ពាក់ព័ន្ធនឹងការស្លាប់របស់មេបក្សប្រឆាំងដែលជាប់ពន្ធនាគារលោក Alexei Navalny ប្រធានាធិបតីរុស្ស៊ី លោក Vladimir Putin ដែលនៅមុននេះមិនបាននិយាយដល់ទាល់តែសោះនោះ បានពណ៌នាថា នេះជា «ករណីអកុសល» ហើយលោកបានអះអាងថា លោកបានត្រៀមខ្លួនរួចជាស្រេចហើយ ក្នុងការដោះលែងអ្នកទោសរូបនេះ ជាថ្នូរនឹងអ្នកទោសរុស្ស៊ីដែលត្រូវបានឃុំខ្លួននៅប្រទេសលោកខាងលិច។

នៅឯសន្និសីទសារព័ត៌មានបន្ទាប់ពីការបោះឆ្នោតប្រធានាធិបតីរបស់រុស្ស៊ី លោក Putin បាននិយាយថា «មនុស្សមួយចំនួន» បានប្រាប់លោកនៅមុនការស្លាប់របស់លោក Navalny ថា «មានគំនិតមួយ ដើម្បីផ្លាស់ប្តូរលោក Navalny ជាមួយមនុស្សមួយចំនួនដែលត្រូវបានឃុំខ្លួននៅមណ្ឌលកែប្រែនៅក្នុងប្រទេសលោកខាងលិច»។

លោក Putin បាននិយាយថា៖ «ខ្ញុំបាននិយាយថា ខ្ញុំយល់ព្រម។ ដោយមានលក្ខខណ្ឌមួយ ពោលគឺយើងនឹងដោះដូរគាត់ ប៉ុន្តែត្រូវប្រាកដថា គាត់នឹងមិនត្រឡប់មកវិញទេ។ សុំឲ្យគាត់នៅទីនោះចុះ»។ លោកបានបន្ថែមថា៖ «ប៉ុន្តែរឿងរ៉ាវអកុសលនេះកើតឡើង។ នោះហើយគឺជាជីវិត»។

គួរបញ្ជាក់ថា ការអត្ថាធិប្បាយ ដែលជាការឆ្លើយតបទៅនឹងសំណួររបស់ប្រព័ន្ធផ្សព្វផ្សាយ NBC News គឺជាការនិយាយលើកទី១ ហើយរបស់លោក Putin អំពីការស្លាប់របស់លោក Navalny ក្នុងមន្ទីរឃុំឃាំងនៅតំបន់អាក់ទិក ហើយប្រសិនបើមិនមែនជាលើកដំបូងទេនោះ នេះក៏ជាពេលវេលាដ៏កម្រមួយដែលប្រធានាធិបតីរុស្ស៊ីបានលើកឡើងជាសាធារណៈនូវឈ្មោះរបស់លោក Navalny ដែលបានស្លាប់កាលថ្ងៃទី១៦ ខែកុម្ភៈ៕