ក្នុងពេលដែលយុទ្ធនាការរបស់សហរដ្ឋអាមេរិក ដើម្បីផ្ដាច់បណ្ដាញសង្គម TikTok ចេញពីក្រុមហ៊ុនមេរបស់ចិន កំពុងឆ្ពោះទៅកាន់ព្រឹទ្ធសភា អ្នកវិភាគនិយាយថា ការឆ្លើយតបរបស់ទីក្រុងប៉េកាំង ចំពោះការបង្ខំឲ្យលក់កម្មវិធី ឬអេប និងដំណើរការនៃ «រូបមន្តពិសេស» របស់បណ្ដាញសង្គមនេះ នឹងមានភាពច្បាស់លាស់ណាស់ នោះគឺថា មិនលូកដៃចូល។

នៅក្រោមច្បាប់ថ្មីដែលទទួលបានអនុម័តពីសភាតំណាងរាស្ត្រ កាលពីសប្តាហ៍មុន បណ្ដាញសង្គម TikTok អាចត្រូវបានហាមឃាត់នៅសហរដ្ឋអាមេរិក ប្រសិនបើបណ្ដាញសង្គមនេះមិនកាត់ផ្តាច់ទំនាក់ទំនងទាំងអស់ជាមួយក្រុមហ៊ុនបច្ចេកវិទ្យាយក្សរបស់ចិន គឺក្រុមហ៊ុន ByteDance។

ប៉ុន្តែនៅក្នុងសមរភូមិលើអនាគតរបស់ TikTok នៅសហរដ្ឋអាមេរិក អ្វីដែលមនុស្សជាច្រើនមើលឃើញពីការលេចឡើងនូវភាពផ្ទុយគ្នា នោះគឺខណៈពេលដែលក្រុមហ៊ុនព្យាយាមបញ្ចុះបញ្ចូលសភាអំពីឯករាជ្យភាពរបស់ខ្លួនពីទីក្រុងប៉េកាំង ប្រទេសចិនឯណោះវិញបានចេញមុខការពារក្រុមហ៊ុន។

ក្រុមអ្នកវិភាគបាននិយាយថា ទីក្រុងប៉េកាំងមិនចង់បានគំរូមួយ ដែលត្រូវបានកំណត់ឡើង ដើម្បីឲ្យក្រុមហ៊ុនចិនលក់ទ្រព្យសម្បត្តិដ៏មានតម្លៃបំផុតរបស់ខ្លួននោះឡើយ ក្នុងនោះរួមទាំងដំណើរការនៃកម្មវិធីដែលដៃគូប្រកួតប្រជែងជាច្រើនច្រណែនផងដែរ។

លោក Mei Xinyu សេដ្ឋវិទូដែលមានមូលដ្ឋាននៅទីក្រុងប៉េកាំងបានប្រាប់សារព័ត៌មាន AFP ថា៖ «ការគំរាមកំហែងបែបនេះ គឺដូចជាការប្លន់ទាំងពេលថ្ងៃ។ អ្វីៗទាំងអស់ត្រូវបានពិចារណា សកម្មភាពរបស់រដ្ឋាភិបាលចិន រហូតមកដល់ពេលនេះ មានភាពស្លូតបូតណាស់។ អ្វីដែលរដ្ឋាភិបាលសហរដ្ឋអាមេរិកកំពុងតែស្នើឡើង គឺជាវិធីដែលទៅហួសពីព្រំដែនកំណត់»។

សមាជិកសភា និងទីភ្នាក់ងារសន្តិសុខអាមេរិក និយាយថា TikTok បង្ហាញពីការគំរាមកំហែង ពីព្រោះប្រទេសចិនអាចចូលប្រើប្រាស់ និងប្រើប្រាស់ទិន្នន័យដ៏ច្រើនសន្ធឹកសន្ធាប់ដែលកម្មវិធីនេះប្រមូលបាន ដើម្បីគ្រប់គ្រងលើ និងចារកម្ម។ TikTok បានបដិសេធការចោទប្រកាន់នេះ ដោយនិយាយថា ខ្លួនបានចំណាយប្រហែល ១,៥ពាន់លានដុល្លារអាមេរិកលើគម្រោងឈ្មោះ «Project Texas» ដែលទិន្នន័យអ្នកប្រើប្រាស់អាមេរិក នឹងត្រូវបានរក្សាទុកនៅសហរដ្ឋអាមេរិក។ តែយ៉ាងណាក្ដី សមាជិកសភា និងស្ថាប័នជាច្រើន ក្នុងនោះរួមទាំង FBI ផងដែរ នៅតែមិនជឿជាក់នោះឡើយ៕