ហៃទី ៖ ទីភ្នាក់ងារមូលនិធិកុមាររបស់អង្គការសហប្រជាជាតិ បាននិយាយកាលពីថ្ងៃសៅរ៍ថា កុងតឺន័រដឹកជំនួយមួយរបស់ខ្លួននៅឯកំពង់ផែសំខាន់របស់ប្រទេសហៃទីដែលស្តុកទុកជាមួយ«សម្ភារៈសំខាន់ៗសម្រាប់ការរស់រានមានជីវិតរបស់មាតានិងទារកទើបនឹងកើត ត្រូវបានលួច ខណៈដែលក្រុមជនអន្ធពាលគ្រប់គ្រងរដ្ឋធានីនេះកាន់តែខ្លាំងឡើង។

ប្រទេសហៃទី កំពុងតស៊ូដើម្បីដោះស្រាយវិបត្តិនយោបាយ និងមនុស្សធម៌ដែលអូសបន្លាយពេលដ៏យូរ ដែលទីភ្នាក់ងារមូលនិធិកុមាររបស់អង្គការសហប្រជាជាតិ យូនីសេហ្វ បានព្រមានថា កំពុងបង្កឲ្យមានភាពស្រេកឃ្លាន និងកង្វះអាហារូបត្ថម្ភដែលគំរាមកំហែងដល់អាយុជីវិត នៅក្នុងផ្នែកខ្លះនៃរដ្ឋធានីព័រអូប្រាំង   (Port-au-Prince)។

នាយករដ្ឋមន្ត្រីដែលមិនជាប់ឆ្នោតលោក Ariel Henry បាននិយាយក្នុងសប្តាហ៍នេះថា លោកនឹងចុះចេញពីតំណែង នៅពេលដែលមានក្រុមប្រឹក្សាអន្តរកាល ត្រូវបានបង្កើតឡើង។ ក្រុមជនអន្ធពាលប្រដាប់អាវុធធុនធ្ងន់ បានកាន់កាប់ទីក្រុងជាច្រើន ហើយក្រុមសិទ្ធិមនុស្ស បានរាយការណ៍ពីការសម្លាប់រីករាលដាល ការចាប់ជំរិត និងអំពើហិង្សាផ្លូវភេទ។

អង្គការយូនីសេហ្វ បានអះអាងថា កុងតឺន័រមួយក្នុងចំណោម១៧កុងតឺន័ររបស់ខ្លួន ត្រូវបានលួចនៅកំពង់ផែព័រអូប្រាំង ដែលខ្លួនបាននិយាយថា កុងតឺន័រដែលគ្រប់គ្រងដោយក្រុមមនុស្សធម៌ចំនួន ២៦០ត្រូវបានគ្រប់គ្រងដោយក្រុមប្រដាប់អាវុធ។

លោក Bruno Maes តំណាងរបស់អង្គការយូនីសេហ្វនៅប្រទេសហៃទី បាននិយាយនៅក្នុងសេចក្តីថ្លែងការណ៍មួយថា៖«ការលួចយកសម្ភារៈដែលចាំបាច់សម្រាប់ជំនួយសង្គ្រោះជីវិតសម្រាប់កុមារ ត្រូវតែបញ្ចប់ជាបន្ទាន់»។