ក្រសួងសុខាភិបាល បានរៀបចំឱ្យមានក្រុមការងារឆ្លើយតបបន្ទាន់ និងទប់ស្កាត់នឹងជំងឺឆ្លង ដូច​ជា​ជំងឺ​ផ្តាសាយបក្សី (H5N1) ជំងឺអុតស្វា (Mpox) និងជំងឺរាតត្បាតដោយការពុលផ្សេងៗទៀត តាម​រយៈប្រព័ន្ធឆ្លើយតបបន្ទាន់ទាន់ពេលវេលា និងមាននៅទូទាំងរាជធានី-ខេត្ត។ នេះ​បើ​តាម​ការ​បញ្ជាក់​របស់ឯកឧត្តមសាស្ត្រាចារ្យ ឈាង រ៉ា រដ្ឋមន្ត្រីក្រសួងសុខាភិបាល ថ្លែងក្នុងសន្និសីទ​សារ​ព័ត៌មា​ន​ ស្ដីពី​សន្និបាតសុខាភិបាលលើកទី៤៣ កាលពីរសៀលថ្ងៃទី១៨ ខែមីនា ឆ្នាំ​២០២៤។

ឯកឧត្តមសាស្ត្រាចារ្យ ឈាង រ៉ា បន្តថា ជាការពិតប្រព័ន្ធរបាយការណ៍រហ័សទាន់ពេលវេលា នៅ​តែ​ដំណើរ​ការ​ជាបន្តបន្ទាប់ ប្រព័ន្ធទទួលទូរស័ព្ទក្នុងកិច្ចការបន្ទាន់ ក្រសួង​សុខាភិបាល​បាន​រៀប​ចំ​ដំណើរ​ការ​។ ដូច្នេះកន្លងមកជាលទ្ធផលជំងឺផ្តាសាយបក្សី (H5N1)កី្ត ជំងឺអុតស្វា (Mpox)ក្តី ក៏​ដូច​ជា​ការពុលចំណីអាហារផ្សេងៗ ព័ត៌មាននេះត្រូវបានបញ្ជូនមកក្រសួងសុខាភិបាលបន្ទាន់ ហើយ​ក្រុម​ការងារដែលមានតាមបណ្តារាជធានី-ខេត្ត ក៏បានធ្វើ​សកម្មភាព​គួប​ផ្សំ​ជាមួយ​នឹង​ក្រុម​ជំនាញ​ពី​ថ្នាក់កណ្តាលបានចុះទៅទាន់ពេលវេលាទាំងថ្ងៃទាំងយប់។

សូមបញ្ជាក់ថា ការបង្ការ និងគ្រប់គ្រងជំងឺឆ្លងដែលលេចឡើង និងលេចឡើងសារជាថ្មី ក្នុង​ឆ្នាំ​២០២៣​នៅ​កម្ពុជា គឺបានរកឃើញ ជំងឺផ្តាសាយបក្សីវិជ្ជមាននៅកម្ពុជាចំនួន ៦ ករណីលើមនុស្ស ក្នុង​នោះមាន ស្រី ៤ករណី ហើយជំងឺអុតស្វារកឃើញចំនួន ២ ករណីមនុស្ស (ប្រុស២ករណី) និង​ជំងឺហ្ស៊ីកាចំនួន ១ ករណីមនុស្ស (ស្រី១ករណី)។

ក្រោយ​រក​ឃើញជំងឺទាំងនេះ ក្រសួងសុខាភិបាល​បាន​ធ្វើ​ការ​អន្តរាគមន៍​ចាំ​បាច់​មួយ​ចំនួន​ត្រូវ​បាន​អនុវត្ត​ដើម្បី​ទប់ស្កាត់ និងគ្រប់គ្រងការឆ្លងរាតត្បាតរួមមាន ផ្សព្វផ្សាយសារ​ទាក់​ទង​ហានិភ័យ នៃ​ជំងឺ​អុតស្វា ដល់ក្រុមគោលដៅ ជាពិសេសបុរសរួមភេទជាមួយបុរស។ ការបោះពុម្ព និងចែក​ចាយ​សម្ភារៈ​អប់រំ​បង្ការការឆ្លងជំងឺដល់សហគមន៍គោលដៅ ព្រមទាំង​ចេញ​សេចក្តី​ជូន​ដំណឹង​តាម​បណ្តាញ​សង្គម ទូរទស្សន៍ និងវិទ្យុ និងការចុះអប់រំផ្ទាល់ផងដែរ៕ អត្ថបទ៖ រដ្ឋា