សៀមរាប÷ នៅថ្ងៃ ទី១៧ ខែមីនា ២០២៤នេះ លោកជំទាវ ឌី សុខីទីឃាយុកោ ភរិយាឯកឧត្តម ហ៊ុន ម៉ានិត ប្រធានមូលនិធិអណ្តូងទឹកស្អាត អ្នកឧកញ៉ាមហាភក្តីសប្បុរិសភោគាធិបតី ហ៊ុន នាង និងមហាឧបាសិកា ឌី ប៉ុក រួមទាំងក្រុមការងារ បានបន្តប្រគល់អណ្តូងទឹកស្អាតចំនួន៨ទៀត ជូនប្រជាពលរដ្ឋអាស្រ័យផល នៅក្នុងឃុំ ឃុនរាម ស្រុកបន្ទាយស្រី ខេត្តសៀមរាប។

មានប្រសាសន៍សំណេះសំណាលមួយប្រជាពលរដ្ឋ ក្នុងពិធីប្រគល់អណ្តូងទឹកស្អាតទាំងនោះ លោកជំទាវប្រធានមូលនិធិ បានឱ្យដឹងថា អំណោយអណ្តូងទឹកទាំងនេះ គឺជាអំណោយកេរមរតករបស់ មាតាបិតា បង្កើតសម្តេចតេជោ ហ៊ុន សែន និង សម្តេចកិត្តិព្រឹទ្ឋបណ្ឌិត ប៊ុន រ៉ានី ហ៊ុនសែន តែពួកគាត់បានទទួលអនិច្ចកម្មអស់ទៅហើយ, ហើយមុនពេលលោកលាចាកលោក ទៅបានផ្តាំផ្ញើឱ្យកូនចៅទាំងអស់ ត្រូវថវិការបស់លោកដែលនៅសេសសល់ និងបច្ចេយបុណ្យសពរបស់លោកមកធ្វើជាអណ្តូង ទឹកជូនប្រជាពរដ្ឋ ដែលខ្វះខាតទឹកស្អាតប្រើប្រាស់នៅទូទាំងប្រទេសកម្ពុជា ជាក់ស្តែងដូចជាអ្នកស្រុក ឃុនរាម ខេត្តសៀមរាប នេះ បានទទួលអណ្តូងទឹកស្អាតជាលើកទី២ហើយ ដោយលើកទី១ប្រគល់ជូនដោយជំទាវបណ្ឌិត ពេជ ចន្ទមុន្នី ហ៊ុន ម៉ាណែត កាលពីឆ្នាំ២០១៧ ចំនួន១០អណ្តូងប្រើប្រាស់ជាផ្លូវការ។ ក្នុងឱកានោះដែរលោកប្រធានបាននាំនូវការផ្ដាំផ្ញើ សួរសុខទុក្ខពីសំណាក់ សម្ដេចតេជោ ហ៊ុន សែន សម្ដេចកិត្តព្រឹទ្ធបណ្ឌិត សម្តេចមហាបវរធិបតី ហ៊ុន ម៉ាណែត និងលោកជំទាវបណ្ឌិត ជូនចំពោះបងប្អូនប្រជាពលរដ្ឋ ដែលបានចូលរួមថា សម្តេចលោកតែងតែគិតគូរជានិច្ច ចំពោះសុខទុក្ខប្រជាពលរដ្ឋគ្រប់ទិសទី ទោះបីសម្តេចលោកមិនបានអញ្ជើញមកផ្តាល់ក៏ដោយ។

លោកជំទាវប្រធានឱ្យដឹងថា មូលនិធិអណ្តូងទឹកស្អាតបានបង្កើតឡើងជាង១០ឆ្នាំមកហើយ ក្រោមការដឹកនាំដោយលោកជំទាវ បណ្ឌិត ពេជ ចន្ទមុន្នី ហ៊ុនម៉ាណែត តែបច្ចុប្បន្នលោកជំទាវបណ្ឌិត មានភារកិច្ចច្រើនដែលត្រូវបំពេញ ទើបផ្ទេរការងារនេះមកលោកជំទាវ ជាអ្នកដឹកនាំបន្តប្រគល់ជូនប្រជាពលរដ្ឋអាស្រ័យផល។ ដូច្នេះសូមលោកយាយ លោកតា បងប្អូន អុំពូមីងទាំងអស់ រួមគ្នាថែរក្សាអណ្តូងទឹកទាំងនេះអោយបានល្អជាប់យូអង្វែង ដើម្បីជាប្រយោជន៍រួមនៅក្នុងសហគម។

ប្រជាពលរដ្ឋដែលទទួលផលពីអណ្តូងទឹកទាំងអស់ សូមថ្លែងអំណរគុណយ៉ាងជ្រាលជ្រៅ ចំពោះម្ចាស់អំណោយខាងលើ ជាពិសេសក្រុមគ្រួសារសម្តេចតេជោ ហ៊ុន សែន និងសម្តេចកិត្តិព្រឹទ្ធបណ្ឌិត ដែលលោកតែងតែគិតគូរ ពីជីវភាពរស់នៅរបស់ប្រជាពលរដ្ឋគ្រប់ទីកន្លែង ដែលត្រូវការចាំបាច់នូវទឹកស្អាតប្រើប្រាស់ប្រចាំថ្ងៃ ជាពិសេសអណ្តូងទឹកទាំងនេះ បានរួមចំណែកកាត់បន្ថយការចំណាយរបស់ពួកគាត់បានមួយផ្នែក និងមានភាពងាយស្រួលជាងមុន មិនចំណាយពេលវេលា ទៅយកទឹកនៅកន្លែងឆ្ងាយៗ ដូចមុនទៀតហើយ។

សូមបញ្ជាក់ថានៅតាមគោលដៅប្រគល់អណ្តូងទឹកនីមួយៗ លោកជំទាវប្រធានមូលនិធិ និងក្រុមការងារបាននាំយកអំណោយទ្រនប់ដៃរបស់ សម្តេចតេជោ និងសម្តេចកិត្តិព្រឹទ្ធបណ្ឌិត ចែកជូនលោកយាយ លោកតា បងប្អូន អុំពូមីង ដែលបានចូលរួមក្នុងពីធី រួមមានថ្នាំពេទ្យ ក្រណាត់ស សារ៉ុង ក្រមា និងថវិកាមួយចំនួន។ ដោយឡែក កុមារា កុមារី តូចៗទទួលបានកាបូបស្ពាយទៅសាលាម្នាក់មួយៗផងដែរ៕

អត្ថបទ: សំ ងីម