អ៊ីស្រាអែល បានបញ្ជូនគណៈប្រតិភូរបស់ខ្លួនទៅកាន់ប្រទេសកាតា សម្រាប់កិច្ចពិភាក្សាស្វែងរកបទឈប់បាញ់ថ្មីនាថ្ងៃអាទិត្យនេះ ស្របពេលភាពអត់ឃ្លានកាន់តែធ្ងន់ធ្ងរនៅតំបន់ហ្កាហ្សាស្រ្ទីប ។ 

 ប្រភព័ត៌មានបាននិយាយប្រាប់ទីភ្នាក់ងារព័ត៌មានរ៉យទ័រថា គណៈប្រតិភូអ៊ីស្រាអែល ត្រូវបានដឹកនាំដោយប្រធានទីភ្នាក់ងារចារកម្មអ៊ីស្រាអែល Mossad លោក David Barnea ។ 

 ក្រុមហាម៉ាស់ បានផ្តល់សំណើរបទឈប់បាញ់រយៈពេលច្រើនសប្តាហ៍ថ្មី រួមទាំងការដោះដូរចំណាប់ថ្នូរ និងអ្នកទោសដែលការិយាល័យរបស់នាយករដ្ឋមន្រ្តីអ៊ីស្រាអែលលោក Benjamin Netanyahu និយាយថា វានៅតែផ្អែកលើការទាមទារមិនប្រាកដនិយម ។ 

 ស្របពេលនោះដែរ សហរដ្ឋអាមេរិក និងហ្សកដានី បានចុះយុទ្ធនាការទម្លាក់ជំនួយពីលើអាកាស ដែលជាផ្នែកមួយនៃកិច្ចខិតខំប្រកបដោយនិរន្តន៍ភាពសម្រាប់ជនប៉ាឡេស្ទីននៅក្នុងតំបន់ហ្កាហ្សា ។ 

 ដោយឡែក សេចក្តីសម្រេចដែលបានព្រាងដោយសហរដ្ឋអាមេរិក ដែលនឹងគាំទ្រដល់កិច្ចខិតខំប្រឹងប្រែងអន្តរជាតិដើម្បីឈានដល់បទឈប់បាញ់ចំពោះជម្លោះអ៊ីស្រាអែល និងក្រុមហាម៉ាស ត្រូវបានគេរំពឹងថានឹងត្រូវបោះឆ្នោតនៅក្រុមប្រឹក្សាសន្តិសុខអង្គការសហប្រជាជាតិ (UNSC) នៅសប្តាហ៍ក្រោយនេះ។ 

បន្ទាប់ពីការប្រើប្រាស់អំណាចវេតូរបស់ខ្លួនជាច្រើនដងដើម្បីរារាំងសេចក្ដីសម្រេចផ្សេងៗអំពីការឈានដល់បទឈប់បាញ់មនុស្សធម៌នៅតំបន់ហ្កាហ្សាស្ទ្រីប សហរដ្ឋអាមេរិកបានដាក់ពង្រាងសេចក្ដីសម្រេចមួយទៅកាន់សមាជិកក្រុមប្រឹក្សាសន្តិសុខអង្គការសហប្រជាជាតិ ទាក់ទងនឹងស្ថានភាពនៅតំបន់ហ្កាហ្សា ប្រហែលពីរសប្តាហ៍មុន ៕