តបើកដំណើរការសម្រាប់ការចាកចេញ និងការមកដល់របស់ជើងហោះហើរ ។ 

 ក្រុមនគរបាលអ៊ីសឡង់ បាននិយាយថា ពួកគេបានប្រកាសដាក់រដ្ឋក្នុងគ្រាអាសន្នសម្រាប់តំបន់ជុំវិញភ្នំភ្លើង ហើយក្រុមអាជ្ញាធរការពារស៊ីវិល បានបញ្ជូនឧទ្ធម្ភាគចក្រ ដើម្បីស្ទង់ទំហំនៃការផ្ទុះភ្នំភ្លើង ។ 

 សូមបញ្ជាក់ថា ការផ្ទុះភ្លើង កាលពីខែមករាកន្លងទៅ បណ្តាលឲ្យឆាបឆេះផ្ទះសម្បែងប្រជាពលរដ្ឋជាច្រើនខ្នង ៕