លោកស្រី ផេថងថាន ស៊ីណាវ៉ាត្រ(Paetongtarn Shinawatra) ដែល​ជាកូនស្រី​របស់​លោក​ថា​ក់ស៊ីន ស៊ីណាវ៉ាត្រ អតីតនាយករដ្ឋមន្រ្តីថៃ និងជាប្រធានគណបក្សភឿថៃ បានសរសេ​រ​នៅ​លើ​ក្រាំង​មាស ក្នុងវិមានឈ្នះ ឈ្នះថា «ប្រវត្តិសាស្រ្តបានបង្រៀនយើងថា សន្តិភាពនាំមកនូវសន្តិសុខ និង​ភាពរុងរឿងជូនទៅដល់ប្រជាជន»។

សំណេររបស់លោកស្រីផេថងថាន ស៊ីណាវ៉ាត្រនេះ គឺបានធ្វើឡើងនៅក្នុងដំណើរទស្សនា វិមាន ឈ្នះ ឈ្នះ នាព្រឹកថ្ងៃទី១៩ ខែមីនា ឆ្នាំ២០២៤នេះ ខណៈ​ដំណើរ​ទស្សនកិច្ច​​ជា​ប្រវត្តិ​សាស្រ្ត​នេះ ត្រូវបានទទួលស្វាគមន៍ដោយឯកឧត្ដម ឧបនាយករដ្ឋមន្ត្រី រដ្ឋមន្ត្រីក្រសួងមុខងារសាធារណៈ និង​ក្រុមការងារសាងសង់វិមានឈ្នះ ឈ្នះ ផងដែរ។

ក្នុងគោលបំណងដែលលោកស្រីចំណាយពេលប្រហែលមួយម៉ោង ទស្សនានៅវិមានឈ្នះ ឈ្នះ​នេះ គឺដើម្បីស្វែងយល់ឱ្យកាន់តែស៊ីជម្រៅបន្ថែមទៀត លើប្រវត្តិសាស្ត្រថ្មីៗរបស់កម្ពុជា ជា​ពិសេស​លើ​នយោបាយឈ្នះ ឈ្នះ របស់សម្តេចតេជោ ហ៊ុន សែន អតីតនាយករដ្ឋមន្រ្តីនៃកម្ពុជា ដែល​បាន​នាំ​ឲ្យ​ប្រទេសកម្ពុជាបញ្ចប់សង្រ្គាមស៊ីវិលទាំងស្រុងរបស់ខ្លួនចាប់តាំងពីថ្ងៃទី២៩ ខែធ្នូឆ្នាំ​១៩៩៨មក​រហូតដល់សព្វថ្ងៃនេះ៕ អត្ថបទ៖ បាន ចក់