សៀមរាប ៖ សិប្បករអង្គរ (Artisan’s Angkor) គឺជាសិប្បកម្មដ៏ធំមួយនៅក្នុងប្រទេសកម្ពុជា ដែលបានឆ្លាក់ គូរ និងតម្បាញនូវវត្ថុអនុស្សាវរីយ៍បែបបុរាណ ប្រពៃណីវប្បធម៌ខ្មែរជាច្រើនប្រភេទ។ គ្រប់ផលិតផលដែលបានធ្វើរួច ក៏មានដាក់តាំងបង្ហាញលក់នៅក្នុងហាងសិប្បករអង្គរផ្ទាល់ដែរ។ ហើយអ្វីដែលពិសេសនោះគឺសិប្បកម្មមួយនេះក៏ជាកន្លែងបណ្តុះបណ្តាលកូនខ្មែរឲ្យក្លាយជាជាងដ៏ចំណាន និងស្ទាត់ជំនាញក្នុងការគូរ ឆ្លាក់ និងតម្បាញ ។

មានទីតាំងស្ថិតនៅភូមិស្ទឹងថ្មី ឃុំស្វាយដង្គំ ស្រុកសៀមរាប ខេត្តសៀមរាប «សិប្បករអង្គរ» មានសិប្បករ និងបុគ្គលិកបម្រើការប្រមាណជាងមួយពាន់នាក់ ក្នុងដំណាក់កាលមុនសម័យកូវីដ ប៉ុន្តែបន្ទាប់ពីសកលលោក ក៏ដូចជាប្រទេសកម្ពុជាជួបនូវបញ្ហាកូវីដ១៩មក វាបានជះផលប៉ះពាល់ជាខ្លាំងដល់សិប្បកម្មមួយនេះផងដែរ ដោយបច្ចុប្បន្នសិប្បកម្មនេះបានកាត់បន្ថយសិប្បករ និងបុគ្គលនៅសល់តែប្រមាណជាងបីរយនាក់ប៉ុណ្ណោះ។

តើក្រុមជាងដែលកំពុងធ្វើការនៅក្រុមហ៊ុននេះគឺជានណា ? មកពីណា ? ចម្លើយ គឺ ជាស្នាដៃរបស់កូនខ្មែរសុទ្ធ សាត ហើយដែលភាគច្រើនគឺអ្នកនៅខេត្តសៀមរាបតែម្តង។ ទន្ទឹមនឹងការបង្កើតស្នាដៃចម្លាក់ចេញពីថ្មភក់ ឈើ ស្ពាន់ សរសៃសូត្រ គ្រប់ជាងទាំងអស់ដែលបានកំពុងធ្វើការនៅក្នុងសិប្បកម្មនេះគឺបានរៀនសូត្រ និងទទួលការ បណ្តុះបណ្តាលពីក្រុមហ៊ុន«សិប្បករអង្គរ»ទាំងអស់ ដោយមានប្រាក់ឧបត្ថម្ភ និងរបបអាហារជូនពួកគេថែមទៀតផង ក្នុងអំឡុងពេលនេះ។

ក្នុងកិច្ចសម្ភាសន៍ជាមួយទូរទស្សន៍BTV លោក ស៊ិន ពេញ ជាអ្នកមើលការខុសត្រូវផ្នែកលក់ក្នុងហាងសៀមរាប( Shop Supervisor in siem reap shop) បានលើកឡើងថា ក្រុមហ៊ុនសិប្បករអង្គរ បាន ឆ្លាក់ គូរ និងត្បាញនូវវត្ថុអនុស្សាវរីយ៍បែបបុរាណ ប្រពៃណីនិងវប្បធម៌ខ្មែរពិតៗ។ រាល់វត្ថុអនុស្សាវរីយ៍ទាំងនេះបាននិងកំពុងដាក់លក់លើទីផ្សារក្នុងស្រុក និងនៅលើប្រព័ន្ធអនឡាញផងដែរ។ ផលិតផលនានារបស់ សិប្បករអង្គរ ក៏មានការគាំទ្រយ៉ាងខ្លាំងពីបណ្ដាប្រទេសលោកខាងលិច ដូចជាសហរដ្ឋអាមេរិក កាណាដា បារាំង និងប្រទេសមួយចំនួនទៀត ។

 សិប្បករអង្គរ ដែលជាសិប្បកម្មមួយដ៏ធំស្ថិតនៅខេត្តសៀមរាបនេះ ក៏ជាកន្លែងទាក់ទាញនូវភ្ញៀវទេសចរបរទេស រាប់រយនាក់ក្នុងមួយថ្ងៃៗចូលមកទស្សនាផងដែរ ដោយភ្ញៀវបរទេសទាំងនោះបានចូលពិនិត្យការរចនាចម្លាក់ ដែលធ្វើដោយផ្ទាល់ដោយវិចិត្រករ វិចិត្រការិនី ព្រមទាំងបានទស្សនាការតាំងបង្ហាញលក់ និងបានទិញដោយនូវវត្ថុអនុស្សាវរីយ៍ទាំងនោះតាមការស្រលាញ់ពេញចិត្តភ្លាមៗដែរ។

