កងទ័ពអ៊ីស្រាអែល នៅថ្ងៃចន្ទ (ទី១៨ ខែមីនា) នេះ បានបើកប្រតិបត្តិការមួយ ជុំវិញមន្ទីរពេទ្យដ៏ធំបំផុតរបស់ហ្កាហ្សា គឺមន្ទីរពេទ្យ Al-Shifa ដោយមានសាក្សីរាយការណ៍ពីការវាយប្រហារតាមអាកាសលើតំបន់ដែលរងការបំផ្លិចបំផ្លាញ ពោលគឺជាកន្លែងដែលមន្ទីរពេទ្យនេះស្ថិតនៅ។

សេចក្តីថ្លែងការណ៍របស់យោធាបានឲ្យដឹងថា ទាហានអ៊ីស្រាអែល «បច្ចុប្បន្នកំពុងធ្វើប្រតិបត្តិការយ៉ាងប្រយ័ត្នប្រយែង នៅក្នុងតំបន់នៃមន្ទីរពេទ្យ Al-Shifa។ សេចក្ដីថ្លែងការរណ៍បានបន្ថែមថា «ប្រតិបត្តិការនេះត្រូវបានធ្វើឡើងដោយផ្អែកលើព័ត៌មានស៊ើបការណ៍ដែលបង្ហាញពីការប្រើប្រាស់មន្ទីរពេទ្យនេះ ដោយពួកភេរវករជាន់ខ្ពស់ហាម៉ាស»។

សាក្សីនៅទីក្រុងហ្កាហ្សាបានប្រាប់សារព័ត៌មាន AFP ថា ពួកគេបានឃើញរថក្រោះព័ទ្ធជុំវិញទីតាំងមន្ទីរពេទ្យនេះ។ កាលពីខែវិច្ឆិកា កងទ័ពអ៊ីស្រាអែលក៏បានធ្វើប្រតិបត្តិការ នៅមន្ទីរពេទ្យ Al-Shifa នេះដែរ ដែលបង្កឲ្យមានការតវ៉ាជាអន្តរជាតិ។ បើយោងតាមក្រសួងសុខាភិបាលដែលគ្រប់គ្រងដោយក្រុមហាម៉ាស នៅតំបន់ហ្កាហ្សានេះ បានឲ្យដឹងថា ប្រជាជនប៉ាឡេស្ទីនរាប់ម៉ឺននាក់ដែលភៀសខ្លួនដោយសារសង្រ្គាម បានស្វែងរកទីជម្រកនៅក្នុងបរិវេណនៃមន្ទីរពេទ្យនេះ។

អ៊ីស្រាអែលបានចោទប្រកាន់ក្រុមហាម៉ាសម្តងហើយម្តងទៀតថា ធ្វើប្រតិបត្តិការយោធាចេញពីមន្ទីរពេទ្យ និងមជ្ឈមណ្ឌលវេជ្ជសាស្ត្រផ្សេងទៀត ដែលការអះអាងនេះត្រូវបានក្រុមសកម្មប្រយុទ្ធនេះបដិសេធ។ ការិយាល័យប្រព័ន្ធផ្សព្វផ្សាយរបស់រដ្ឋបាលក្រុមហាម៉ាស នៅតំបន់ហ្កាហ្សា បានថ្កោលទោសប្រតិបត្តិការនេះ ដោយនិយាយថា «ការវាយសង្គ្រុបលើអគារវេជ្ជសាស្ត្រ Al-Shifa ដោយរថក្រោះ យានដ្រូន និងអាវុធយុទ្ធភណ្ឌផ្សេងៗ ហើយនិងការបាញ់ប្រហារនៅខាងក្នុងមន្ទីរពេទ្យនេះ គឺជាឧក្រិដ្ឋកម្មសង្គ្រាម»៕