មន្ត្រីសន្តិសុខពីរនាក់ បាននិយាយថា ការវាយប្រហារតាមអាកាសប៉ាគីស្ថាន បានកំណត់គោលដៅទៅលើកន្លែងលាក់ខ្លួនរបស់ក្រុមតាលីបង់ប៉ាគីស្ថានក្នុងប្រទេសអាហ្វហ្គានីស្ថាន នៅព្រឹកថ្ងៃចន្ទនេះ រយៈពេលពីរថ្ងៃ បន្ទាប់ពីក្រុមបះបោរ បានសម្លាប់ទាហាន៧នាក់ នៅក្នុងការបំផ្ទុះគ្រាប់បែកអត្តឃាត និងការវាយប្រហារដ៏បំផ្លិចបំផ្លាញ នៅភាគពាយព្យ។

ពុំមានការអត្ថាធិប្បាយភ្លាមៗពីយោធាប៉ាគីស្ថានទេ ហើយរដ្ឋាភិបាលតាលីបង់ នៅអាហ្វហ្គានីស្ថាន បានចាត់ទុកការវាយប្រហារមនេះទំនងជាបង្កើនភាពតានតឹងរវាងប្រទេសជិតខាង។

មន្ត្រីសន្តិសុខ និងចារកម្មប៉ាគីស្ថានពីរនាក់ បាននិយាយថា ការវាយប្រហារតាមអាកាស ត្រូវបានធ្វើឡើងនៅក្នុងខេត្ត Khost និង Paktika ជាប់ព្រំដែនប៉ាគីស្ថាន។ មន្ត្រីទាំងនោះ បាននិយាយក្នុងលក្ខខណ្ឌសុំមិនបញ្ចេញឈ្មោះ ព្រោះពួកគេមិនមានសិទ្ធិនិយាយទៅកាន់ប្រព័ន្ធផ្សព្វផ្សាយជាសាធារណៈទេ។

មន្ត្រីទាំងអស់នោះ មិនបានផ្តល់ព័ត៌មានលម្អិតបន្ថែមទេ ហើយមិនច្បាស់ទេថាតើយន្តហោះ បានចូលទៅជ្រៅក្នុងប្រទេសអាហ្វហ្គានីស្ថាន ឬយ៉ាងណាទេ។ ក្រុមតាលីបង់ប៉ាគីស្ថាន ក៏បានអះអាងពីការវាយប្រហារនៅថ្ងៃចន្ទនេះ នៅក្នុងសេចក្តីថ្លែងការណ៍មួយ។

អ្នកនាំពាក្យជាន់ខ្ពស់របស់ក្រុមតាលីបង់អាហ្វហ្គានីស្ថាន លោក Zabihullah Mujahid បាននិយាយនៅក្នុងសេចក្តីថ្លែងការណ៍មួយថា ការវាយប្រហារតាមអាកាសរបស់ប្រទេសប៉ាគីស្ថាន នៅស្រុក Barmal ក្នុងខេត្តPaktika បានបណ្តាលឲ្យស្ត្រី ៣នាក់ និងកុមារ៣នាក់ស្លាប់ ខណៈដែលស្ត្រីពីរនាក់ផ្សេងទៀត ត្រូវបានសម្លាប់នៅក្នុងការវាយប្រហារ នៅក្នុងខេត្ត Khost ។

ការវាយប្រហារតាមអាកាស បានកើតឡើង រយៈពេលពីរថ្ងៃបន្ទាប់ពីអ្នកបំផ្ទុះគ្រាប់បែកអត្តឃាត បានបើករថយន្តផ្ទុកគ្រឿងផ្ទុះរបស់ខ្លួន ចូលទៅក្នុងប៉ុស្តិ៍យោធាមួយ នៅភាគពាយព្យប្រទេសប៉ាគីស្ថាន ដោយបានសម្លាប់ទាហាន ៧នាក់។