កីឡារាំ៖ លោកស្រី ហង់ ស៊ីមន អគ្គលេខាធិការសហព័ន្ធកីឡារាំកម្ពុជា បានចាត់ទុកការពន្យារពេលស៊ីហ្គេមឆ្នាំ២០២១ នៅប្រទេសវៀតណាម គឺជាឱកាសល្អដើម្បីពង្រឹងការហ្វឹកហាត់ និងគុណផលកីឡាបន្ថែម បន្ទាប់ពីសហព័ន្ធជាច្រើនបានខកខានការប្រមូលផ្ដុំ ហ្វឹកហាត់ក្នុងបរិបទកូវីដ-១៩ នេះ។
អគ្គលេខាធិការសហព័ន្ធដដែលបានបញ្ជាក់ថា បច្ចុប្បន្នក្រុមជម្រើសជាតិរបស់ខ្លួនកំពុងហ្វឹកហាត់នៅតាមផ្ទះនៅឡើយ ហើយក៏កំពុងរង់ចាំការរៀបចំវិធានការបិទខ្ទប់ហ្វឹកហាត់ របស់ក្រសួងអប់រំ យុវជន និងកីឡា និងគណៈកម្មាធិការជាតិ CAMSOC ផងដែរ។ ដូច្នេះស្របពេលស៊ីហ្គេមឆ្នាំ២០២១ នៅវៀតណាមត្រូវបានពន្យារពេល លោកស្រីបានចាត់ទុកនេះគឺជាឱកាសដ៏ល្អដើម្បីមានពេលវេលាបន្ថែម ក្នុងវិធីសាស្ត្រហ្វឹកហាត់ធ្វើយ៉ាងណាឲ្យមានសមត្ថភាពគ្រប់គ្រាន់ ឆ្ពោះទៅរកការប្រកួត និងដណ្ដើមមេដាយក្នុងកម្រិតណាមួយជូនជាតិ ពីព្រឹត្តិការណ៍ប្រចាំតំបន់នៅវៀតណាម ពិសេសត្រៀមស៊ីហ្គេមឆ្នាំ២០២៣ នៅកម្ពុជា។
គួរបញ្ជាក់ថា ស៊ីហ្គេមឆ្នាំ២០២១ នៅវៀតណាមដែលគ្រោងប្រកួតចាប់ពីថ្ងៃទី២១ ខែវិច្ឆិកាដល់ថ្ងៃទី២ ខែធ្នូចុងឆ្នាំនេះ ត្រូវបានពន្យារពេលទៅចុងខែមេសា និងដើមខែឧសភា ឆ្នាំ២០២២ វិញហើយ បន្ទាប់ពីមានការសម្រេចរបស់ម្ចាស់ផ្ទះវៀតណាម ក្នុងកិច្ចប្រជុំក្រុមប្រឹក្សាកីឡាអាស៊ីអាគ្នេយ៍កាលពីថ្មីៗ។ ព្រឹត្តិការណ៍នេះកម្ពុជាគ្រោងបញ្ជូនអត្តពលិក ៣០ប្រភេទកីឡាចូលរួម ក្នុងនោះក៏មានកីឡារាំផងដែរ ស្របពេលកីឡារាំកម្ពុជាមានកីឡាករ-កីឡាការិនីជម្រើសជាតិ ១០រូបកំពុងហ្វឹកហាត់នាពេលបច្ចុប្បន្ន ដើម្បីត្រៀមចូលរួមស៊ីហ្គេមនៅវៀតណាម៕
អត្ថបទ៖ លី ឈុនឡា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
