ឯកឧត្តម ស៊ុន ចាន់ថុល ឧបនាយករដ្ឋមន្រ្តី អនុប្រធានទី១ ក្រុមប្រឹក្សាអភិវឌ្ឍន៍កម្ពុជា (CDC) បានអញ្ជើញដឹកនាំកិច្ចប្រជុំអន្តរក្រសួងស្តីពីគម្រោងអភិវឌ្ឍផ្លូវរថភ្លើងធុនស្រាលតភ្ជាប់ពីរាជធានីភ្នំពេញ ទៅអាកាសយានដ្ឋានអន្តរជាតិតេជោ និងផ្លូវរថភ្លើងក្រោមដីក្នុងរាជធានីភ្នំពេញ។
ឯកឧត្តម ស៊ុន ចាន់ថុល មានប្រសាសន៍ក្នុងឱកាសដឹកនាំកិច្ចប្រជុំអន្តរក្រសួងស្តីពីគម្រោងអភិវឌ្ឍផ្លូវរថភ្លើងធុនស្រាលតភ្ជាប់ពីរាជធានីភ្នំពេញទៅអាកាសយានដ្ឋានអន្តរជាតិតេជោ និងផ្លូវរថភ្លើងក្រោមដីក្នុងរាជធានីភ្នំពេញ នៅថ្ងៃទី១៨ ខែមីនា ឆ្នាំ២០២៤នេះថា កិច្ចប្រជុំនេះធ្វើឡើងដោយអនុវត្តតាមអនុសាសន៍ណែនាំរបស់សម្តេចតេជោ ហ៊ុន សែន អតីតនាយករដ្ឋមន្រ្តី កាលពីពេលកន្លងទៅ និងបន្តអនុវត្តតាមអនុសាសន៍សម្តេចបវរធិបតី ហ៊ុន ម៉ាណែត នាយករដ្ឋមន្រ្តី ដែលបានណែនាំឱ្យមានការរៀបចំកិច្ចប្រជុំអន្តរក្រសួងលើគម្រោងសាងសង់ផ្លូវរថភ្លើងក្រោមដី ដើម្បីរំដោះការកកស្ទះចរាចរណ៍ និងជួយសម្រួលការធ្វើដំណើររបស់ប្រជាពលរដ្ឋ រួមទាំងទេសចរណ៍អន្តរជាតិឱ្យកាន់តែងាយស្រួល និងជួយឱ្យការធ្វើដំណើរមានភាពឆាប់រហ័សជាងមុន។
ឯកឧត្តមមានប្រសាសន៍ថា ដើម្បីសាងសង់ផ្លូវក្រោមដីក្នុងរាជធានីភ្នំពេញ និងផ្លូវរថភ្លើងធុនស្រាលក្រោមដីតភ្ជាប់ពីរាជធានីភ្នំពេញទៅអាកាសយានដ្ឋានអន្តរជាតិតេជោ រាជរដ្ឋាភិបាលអនុញ្ញាតឱ្យក្រុមហ៊ុន China Metro សិក្សាលើគម្រោងនេះ ដោយសហការជាមួយក្រុមហ៊ុន OCIC ដែលកំពុងដំណើរការសាងសង់អាកាសយានដ្ឋានអន្តរជាតិតេជោ ខណៈការសាងសង់អាកាសយានដ្ឋានអន្តរជាតិដ៏ធំនេះបានសម្រេចលទ្ធផលបានចំនួនជាង៦០ភាគរយ។
ឯកឧត្តមថ្លែងថា ការរៀបចំកិច្ចប្រជុំអន្តរក្រសួងលើកដំបូងនេះក្រុមប្រឹក្សាអភិវឌ្ឍន៍កម្ពុជា មានគោលបំណងចង់ឱ្យក្រសួងសាធារណការ និងដឹកជញ្ជូន, រដ្ឋបាលរាជធានីភ្នំពេញ និងរដ្ឋបាលខេត្តកណ្តាល បានពិភាក្សាគ្នារកដំណោះស្រាយ និងលើកនូវបញ្ហាផលប៉ះពាល់ពីការសិក្សាលើគម្រោងនេះ ដោយរៀបចំក្រុមការងាររបស់ក្រសួង និងស្ថាប័នពាក់ព័ន្ធបន្តចុះសិក្សានៅទីតាំងផ្ទាល់បន្ថែមទៀតផងដែរ។
