​បាល់ទាត់៖ ​ខ្សែប្រយុទ្ធ​អា​ហ្ស​ង់​ទីន Lionel Messi បាន​យល់ព្រម​បន្ត​ស្នាក់នៅ Barcelona រហូតដល់​ឆ្នាំ២០២៦ និង​យល់ព្រម​កាត់ថ្លៃ​ឈ្នួល​ពាក់​កណ្តាល​ផងដែរ​។ ​កីឡាករ​វ័យ ៣៤ឆ្នាំ Lionel Messi កិច្ចសន្យា​របស់គេ​ជាមួយ Barcelona បាន​អស់​សុពលភាព​តាំងពី​ដំណាច់​ខែឧសភា​ម្ល៉េះ​។

​​ប្រាក់​ឈ្នួល​ដែល Messi ទទួលបាន​ពី Barcelona នាពេល​កន្លងមក​ត្រូវបាន​គេ​ឱ្យដឹងថា​ស្មើនឹង ១២៣លាន​ផោន​ក្នុង​មួយ​រដូវ​កាល មានន័យថា​កិច្ចសន្យា​ថ្មី​នាពេលខាងមុខ Messi នឹង​កាត់​ប្រាក់​ឈ្នួល​របស់ខ្លួន​មក​ទទួលបាន​ត្រឹម ៦១.៥លាន​ផោន​ក្នុង​មួយ​រដូវ​កាល​។ ​បច្ចុប្បន្ន Messi កំពុង​សម្រាក​លំហែកាយ​នៅឡើយ ​បន្ទាប់ពី​បញ្ចប់​បេសកកម្ម​ជួយ​ក្រុម​អា​ហ្ស​ង់​ទីន​លើក​ពាន Copa America លើ​កំ​បូ​ង​ក្នុង​អាជីព និង​ជា​លើកដំបូង​ក្នុង​រយៈពេល ២៨ឆ្នាំ​របស់​អា​ហ្ស​ង់​ទីន​ផងដែរ​។​

​​ការបញ្ចុះ​បញ្ចូល​ឱ្យ Messi នៅ​បន្ត​ជាមួយ Barcelona គឺ​ស្របតាម​គោលនយោបាយ​របស់​ប្រធាន​ក្លិប​ថ្មី​លោក Joan Laporta ស្រប​ពេលដែល​ក្លិប​ក៏មាន​គំរោង​ដោះដូរ​កីឡាករ Antoine Griezmann ឱ្យ​ត្រលប់​ទៅ Atletico Madrid វិញ​ និង​យក Saul Niguez មក Barcelona ដើម្បី​កាត់បន្ថយ​ការចំណាយ​។​ ​​សូមបញ្ជាក់ថា Lionel Messi មុននឹង​ឈានដល់​ការ​កិច្ចព្រមព្រៀង​ថ្មី​នេះ ក៏មាន​លេចលឺ​ព័ត៌មាន​ចាកចេញ​ដែរដែល​ក្នុងនោះ Manchester City ឈានមុខ​គេ​ក្នុង​ការតាមប្រមាញ់​កីឡាករ​វ័យ ៣៤រូបនេះ ក៏ដូចជា​ក្លិប​បារាំង Paris Saint Germain និង​ផ្លាស់​ទៅ​ទឹកដី​អាមេរិក Major League Soccer ជាដើម​។

​​Lionel Messi គិត​មកដល់ពេលនេះរ​ក​គ្រាប់​បាល់​សរុប​ឱ្យ Barcelona បាន ៦៧២ គ្រាប់ ឈ្នះ​ជើងឯក La Liga ១០ លើក UEFA Champions League ៤ លើក Copa del Rey ៧ លើក និង​ឈ្នះ​ពាន​ឯកជន Ballon d’Or ៦ លើក​៕

​អត្ថបទ​៖​នាង សុភា​វុ​ធ