ទីភ្នាក់ងារកុមាររបស់អង្គការសហប្រជាជាតិ (UNICEF) បាននិយាយកាលពីថ្ងៃសៅរ៍ (១៦) ថាកុងតឺន័រជំនួយមួយរបស់ខ្លួននៅឯកំពង់ផែសំខាន់របស់ប្រទេសហៃទី ដែលស្តុកទុកនូវ «វត្ថុសំខាន់ៗសម្រាប់ការរស់រានមានជីវិតរបស់មាតា ទារកទើបនឹងកើត និងកុមារ» ត្រូវបានលួចខណៈ ដែលហិង្សាក្រុមជនអន្ធពាលកាន់តែគ្រប់ដណ្ដប់រដ្ឋធានី។

ប្រទេសហៃទី កំពុងជួបការលំបាកដើម្បីដោះស្រាយវិបត្តិនយោបាយ និងវិបត្តិមនុស្សធម៌ដ៏អូសបន្លាយ ដែលទីភ្នាក់ងារកុមារ យូនីសេហ្វ បានព្រមានថា កំពុងបង្កឱ្យមានភាពអត់ឃ្លាន និងកង្វះអាហារូបត្ថម្ភ ដែលគំរាមកំហែងដល់អាយុជីវិតនៅក្នុងផ្នែកខ្លះនៃរដ្ឋធានីព័រអូប្រាំង។

ភាពតានតឹងនៅតែកើនឡើងក្នុងប្រទេស ទោះជាបន្ទាប់ពីនាយករដ្ឋមន្ត្រីដែលមិនជាប់ឆ្នោតលោក អារីយែល ហុងរី (Ariel Henry) បាននិយាយក្នុងសប្តាហ៍នេះថា លោកនឹងចុះចេញពីតំណែងនៅពេលដែលមានក្រុមប្រឹក្សាអន្តរកាលត្រូវបានបង្កើតក៏ដោយ។

ក្រុមជនអន្ធពាលប្រដាប់អាវុធធន់ធ្ងន់បានកាន់កាប់ទីក្រុងជាច្រើន ហើយក្រុមសិទ្ធិមនុស្សបានរាយការណ៍ពីការសម្លាប់ដ៏រីករាលដាល ការចាប់ជំរិត និងអំពើហិង្សាផ្លូវភេទ។

អង្គការ យូនីសេហ្វ បាននិយាយថា កុងតឺន័រមួយក្នុងចំនោម ១៧ កុងតឺន័ររបស់ខ្លួនត្រូវបានលួចនៅកំពង់ផែ ព័រអូប្រាំង ខណៈកុងតឺន័របស់ទីភ្នាក់ងារមនុស្សធម៌ចំនួន ២៦០ ទីតាំងត្រូវបានគ្រប់គ្រងដោយក្រុមប្រដាប់អាវុធ៕