យោធាអ៊ីស្រាអែល បាននិយាយនៅថ្ងៃច័ន្ទនេះថា កងទ័ពរបស់ខ្លួន បានវាយឆ្មក់បរិវេណមន្ទីរពេទ្យ អាល់ស៊ីហ្វា (Al-Shifa) ក្នុងតំបន់ហ្កាហ្សានៅក្នុងប្រតិបត្ដិការមួយ ដែលអាជ្ញាធរសុខាភិបាលប៉ាឡេស្ទីន និយាយថា បានបណ្តាលឲ្យមនុស្សស្លាប់និងរបួសច្រើននាក់ និងបានបង្កឲ្យមានភ្លើងឆេះយ៉ាងសន្ធោរសន្ធៅ នៅក្នុងអគារមួយក្នុងចំណោមអគារជាច្រើនទៀត។

យោធាបាននិយាយថា ក្រុមទាហានបានធ្វើប្រតិបត្ដិការដ៏ជាក់លាក់ និងមានការបាញ់កាំភ្លើងតបនៅពេលដែលពួកគេបានចូលក្នុងបរិវេណអគារមន្ទីរពេទ្យ។ សេចក្ដីថ្លែងការណ៍ពីយោ បាននិយាយថា ប្រតិបត្ដិការ នេះត្រូវបានធ្វើឡើង ដោយផ្អែកទៅលើព័ត៌មានស៊ើបការដែលបានបង្ហាញថា មន្ទីរពេទ្យនោះ ត្រូវបានប្រើប្រាស់ដោយក្រុមមេដឹកនាំជាន់ខ្ពស់ហាម៉ាស។

មន្ទីរពេទ្យក្នុងក្រុងហ្កាហ្សា គឺជាកន្លែងមួយក្នុងចំណោមកន្លែងមួយចំនួនដែលនៅសេសសល់បានរួចផុតពីការឡោមព័ទ្ធ ហើយយោធាអ៊ីស្រាអែល បានចោទប្រកាន់ជាយូរមកហើយថា ក្រុមចលនាហាម៉ាសអ៊ីស្លាមនិយម កំពុងប្រើប្រាស់វាជាមូលដ្ឋានមួយសម្រាប់ពួកសកម្មប្រយុទ្ធ។

ក្រុមមន្រ្ដីហាម៉ាស និងក្រុមមន្រ្ដីមន្ទីរពេទ្យ បានបដិសេធន៍ការចោទនោះ ហើយមន្ទីរពេទ្យនៅតែជាចំណុចកណ្ដាលនៃការចោទប្រកាន់ពីឧក្រិដ្ឋកម្មសង្រ្គាមទៅលើភាគីទាំងសងខាង ដោយភាគីប៉ាឡេស្ទីន បានចោទអ៊ីស្រាអែលថា កំពុងវយប្រហារមន្ទីរពេទ្យ ហើយអ៊ីស្រាអែលនិយាយថា ភាគីម្ខាងទៀត កំពុងប្រើប្រាស់ធ្វើជាជម្រកសម្រាប់ក្រុមសកម្មប្រយុទ្ធប្រដាប់អាវុធ៕