នាយករដ្ឋមន្ត្រីអ៊ីស្រាអែល លោក បេនចាមីន ណេតាន់យ៉ាហ៊ូ (Benjamin Netanyahu) បានប្រាប់ទូរទស្សន៍ CNN កាលពីថ្ងៃអាទិត្យ (១៧ មីនា) ថា សុន្ទរកថារបស់លោក ឆាក់ ស៊ូមឺ (Chuck Schumer) មេដឹកនាំសំឡេងភាគច្រើននៃព្រឹទ្ធសភាអាមេរិក ដែលបានជំរុញឱ្យមានការបោះឆ្នោតជាថ្មីនៅក្នុងប្រទេសអ៊ីស្រាអែល គឺ «មិនសមរម្យទាល់តែសោះ»។

នៅក្នុងសុន្ទរកថានៅព្រឹទ្ធសភាកាលពីថ្ងៃព្រហស្បតិ៍ លោក ស៊ូមឺ ដែលជាអ្នកគាំទ្រអ៊ីស្រាអែលជាយូរមកហើយ និងជាមន្ត្រីជាប់ឆ្នោតជាន់ខ្ពស់ជនជាតិជ្វីហ្វរបស់សហរដ្ឋអាមេរិក បានអំពាវនាវឱ្យមានការបោះឆ្នោតថ្មីនៅអ៊ីស្រាអែល ហើយបាននិយាយថា លោក ណេតាន់យ៉ាហ៊ូ គឺជាឧបសគ្គចំពោះសន្តិភាព។

សុន្ទរកថានេះបានឆ្លុះបញ្ចាំងពីការខកចិត្តកាន់តែខ្លាំងឡើងនៅក្នុងទីក្រុងវ៉ាស៊ីនតោន ជាមួយលោក ណេតាន់យ៉ាហ៊ូ លើការគ្រប់គ្រងរបស់លោកក្នុងសង្គ្រាមនៅតំបន់ហ្កាហ្សា និងការបរាជ័យក្នុងការការពារជនស៊ីវិលប៉ាឡេស្ទីន ព្រមទាំងបញ្ហាចែកចាយជំនួយចូលទៅក្នុងតំបន់ហ៊ុមព័ទ្ធ។

លោក ស៊ូមឺ បាននិយាយថា វានឹងក្លាយជា «កំហុសដ៏ធ្ងន់ធ្ងរ» សម្រាប់អ៊ីស្រាអែលក្នុងការបដិសេធដំណោះស្រាយរដ្ឋពីរ ហើយបានជំរុញឱ្យអ្នកចរចាក្នុងជម្លោះអ៊ីស្រាអែល-ហ្កាហ្សា ធ្វើអ្វីគ្រប់យ៉ាងដើម្បីទទួលបានបទឈប់បាញ់ ដោះលែងចំណាប់ថ្នូរ និងទទួលបានជំនួយចូលទៅក្នុងតំបន់ហ្កាហ្សា។

លោក ណេតាន់យ៉ាហ៊ូ បានបញ្ជាក់ពីជំហរយ៉ាងរឹងមាំរបស់ខ្លួនកាលពីថ្ងៃអាទិត្យ ដោយនិយាយថារដ្ឋប៉ាឡេស្ទីន នឹងក្លាយជា «រង្វាន់ដ៏ធំបំផុតសម្រាប់អំពើភេរវកម្មនៅក្នុងប្រវត្តិសាស្ត្រ»៕