ភ្នំពេញ÷ ការបញ្ជូនកូនៗទៅសាលា មិនត្រឹមជាកាតព្វកិច្ចចំពោះមាតាបិតាគ្រប់រូបនោះទេ តែក៏ដូចជាការសន្សំប្រាក់ឱ្យកូន និងជួយស្រោច ស្រង់ជីវភាពឱ្យផុតពីភាពក្រីក្រដោយប្រសិទ្ធភាព លើសពីនេះ, ការបញ្ជូនកូនមករៀនក៏ជាការរួមចំណែកកសាង និងអភិវឌ្ឍសង្គមជាតិ ផងដែរ។

លោកជំទាវបណ្ឌិត ជា សិរី អគ្គទេសាភិបាលធនាគារជាតិនៃកម្ពុជា ថ្លែងក្នុងពិធីសំណេះសំណាលជាមួយ លោកគ្រូ-អ្នកគ្រូ សិស្សានុសិស្ស សាលាបឋមសិក្សា ស្នោរឃ្លៃ ស្ថិតក្នុងឃុំកំពង់ថ្ម ស្រុកសន្ទុក ខេត្តកំពង់ធំ នៅថ្ងៃទី ១៧ ខែ មីនា ឆ្នាំ២០២៤ នេះថា តាមរយៈយុទ្ធសាស្ត្របញ្ចកោណរបស់រាជរដ្ឋាភិបាល ក្រោមការដឹកនាំរបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី ក្រសួងអប់រំ យុវជន និងកីឡា បានដាក់បញ្ចូលផ្នែកវិទ្យាសាស្ត្រ និងបច្ចេកវិទ្យា ទៅក្នុងកម្មវិធីសិក្សា ស្របតាមកំណែទម្រង់ តាមរយៈ វិធានគន្លឹះចំនួន៥គឺ៖ ពង្រឹងមុខងារសាធារណៈ, ពង្រឹងវិស័យអប់រំ, ពង្រឹងវិស័យសុខាភិបាល, ពង្រឹងការគ្រប់គ្រង ប្រឆាំងគ្រឿង ញៀន, និងកំណែទម្រង់ច្បាប់ និងប្រព័ន្ធតុលាការ។

ក្នុងន័យនេះ វិស័យអប់រំគឺជាវិធានការគន្លឹះទី២ នៃការអនុវត្តយុទ្ធសាស្ត្របញ្ចកោណ និងជាសសរស្ដម្ភដ៏សំខាន់ ហើយទទួល បានការយកចិត្តទុកដាក់ខ្ពស់ ដោយសម្ដេចធិបតី នាយករដ្ឋមន្ត្រី បានសម្រេចដាក់ចេញនូវការពង្រឹងការបណ្តុះបណ្តាលមូលដ្ឋាន ពីមត្តេយ្យសិក្សា រហូតដល់ថ្នាក់ ទី១២ តាមរយៈវិធានគន្លឹះអាទិភាពចំនួន៤គឺ៖ ការពង្រឹងអភិបាលកិច្ច, ការពិនិត្យកែសម្រួល និងការ រៀបចំកម្មវិធីសិក្សា និងសកម្មភាពក្រៅម៉ោងសិក្សាឱ្យស្របទៅតាមតម្រូវការ ក្នុងការពង្រឹងចំណេះដឹង វិន័យ សីសធម៌ និងឥរិយាបថ របស់សិស្ស, ការយកចិត្តទុកដាក់លើសុខភាពសិស្ស តាមរយៈកម្មវិធីអាហារូបត្ថម្ភដល់កុមារ និងការត្រួតពិនិត្យគុណភាពចំណីអាហារ នៅតាមសាលារៀន, និងការជំរុញលើកទឹកចិត្តការចូលរួមរបស់មាតាបិតា អាណាព្យាបាល និងសហគមន៍ ក្នុងការអប់រំឱ្យគុណភាព របស់សាលារៀនរដ្ឋកាន់តែប្រសើរឡើង ហើយសិស្សានុសិស្សនឹងក្លាយជាទំពាំងស្នងឫស្សីយ៉ាងពិតប្រាកដ។

ជុំវិញការសិក្សានេះ, លោកជំទាវបណ្ឌិត លើកទឹកចិត្តឲ្យមាតាបិតា អាណាព្យាបាលបញ្ចូនកូនៗទៅសាលា និងសូមជួយលើក ទឹកចិត្តកូន និងបង្កលក្ខណៈឱ្យកូនបានបន្តការសិក្សា ជាពិសេសសូមលើកទឹកចិត្តដល់ការបញ្ជូនកុមារីទៅសាលារៀន ដើម្បីទទួលបាន ការសិក្សាអបរំឱ្យបានពេញលេញ ដោយសារស្ត្រីពិតជាដើរតួនាទីសំខាន់ណាស់ ក្នុងការអភិវឌ្ឍសង្គមខ្មែរ ក៏ដូចជាលើកមុខមាត់កម្ពុជា លើឆាកអន្តរជាតិ។

ក្នុងពិធីសំណេះសំណាលនេះដែរ, លោកជំទាវបណ្ឌិត ជា សិរី បាននាំយកអំណោយជូនលោកគ្រូ-អ្នកគ្រូ សិស្សានុសិស្សមកពីគ្រួសារ ក្រីកនៅបឋមសិក្សាចំនួន ៤ ក្នុងនោះលោកគ្រូ-អ្នកគ្រូ ចំនួន ២២ នាក់ ក្នុងម្នាក់ៗទទួលបានសារ៉ុង ១ និងថវិកា ៥ ម៉ឺនរៀល។ ចំពោះ សិស្សានុសិស្សមកពីគ្រួសារក្រីក្រចំនួន ១០០ នាក់ ក្នុងម្នាក់ៗទទួលបានឯកសណ្ឋានសិស្ស ១ ឈុត, សៀវភៅ ២ក្បាល, ប៉ិច ២ដើម, ដៃខ្មៅ ២ ដើម, បន្ទាត់ ១, ជ័រលុប១, ដែកខួង ១, ថវិកា ១ ម៉ឺនរៀល នំ និងទឹកដោះគោ ១ កញ្ចប់ ។ ចំណែកសាលាបឋម សិក្សាបន្ទាយយោមរាជ ស្ថិតក្នុងឃុំប្រាសាទ ស្រុកសន្ទុក ក្នុងនោះលោកគ្រូ-អ្នកគ្រូ ចំនួន ១០ នាក់ ក្នុងម្នាក់ៗទទួលបានសារ៉ុង ១ ថង់យាម១ និងថវិកា ៥ ម៉ឺនរៀល, ចំពោះសិស្សសាលាបឋមសិក្សាចំនួន ២០២ នាក់ ម្នាក់ៗទទួលបានសម្លៀកបំពាក់ ១កំប្លេ, សៀវភៅ ២ក្បាល ប៊ិច១ ខ្មៅដៃ១ និងថវិកា ១ម៉ឺនរៀល និង ២ម៉ឺនរៀល សម្រាប់សិស្សមានជីវភាពក្រីក្រ។ ដោយឡែកសិស្សមត្តេយ្យ ចំនួន ៣៨ នាក់វិញ, ម្នាក់ៗទទួលបានសម្លៀកបំពាក់ ១កំប្លេ សៀវភៅ ២ក្បាល ប៊ិច១ ខ្មៅដៃ១ និងថវិកា ១ម៉ឺនរៀលផងដែរ៕

អត្ថបទ៖ សុន រ៉ាឌី