កណ្ដាល៖ គម្រោងស្ថាបនាស្ពានបេតុងប្រវែង៣៥០ម៉ែត្រឆ្លងកាត់ឆ្ពោះទៅភូមិកោះចំរើន ស្ថិតនៅឃុំកំពង់ភ្នំ ស្រុកលើកដែក ខេត្តកណ្តាល នឹងផុសជារូបរាងឡើងនាពេលឆាប់ៗខាងមុខនេះ ខណៈប្រជាពលរដ្ឋទន្ទឹមរង់ចាំចង់បានយូរឆ្នាំមកហើយ។

លោក ចាប ច័ន្ទវិទ្យា អភិបាលស្រុកលើកដែក បានឱ្យBTvដឹងរសៀលថ្ងៃទី១៨ ខែមីនា ឆ្នាំ២០២៤នេះថា ក្តីបំណងរបស់ពលរដ្ឋបានមកដល់ហើយអំពីការគម្រោងស្ថាបនាស្ពានបេតុងដ៏ស្រស់ស្អាតមួយកន្លែងឆ្លងកាត់ទៅកាន់ភូមិកោះចំរើន ដែលមានប្រវែង៣៥០ម៉ែត្រ ទទឹង៨ម៉ែត្រ ព្រមទាំងដាក់លូជ្រុង២ម៉ែត្រ ដោយប្រើប្រាស់ពេលវេលាសាងសង់២៤ខែ។

លោកអភិបាលស្រុកលើកដែក បន្ថែមទៀតថា ជាង២ខែនេះ ក្រុមការងារជំនាញ បានបោសសម្អាតគ្រាប់មីនមិនទាន់ផ្ទុះ និងកំពុងរៀបចំទីតាំងបើកការដ្ឋានឱ្យបានត្រឹមត្រូវតាមបច្ចេកទេស ដើម្បីត្រៀមពិធីបើកដ្ឋានសាងសង់ជាផ្លូវការឆាប់ៗខាងមុខ។ 

គម្រោងស្ថាបនាស្ពាន១កន្លែងខាងលើ ជាការលើកគម្រោងផែនការរបស់រដ្ឋបាលស្រុកទៅរដ្ឋបាលខេត្តកណ្តាល ហើយរដ្ឋបាលឯភាពគាំទ្រអភិវឌ្ឍន៍បម្រើជូនប្រជាពលរដ្ឋងាយស្រួលឆ្លងទៅមក មិនថារដូវប្រាំង ឬរដូវវស្សា។

តម្រូវការចង់បានស្ពានឆ្លងកាត់ទៅភូមិកោះចំរើន ត្រូវបានពលរដ្ឋសំណូមពរជាសំណើ និងទន្ទឹមរង់ចាំយូរឆ្នាំមកហើយដែរ ទើបតែឥឡូវទទួលបានគម្រោងធ្វើស្ពាននេះឡើង។ ជាទម្លាប់រដូវវស្សា ប្រជាពលរដ្ឋទូទៅត្រូវធ្វើដំណើរជិះទូកដ រីឯរដូវប្រាំងបង់ថវិកា១ជើងថ្លៃចាប់ពី៣.០០០រៀលឡើងទៅ ជាស្នូរអាចធ្វើដំណើរដោយរថយន្តម៉ូតូឆ្លងកាត់ដីរបស់ឯកជន។

គេនៅចាំបានថា កាលពីខែតុលា ឆ្នាំ២០២២ មានក្មេងចំនួន១១នាក់ បានស្លាប់ដោយសារជួបឧបទ្ទវហេតុលិចទូកដគួរសង្វេគពេកក្រៃ ក្រោយពីពួកគេចេញពីសាលារៀនមកផ្ទះ។  

លោក ប៊ុត សុវត្តិ ដែលទើបតែបាត់បង់កូនស្រីជាទីស្រឡាញ់ម្នាក់ក្នុងគ្រោះមហន្តរាយនោះ សូមថ្លៃងអំណអរគុណយ៉ាងជ្រាលជ្រៅជូនរាជរដ្ឋាភិបាលកម្ពុជា រដ្ឋបាលខេត្តកណ្តាល និងរដ្ឋបាលស្រុកលើកដែក បានគិតគូរពីតម្រូវការចាំបាច់តាមរយៈការផ្តល់ស្ពានបេតុងថ្មីនេះឡើង ដើម្បីងាយស្រួលដល់សិស្សានុសិស្សទៅសាលារៀនប្រកបសុវត្ថិភាពព្រមទាំងដឹកជញ្ចូនទិន្នផលកសិកម្មទៅកាន់ទៅទីផ្សារបានឆាប់រហ័សផងដែរ។

ភូមិកោះចំរើន ស្ថិតនៅភាគអាគ្នេយ៍ក្នុងចម្ងាយជាង ៥០ គីឡូម៉ែត្រពីរាជធានីភ្នំពេញ។ ភូមិនេះមានដីកោះហ៊ុមព័ទ្ធទៅដោយទន្លេមេគង្គ មានផ្ទៃដីសរុបជាង ០,៥២ គីឡូម៉ែត្រក្រឡា [ឬជាង ៥២ ហិកតា] និងមានប្រជាពលរដ្ឋសរុបចំនួន ៥២៩ គ្រួសារ [គិតជាចំនួនមនុស្សរាយ ១ ០៩០ នាក់] រស់នៅ និងអាស្រ័យផលដោយពឹងផ្អែកលើមុខរបរកសិកម្មនិងនេសាទ៕ ដោយ ៖ យ៉ាម៉ង់