បេសកជនពិសេសរបស់អង្គការសហប្រជាជាតិទទួលបន្ទុកប្រទេសស៊ីរីដែលកំពុងបំពេញទស្សនកិច្ច លោក Geir Pedersen កាលពីថ្ងៃអាទិត្យ បានជំរុញឲ្យទីក្រុងដាម៉ាស ដើម្បីចូលរួមកិច្ចពិភាក្សាឡើងវិញដើម្បីកែសម្រួលរដ្ឋធម្មនុញ្ញរបស់ប្រទេសនេះ ដោយព្រមានថា ការសន្ទនានយោបាយ កំពុងដំណើរការ   «ក្នុងទិសដៅខុស»។

សង្រ្គាមនៅប្រទេសស៊ីរីដែលបានចាប់ផ្តើមកាលពី១៣ឆ្នាំមុន ជាមួយនឹងការបង្ក្រាបការតវ៉ាគាំទ្រលទ្ធិប្រជាធិបតេយ្យ បានសម្លាប់មនុស្សជាង ៥០០,000នាក់ ផ្លាស់ទីលំនៅរាប់លាននាក់ និងបំផ្លាញសេដ្ឋកិច្ច ហេដ្ឋារចនាសម្ព័ន្ធ និងឧស្សាហកម្មរបស់ប្រទេស។

លោក Pedersen បាននិងកំពុងព្យាយាមធ្វើឲ្យមានការរីកមច្រើនជាមួយនឹងអ្វីដែលហៅថា គណៈកម្មាធិការធម្មនុញ្ញសម្រាប់ប្រទេសស៊ីរី ដើម្បីសរសេរឡើងវិញ ឬធ្វើវិសោធនកម្មរដ្ឋធម្មនុញ្ញរបស់ប្រទេសដែលហែកហួរដោយសង្រ្គាម ចាប់តាំងពីខែតុលា ឆ្នាំ ២០១៩ ដោយទទួលបានជោគជ័យតិចតួច។

កិច្ចពិភាក្សានៅទីក្រុងហ្សឺណែវ បានផ្អាកនៅឆ្នាំ២០២២ បន្ទាប់ពីសម្ព័ន្ធមិត្តរបស់ទីក្រុងដាម៉ាស គឺទីក្រុងមូស្គូ បានជំទាស់នឹងកិច្ចប្រជុំដែលកំពុងប្រព្រឹត្តទៅនៅប្រទេសស្វ៊ីស ដោយចោទសួរអំពីអព្យាក្រឹតភាពរបស់ខ្លួន បន្ទាប់ពីខ្លួន បានដាក់ទណ្ឌកម្មលើរុស្ស៊ីជុំវិញសង្រ្គាមនៅអ៊ុយក្រែន។

លោក Pedersen បានប្រាប់អ្នកយកព័ត៌មាននៅទីក្រុងដាម៉ាសថា៖«ស្ថានភាពនៅក្នុងប្រទេសស៊ីរីឥឡូវនេះ គឺពិបាកខ្លាំងណាស់ ហើយខ្ញុំគិតថា កម្លាំងជំរុញទាំងអស់ កំពុងចង្អុលទៅទិសដៅខុស នៅពេលនិយាយអំពីសន្តិសុខ ដំណើរការសេដ្ឋកិច្ច និងនយោបាយ»។