បាល់ទាត់៖ សមាគមកីឡាបាល់ទាត់កងយោធពលខេមរភូមិន្ទបានទទួល ៣ពិន្ទុបន្ថែមទាំងលំបាក បន្ទាប់ពីយកឈ្នះក្រុមម្ចាស់ផ្ទះគិរីវង់សុខសែនជ័យ ដោយលទ្ធផល ១-០ ទាំងប្រផិតប្រផើយក្នុងជំនួបសប្ដាហ៍ទី៨ នៃពានរង្វាន់មិត្តហ្វូនខេមបូឌានលីគកាលពីល្ងាចថ្ងៃទី១៤ ខែកក្កដា ឆ្នាំ២០២១ ម្សិលមិញ។
ជំនួបក្រុមតំណក់ទឹកភ្លៀងនៅកីឡដ្ឋានគិរីវង់សុខសែនជ័យ ខេត្តតាកែវនេះ ក្រុមកងយោធពលខេមរភូមិន្ទបានស៊ុតបំប៉ោងសំណាញ់ទីក្រុមម្ចាស់ផ្ទះតាំងពីដើមវគ្គទី១ ដែលធ្វើសម្រេចដោយខ្សែប្រយុទ្ធប្រេស៊ីល Romario Alves នៅនាទីទី៤។ បន្ទាប់មកក្រុមទាំងពីរបានបន្ដព្យាយាមវាយសម្រុកគ្នារហូតចប់ ៩០នាទី តែពុំមានក្រុមណាអាចរកបានគ្រាប់បាល់ឡើយ មុនអាជ្ញាកណ្ដាលផ្លុំកញ្ចែបញ្ចប់ការប្រកួត ដោយក្រុមភ្ញៀវកងយោធពលខេមរភូមិន្ទបានយកឈ្នះក្រុមម្ចាស់ផ្ទះគិរីវង់ ១-០។
នេះគឺជាជ័យជម្នះលើកទី២ ជាប់គ្នារបស់ក្រុមកងយោធពលខេមរភូមិន្ទ ក្រោមការដឹកនាំរបស់អ្នកចាត់ការទូទៅថ្មីគឺលោក Lee Tae Hoon ខណៈសរុបលទ្ធផលបណ្ដោះអាសន្នគិតត្រឹមសប្ដាហ៍ទី៨ ពួកគេរកបាន ១៤ពិន្ទុក្រោយឆ្លងកាត់ ៧ប្រកួតឈ្នះ ៤ ស្មើ ២ និងចាញ់ ១ប្រកួត។ រីឯក្រុមគិរីវង់បានរក្សាកៅអីលេខ៨ និងមាន ៩ពិន្ទុក្នុងដៃដដែលបន្ទាប់ពីឆ្លងកាត់ ៧ប្រកួតដូចគ្នា ឈ្នះ ៣ និងចាញ់ ៤ប្រកួត៕
អត្ថបទ៖ លី ឈុនឡា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
