កងទ័ពអ៊ីស្រាអែល បានឆ្មក់ចូលបរិវេណមន្ទីរពេទ្យ Al Shifa តំបន់ហ្កាហ្សា កាលពីថ្ងៃចន្ទ ដោយបានសម្លាប់ខ្មាន់កាំភ្លើងជាង ២០នាក់ ក្នុងប្រតិបត្តិការមួយ ដែលអាជ្ញាធរសុខាភិបាលប៉ាឡេស្ទីន និយាយថា បានបណ្តាលឲ្យមានអ្នកស្លាប់និងរងរបួសជាច្រើននាក់ និងបានបង្កអគ្គិភ័យឆាបឆេះអគារមួយកន្លែងក្នុងចំណោមអគារជាច្រើន។

យោធានិយាយថា កងកម្លាំងពិសេស ដែលគាំទ្រដោយកងទ័ពជើងគោក និងរថក្រោះ បានធ្វើប្រតិបត្តិការច្បាស់លាស់ ដោយផ្អែកលើការស៊ើបការណ៍សម្ងាត់ថា មន្ទីរពេទ្យនេះ កំពុងត្រូវបានប្រើប្រាស់ជាថ្មីម្តងទៀត ដោយមេដឹកនាំក្រុមហាម៉ាស។

អ្នកនាំពាក្យ លោក Daniel Hagari បាននិយាយថា យើងបានចាប់ខ្លួនជនសង្ស័យភេរវករជាង ២០០ នាក់ ដែលពេលនេះកំពុងត្រូវបានសួរចម្លើយ។ យើងបានសម្លាប់ភេរវករជាង ២០ នាក់នៅក្នុងបរិវេណមន្ទីរពេទ្យនេះ។

លោក Hagari និយាយថា ទាហានអ៊ីស្រាអែលម្នាក់ត្រូវបានសម្លាប់ក្នុងការប្រយុទ្ធគ្នា ហើយក្រុមហាម៉ាស់ បានព្យាយាមបង្កើតមូលដ្ឋានរបស់ខ្លួនឡើងវិញនៅក្នុងមន្ទីរពេទ្យនេះ ដោយប្រើប្រាស់មន្ទីរពេទ្យជាទីលាក់ខ្លួនសម្រាប់ក្រុមភេរវករ។

មន្ទីរពេទ្យ Al Shifa ជាមន្ទីរពេទ្យធំបំផុតនៅតំបន់ហ្កាហ្សា នៅមុនពេលសង្រ្គាម ហើយបច្ចុប្បន្ននេះ គឺជាកន្លែងថែទាំសុខភាពតែមួយគត់ដែលនៅតែដំណើរការ ទោះបីជានៅមានប្រតិបត្តិការដោយផ្នែកក៏ដោយ នៅភាគខាងជើងនៃដែនដីនេះ ហើយក៏ជាកន្លែងស្នាក់នៅរបស់ជនស៊ីវិលរាប់រយនាក់ដែលបានភៀសខ្លួន។

យោធាបាននិយាយថា កងទ័ពត្រូវបានណែនាំអំពីសារៈសំខាន់នៃប្រតិបត្តិការដោយប្រុងប្រយ័ត្ន ព្រមទាំងវិធានការនានាដែលត្រូវអនុវត្ត ដើម្បីបញ្ចៀសគ្រោះថ្នាក់ដល់អ្នកជំងឺ ជនស៊ីវិល បុគ្គលិកពេទ្យ និងឧបករណ៍ពេទ្យ និងបាននិយាយថា អ្នកជំងឺមិនត្រូវបានតម្រូវឱ្យជម្លៀសខ្លួនចេញនោះទេ។

ក្រុមហាម៉ាស់ បាននិយាយនៅក្នុងសេចក្តីថ្លែងការណ៍ថា យោធាអ៊ីស្រាអែល បានប្រព្រឹត្តឧក្រិដ្ឋកម្ម ថ្មីមួយ ដាក់គោលដៅដោយផ្ទាល់ទៅលើអគារមន្ទីរពេទ្យ ដោយមិនយកចិត្តទុកដាក់ចំពោះអ្នកជំងឺ បុគ្គលិកពេទ្យ ឬអ្នកភៀសខ្លួននៅទីនោះឡើយ។