ឯកឧត្តម ឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ នៅរសៀលថ្ងៃទី១៨ ខែមីនា ឆ្នាំ២០២៤នេះ បានអនុញ្ញាតក្រុមហ៊ុន CSNC Agriculture Co.,Ltd ចូលជួប​សម្តែង​ការ​គួរសម និងពិភាក្សាការងារមួយចំនួនពាក់ព័ន្ធផែនការវិនិយោគក្នុងវិស័យកសិកម្ម។

ក្រសួងកសិកម្ម រុក្ខាប្រមាញ់ និងនេសាទ បានឲ្យដឹងថា នៅក្នុងជំនួបនេះ ឯកឧត្តមរដ្ឋមន្ត្រី បាន​សម្តែង​នូវ​ការស្វាគមន៍ ចំពោះការស្វែងរកការគាំទ្រពីក្រសួងកសិកម្ម លើការវិនិ​យោគ​លើ​វិស័យ​កសិកម្ម​នៅ​កម្ពុជា។ ជាមួយគ្នានេះ ឯកឧត្តម បានគូសបញ្ជាក់ថា ដើម្បីឱ្យការវិនិយោគ​ទទួល​បាន​ជោគជ័យ និងមាននិរន្តរភាព ក្រុមហ៊ុនចាំបាច់ត្រូវមានផែនការវិនិយោគច្បាស់លាស់ និងមាន​ការ​សហការ​ល្អ​ជាមួយរដ្ឋាភិបាល ដើម្បីឱ្យដំណើរវិនិយោគស្របតាមគោលនយោបាយជាតិ និង​ទទួល​បាន​ការគាំទ្រវិនិយោគ និងការសម្របសម្រួលផ្សេងៗទៀតពីក្រសួង។

ឯកឧត្តមរដ្ឋមន្ត្រី បានបញ្ជាក់បន្ថែមថា ក្រុមហ៊ុន​ត្រូវ​ពិនិត្យ​លទ្ធភាព​ក្នុង​ការ​សហការ​ជាមួយ​សហគមន៍​កសិកម្មទំនើប ដែលមានសមត្ថភាពក្នុងការផលិតទ្រង់ទ្រាយធំ ប្រកបដោយ​គុណ​ភាព​សម្រាប់​នាំ​ចេញ ការកាត់បន្ថយថ្លៃដើមផលិត មានតម្លៃបន្ថែមខ្ពស់ មានខ្សែច្រវាក់ផលិតកម្មល្អ ផ្តល់​ចំណេញ មានប្រសិទ្ធភាពសេដ្ឋកិច្ចពិតប្រាកដ។ ទន្ទឹមនឹងនេះដែរ ក្រុមហ៊ុន អាច​ពិនិត្យ​លទ្ធភាព​ក្នុង​ការផ្តល់កញ្ចីដែលមានអត្រាការប្រាក់ទាប ដែលកសិករមានលទ្ធភាពសងត្រឡប់ និង​ទទួលបានផលចំណេញ។

សូមជម្រាបជូនថា ក្រុមហ៊ុនមានផែនការវិនិយោគជាច្រើនដូចជាស្វាយចន្ទី ស្វាយ ធុរេន និង​សំបុក​ត្រចៀកកាំ ហើយការចាប់ផ្តើមដំបូងនេះ គឺផ្តោតលើស្វាយចន្ទី៕ អត្ថបទ ឈិត បូរ៉ាវី