កងកម្លាំងការពារជាតិប្រទេសអូស្ត្រាលី (ADF) ត្រូវបានដាក់ពង្រាយ ដើម្បីជួយជម្លៀសប្រជាជនចេញពីតំបន់ដាច់ស្រយាលនៃដែនដីភាគខាងជើង មុនពេលព្យុះស៊ីក្លូនបោកបក់ដល់ដីគោក។

លោក Murray Watt រដ្ឋមន្ត្រីគ្រប់គ្រងគ្រាអាសន្ន នៅថ្ងៃចន្ទនេះ បានអនុម័តសំណើពីរដ្ឋាភិបាលដែនដីភាគខាងជើង(NT) សុំជំនួយកងកម្លាំងការពាជាតិអូស្ត្រាលី(ADF) ដើម្បីជម្លៀសប្រជាជន ៨០០ នាក់ ពីទីក្រុង Borroloola មានចម្ងាយជាង ៧០០គីឡូម៉ែត្រភាគអាគ្នេយ៍ទីក្រុង Darwin និងតំបន់នៅជុំវិញនោះ ខណៈតំបន់នេះត្រៀមទប់ទល់ព្យុះស៊ីក្លូនត្រូពិច Megan ។

គិតត្រឹមព្រឹកថ្ងៃចន្ទនេះ ព្យុះស៊ីក្លូននៅតែស្ថិតនៅលើផ្ទៃទឹកចម្ងាយ ១២០ គីឡូម៉ែត្រភាគឦសានទីក្រុង Borroloola ក្នុងឈូងសមុទ្រ ខាភេនថារីយ៉ា(Carpentaria) បន្ទាប់ពីបានបង្កការបំផ្លាញ នៅកោះ គ្រូតតេ អ៊ីលេន(Groote Eylandt)នៃឆ្នេរសមុទ្រភាគឦសានរបស់ដែនដីភាគខាងជើង។

ការិយាល័យឧតុនិយម (BoM) បានព្រមានថា ព្យុះនេះនឹងបោកបក់ដល់ដីគោក នៅរសៀលថ្ងៃចន្ទនេះ ជាព្យុះស៊ីក្លូនប្រភេទទី ៣ ដែលនាំមកនូវការបំផ្លាញខ្លាំង ដោយមានល្បឿនខ្យល់រហូតដល់ ២០០ គីឡូម៉ែត្រក្នុងមួយម៉ោង ព្រមទាំងមានភ្លៀងធ្លាក់ខ្លាំង ទឹករលក និងទឹកជំនន់ដ៏គ្រោះថ្នាក់។

លោក Watt បានប្រាប់ប្រព័ន្ធផ្សព្វផ្សាយរដ្ឋថា មានការព្រួយបារម្ភមួយចំនួន ដែលមិនត្រឹមតែអាចមានការបំផ្លិចបំផ្លាញពីព្យុះស៊ីក្លូនប៉ុណ្ណោះទេ ប៉ុន្តែវាក៏មានហានិភ័យទឹកជំនន់ធ្ងន់ធ្ងរផងដែរ។ ការជម្លៀសប្រជាជន បានចាប់ផ្តើមនៅព្រឹកថ្ងៃចន្ទនេះ ដោយមនុស្សចាស់ និងអ្នកងាយរងគ្រោះ ត្រូវបានផ្តល់អាទិភាព។

កោះ Groote Eylandt ត្រូវបានវាយប្រហារដោយខ្យល់បក់ខ្លាំង និងមានភ្លៀងធ្លាក់រហូតដល់៦៨០ មីល្លីម៉ែត្រ ក្នុងរយៈពេល ៤៨ម៉ោង រហូតដល់ព្រឹកថ្ងៃអាទិត្យ ខណៈព្យុះស៊ីក្លូន កាន់តែខិតជិតមកដល់។