ប្រធានាធិបតីកូរ៉េខាងត្បូង លោក យ៉ុន សុកយ៉ុល (Yoon Suk Yeol) នៅថ្ងៃចន្ទ (១៨ មីនា) នេះបាននិយាយថា ព័ត៌មានក្លែងក្លាយ និងព័ត៌មានមិនពិតដោយផ្អែកលើប្រព័ន្ធប្រាជ្ញាសិប្បនិមិត្ត AI និងបច្ចេកវិទ្យាឌីជីថល ជាការគំរាមកំហែងដល់លទ្ធិប្រជាធិបតេយ្យ ខណៈដែលកូរ៉េខាងត្បូង បានរៀបចំការប្រមូលផ្តុំមន្ត្រីជាន់ខ្ពស់ពិភពលោក រួមទាំងមកពីចក្រភពអង់គ្លេស សហភាពអឺរ៉ុប និងសហរដ្ឋអាមេរិក។

ថ្លែងនៅក្នុងពិធីបើកកិច្ចប្រជុំកំពូលលទ្ធិប្រជាធិបតេយ្យ ដែលមានរយៈពេលបីថ្ងៃ លោក យ៉ុន បាននិយាយថា បណ្តាប្រទេសនានាមានកាតព្វកិច្ចចែករំលែកបទពិសោធន៍ និងពុទ្ធិ ដើម្បីឱ្យបញ្ញាសិប្បនិមិត្ត និងបច្ចេកវិទ្យាអាចត្រូវបានគេប្រើប្រាស់ដើម្បីលើកកម្ពស់លទ្ធិប្រជាធិបតេយ្យ។

ប្រទេសកូរ៉េខាងត្បូងកំពុងធ្វើជាម្ចាស់ផ្ទះនៃសន្និសីទកំពូលលើកទីបីសម្រាប់លទ្ធិប្រជាធិបតេយ្យ ដែលជាគំនិតផ្តួចផ្តើមរបស់ប្រធានាធិបតីសហរដ្ឋអាមេរិក លោក ចូ បៃដិន (Joe Biden) ក្នុងគោលបំណងពិភាក្សាអំពីវិធីដើម្បីបញ្ឈប់ជំហានថយក្រោយរបស់លទ្ធិប្រជាធិបតេយ្យ និងការបាត់បង់សិទ្ធិ និងសេរីភាព។

រដ្ឋមន្ត្រីការបរទេសសហរដ្ឋអាមេរិក លោក អាន់តូនី ប្លីងខិន (Antony Blinken) បាននិយាយនៅក្នុងព្រឹត្តិការណ៍នេះថា បច្ចេកវិទ្យាគួរតែត្រូវបានប្រើប្រាស់ដើម្បីរក្សាតម្លៃប្រជាធិបតេយ្យ ហើយប្រឈមមុខនឹងកិច្ចខិតខំប្រឹងប្រែងដោយរបបផ្តាច់ការ និងគាបសង្កត់ដើម្បីដាក់ពង្រាយបច្ចេកវិទ្យាដើម្បីបំផ្លាញលទ្ធិប្រជាធិបតេយ្យ និងសិទ្ធិមនុស្ស៕