ដោយសារកម្ពុជា ជាគោលដៅនៃការដាក់ទុនវិនិយោគរបស់បរទេស រដ្ឋាភិបាល ក៏ដូចជា​ភាគី​សហជីព បានបង្ហាញតម្រូវការកម្លាំងពលកម្ម ជាពិសេសក្នុងវិស័យឧស្សាហកម្មកាត់ដេរខ្ពស់ ខណៈ​ក្នុងរយៈពេល៦ខែមកនេះ កម្ពុជាទទួលគម្រោងវិនិយោគថ្មីក្នុងការបង្កើតរោងចក្រ សហ​គ្រាស​ចំនួន​ជាង ៣ពាន់ ក្នុងនោះ វិស័យកាត់ដេរ ១៦៤ រោងចក្រ។

ឯកឧត្តម កត្តា អ៊ន រដ្ឋលេខាធិការ និងជាអ្នកនាំពាក្យក្រសួងការងារ និងបណ្តុះបណ្តាលវិជ្ជាជីវៈ បាន​មាន​ប្រសាសន៍ថា សព្វថ្ងៃនេះ ប្រទេសកម្ពុជាដែលមានការចាប់អារម្មណ៍ និងគោលដៅ នៃ​ការ​ដាក់ទុន​វិនិយោគរបស់បរទេសមកកាន់កម្ពុជា ដោយឃើញថា មានកំណើន​ការ​វិនិយោគ​ជា​ច្រើន​ដែល​បាន​ធ្វើឡើង ហើយក៏មានកំណើនរោងចក្រ សហគ្រាសជារៀងរាល់ថ្ងៃ ដូច្នេះហើយ​ការ​ត្រូវ​ការ​ជំនាញ​វិជ្ជាជីវៈ និងបចេ្ចកទេស គឺជាតម្រូវការ​ចាំបាច់​នៅ​ក្នុង​ការ​កសាង​សេដ្ឋកិច្ច​ឧស្សាហកម្ម ៤.០។

ឯកឧត្តម បានបន្តថា ពីពេលនេះតទៅវិស័យឧស្សាហកម្មសហគ្រាស នឹងមានការកើនឡើង ហើយ​នឹង​វិវឌ្ឍន៍ទៅជាឧស្សាហកម្មធុនមធ្យម និងធុនធ្ងន់ថែមទៀត ដូច្នេះតម្រូវ​ឲ្យ​យុវជន​យើង​មាន​ជំនាញ​វិជ្ជាជីវៈនិងបច្ចេកទេស គឺជាការឆ្លើយតបទៅនឹងតម្រូវការទីផ្សារ ឯកឧត្តម​ក៏​បាន​អំពាវ​នាវ​ដល់​យុវជនទាំងអស់ដែលមិនទាន់មានជំនាញ និងរួសរាន់ចុះឈ្មោះរៀន​ជំនាញ​បច្ចេកទេស និង​វិជ្ជាជីវៈ ដើម្បីឆ្លើយតបតម្រូវការទីផ្សារការងារនាពេលបច្ចុប្បន្ន និងនៅថ្ងៃអនាគត។

លោក ហ្វា សាលី ប្រធានសម្ព័ន្ធសហជីពជាតិ បានលើកឡើងថា គិតមកដល់បច្ចុប្បន្ន ក្រោម​ការ​ដឹកនាំ​រប​ស់​ប្រមុខរាជរដ្ឋាភិបាលអាណត្តិថ្មីទី៧នេះ រោងចក្រ​បើក​ថ្មី​ពិត​ជាមា​ន​ការ​កើន​ឡើង​ខ្ពស់​ជា​ទីកត់​សម្គាល់ ហើយអ្វីដែលចាប់អារម្មណ៍បន្ថែមនោះ គឺ ក្រុមហ៊ុនមួយ​ចំនួន​ធំ​ចាប់​ផ្តើម​មាន​ការ​អនុវត្ត​នូវ​លក្ខខណ្ឌការងារល្អប្រសើរច្រើនជាងមុន និងមានប្រសិទ្ធិភាព។ លោកបន្ថែមថា អ្វី​ដែល​សំខាន់ គឺមានការព្រួយបារម្ភទៅវិញទេ នៅពេលដែលកំណើននៃការវិនិយោគមកខ្លាំង កម្ពុជា​អាច​នឹ​ងប្រឈមខ្វះកម្លាំងពលកម្មទៅវិញ។

សូមបញ្ជាក់ថា តាមរយៈកម្មវិធីបណ្តុះបណ្តាលជំនាញបច្ចេកទេស និងវិជ្ជាជីវៈដល់យុវជនចំនួន ១,៥​លាននាក់ ដែលជាផែនការ និងគោលដៅរបស់រាជរដ្ឋាភិបាលកម្ពុជា ដែលបាន​ប្រកាស​ដាក់​ឲ្យ​អនុវត្ត​ជា​ផ្លូវ​ការនៅថ្ងៃ១៤ ខែវិច្ឆិកា ឆ្នាំ២០២៣ រហូតមកដល់ថ្ងៃទី១៣ ខែមីនា ឆ្នាំ២០២៤នេះ អ្នកចុះឈ្មោះចូលរៀនជំនាញមានចំនួនសរុបជាង ២ម៉ឺន ៧ពាន់នាក់។ ក្នុងនោះ ក្រសួងការងារ បាន​បើកវគ្គបណ្តុះបណ្តាលចំនួន ៥៤៤ថ្នាក់ ដែលនៅក្នុងនោះវិស័យសំណង់, អគ្គិសនី និង​ថាមពល, អេឡិចត្រូនិក, កម្មន្តសាល, ទេសចរណ៍ និងកសិកម្មជាដើម៕ អត្ថបទ៖ ឈិត បូរ៉ាវី