ខន ហុងខី និង ច្រូច បូរ៉ា ដែលជាអ្នកលក់នៅក្នុងហាងសៀមរាប បានឲ្យដឹងថា ក្នុងមួយថ្ងៃៗមានភ្ញៀវបរទេសជាច្រើនបានចូលមកទស្សនា និងទិញផ្ទាល់នូវវត្ថុអនុស្សាវរីយ៍ ដែលកំពុងដាក់តាំងបង្ហាញ និងលក់នៅក្នុងហាងក្នុងខេត្តសៀមរាបនេះ។  អ្នកលក់ទាំងពីររូបបានឲ្យដឹងទៀតថា បច្ចុប្បន្នវត្ថុអនុស្សាវរីយ៍ដែលបរទេសកំពុងពេញនិយម និងទិញច្រើនជាងគេនោះគឺវត្ថុដែលធ្វើចេញពីសរសៃសូត្រ និងចម្លាក់ថ្ម។

ដោយឡែកវិចិត្រករ និងវិចិត្រការិនី ដែលកំពុងបម្រើការនៅក្នុងក្រុមហ៊ុនសិប្បករអង្គរនេះ ក៏បានសម្តែងនូវមោទនភាព ដែលបានក្លាយទៅជាជាងដ៏ចំណាន បានឆ្លាក់ បានគូរ និងត្បាញវត្ថុអនុស្សាវរីយ៍បែបបុរាណ តាមលំអានប្រពៃណីខ្មែរយកទៅលក់នៅលើទីផ្សារអន្តរជាតិ។ ជាងនេះទៅទៀតពួកគេក៏អគុណដល់ក្រុមហ៊ុនខ្លួនដែលបានធ្វើការបណ្តុះបណ្តាល បង្រៀនដល់ពួកគេឲ្យចេះឆ្លាក់ គូរ និងត្បាញ ព្រមទាំងថែមទាំងផ្តល់ការងារជូនដល់ពួកគាត់តាំងពីដើម រហូតដល់សព្វថ្ងៃនេះផងដែរ។

បម្រើការជាជាងគូរ ឆ្លាក់ និងត្បាញ រយៈពេលជាង១០ឆ្នាំ និងខ្លះទៀតជាង២០ឆ្នាំមកនេះ ពួគគាត់បានអះអាង ថា ពិតជាបានប្រែក្លាយជីវភាពរស់នៅរបស់ពួកគាត់បានល្អប្រសើរជាងមុន ដោយមិនចាំបាច់ធ្វើចំណាក់ស្រុក។ មានចំណេះ ជំនាញមួយនេះ អាចនិយាយបានថា ពួកគេបានចូលរួមជួយថែរក្សាអភិរក្សនូវស្នាដៃដូនតាខ្មែរ    ខណៈចម្លាក់ គំនូរ ដែលពួកគេធ្វើនេះភាគច្រើនគឺជាវត្ថុអនុស្សាវរីយ៍បង្ហាញពីវប្បធម៌ និងប្រពៃណីរបស់ខ្មែរតាំងពីបុរាណមក។ នេះជាអ្វីដែលពួកគាត់បានបង្ហាញអារម្មណ៍សប្បាយ និងពេញចិត្ត។

«សិប្បករអង្គរ»ក្រៅតែពីដាក់បង្ហាញលក់នៅក្នុងហាងវត្ថុអនុស្សាវរីយ៍នានានៅក្នុងខេត្តសៀមរាប និងរាជធានីភ្នំពេញ ក្រុមហ៊ុនក៏តែងបាននាំយកផលិតផល ស្នាដៃរបស់ខ្លួនចូលរួមដាក់តាំងបង្ហាញលក់នៅក្មុងកម្មវិធី ឬ ព្រឹត្តិការណ៍ថ្នាក់ជាតិធំៗជាច្រើនដងផងដែរ។ ជាក់ស្តែងក្នុងឱកាសបុណ្យទន្លេលើកទី៨ ដែលប្រព្រឹត្តិទៅនៅខេត្តសៀមរាបនាឆ្នាំនេះ ក្រុមហ៊ុនបានយកវត្ថុអនុស្សាវរីយ៍ស្នាដៃកូនខ្មែរនេះ មានដូចជា ប្រភេទចម្លាក់ឈើ សូត្រ ថ្ម ប្រភេទស្ពានដែលជ្រលក់ទឹកប្រាក់ពីលើ គំនូរធ្វើពីកុងផ្លាកេ លាបពណ៌ខ្មុកម្រក្សណ៍ បិទដោយសន្លឹកស្ពាន់ និងមាសពីលើជាដើម។

 សូមបញ្ជាក់ថា ក្រុមហ៊ុនសិប្បករអង្គរ ឬភាសាបរទេសហៅថា Artisan’s Angkor មានសាខាលក់ជាច្រើន កន្លែង ស្ថិតនៅខេត្តសៀមរាប អាកាសយានដ្ឋានថ្មីខេត្តសៀមរាប នៅរាជធានីភ្នំពេញ និងអាកាសយានដ្ឋាន អន្តរជាតិភ្នំពេញ៕

អត្ថបទ ៖ បាន ចក់