នាឱកាសនោះ ឯកឧត្តម ឧបនាយករដ្ឋមន្រ្តី ក៏បានស្នើដល់ក្រសួងសាធារណការ និងដឹកជញ្ជូន, រដ្ឋបាលរាជធានីភ្នំពេញ និងខេត្តកណ្តាល រួមទាំងក្រុមហ៊ុន China Metro សហការគ្នាចែករំលែកនូវព័ត៌មាន ឬឯកសារនានាដើម្បីជួយដល់ការសិក្សាលើគម្រោងឱ្យបានកាន់តែលឿន ខណៈបញ្ហាការកកស្ទះចរាចរណ៍ក្នុងរាជធានីភ្នំពេញជាកង្វល់ដែលត្រូវជំរុញការដោះស្រាយ។
ចំពោះគម្រោងសាងសង់ផ្លូវរថភ្លើងធុនស្រាល និងផ្លូវក្រោមដីក្នុងរាជធានីភ្នំពេញនេះ ឯកឧត្តម ឧបនាយករដ្ឋមន្រ្តី បានណែនាំដល់ក្រសួងសាធារណការ និងដឹកជញ្ជូន និងក្រុមហ៊ុនត្រូវពិនិត្យនូវទីតាំង នៃចំណតសំខាន់ៗក្នុងរាជធានីភ្នំពេញ ដែលជាកន្លែងប្រជុំជន ដូចជាផ្សារទំនើបធំៗ សម្រាប់ប្រជាពលរដ្ឋ និងទេសចរណ៍អន្តរជាតិងាយស្រួលធ្វើដំណើរចេញ-ចូល ហើយថែមទាំងជួយដល់ការអភិវឌ្ឍសង្គមជាតិទាំងមូល។
ជាមួយគ្នានោះ តំណាងក្រុមហ៊ុន China Metro បានថ្លែងអំណរគុណដល់រាជរដ្ឋាភិបាលដែលបានអនុញ្ញាតឱ្យក្រុមហ៊ុនសិក្សាលើគម្រោងដ៏សំខាន់នេះ ក្នុងការរួមចំណែកដល់ការអភិវឌ្ឍផ្លូវក្រោមដី និងផ្លូវរថភ្លើងធុនស្រាល ដែលមានតួនាទីសំខាន់ជួយពន្លឿនការធ្វើដំណើរការរបស់ប្រជាពលរដ្ឋកម្ពុជា។
ទន្ទឹមនោះដែរ តំណាងរដ្ឋបាលរាជធានីភ្នំពេញ និងខេត្តកណ្តាល បានបង្ហាញការគាំទ្រ និងសហការជាមួយក្រុមហ៊ុន China Metro ក្នុងការផ្តល់នូវរបាយការណ៍ ឬព័ត៌មាន ក៏ដូចជាចូលរួមដោះស្រាយរាល់បញ្ហាដែលប៉ះពាល់ និងរាំងស្ទះដល់គម្រោងនេះ សំដៅធ្វើយ៉ាងណាជំរុញឱ្យគម្រោងផ្លូវរថភ្លើងធុនស្រាលក្រោមដីនេះអាចដំណើរការហើយផ្តល់អត្ថប្រយោជន៍សម្រាប់ប្រជាពលរដ្ឋទាំងអស់ប្រើប្រាស់៕ អត្ថបទ សេក ឧត្តម
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
