នៅសល់ពេលវេលាប្រមាណ២៥ថ្ងៃទៀត ពិធីបុណ្យចូលឆ្នាំថ្មីប្រពៃណីជាតិខ្មែរ នឹងឈានចូលមកដល់ ខណៈនៅថ្ងៃទី១៩ ខែមីនានេះមានមូលដ្ឋានអាជីវកម្មទេសចរណ៍ និងរមណីយដ្ឋានទេសចរណ៍មួយចំនួននៅរាជធានីភ្នំពេញបានចាប់ផ្តើមរៀបចំតុបតែងជាបណ្តើរៗ ដើម្បីត្រៀមរៀបចំកម្មវិធីកម្សាន្តសប្បាយ អបអរសាទរពិធីបុណ្យចូលឆ្នាំថ្មីប្រពៃណីជាតិខ្មែរដែលនឹងឈានចូលមកដល់នៅថ្ងៃទី១៣ខែមេសាខាងមុខ។
លោកស្រី ណម ណារីន ប្រធានស្តីទីមន្ទីរវប្បធម៌ និងវិចិត្រសិល្បៈ រាជធានីភ្នំពេញ ថ្លែងប្រាប់ BTV នៅព្រឹកថ្ងៃទី១៩ខែមីនានេះថា សម្រាប់គោលដៅរមណីយដ្ឋានទេសចរណ៍ វប្បធម៌ និងប្រវត្តិសាស្រ្តវត្តភ្នំ ដែលជារៀងរាល់ឆ្នាំមានពលរដ្ឋ ភ្ញៀវទេសចរជាតិអន្តរជាតិមកដើរលេងកម្សាន្តសប្បាយច្រើនជាងគេនោះ នៅពេលនេះបានចាប់ផ្តើមរៀបចំជាបណ្តើរៗហើយ។ ក្នុងនោះមានការតុបតែងលម្អបរិវេណភ្លើងពណ៌ សម្អាតបរិស្ថានកន្លែងដើរកម្សានសប្បាយ លើកស្លាក ស្តង់តាំងពិព័រណ៍ផ្សេងៗ ដែលមានលក្ខណៈជាប្រពៃណី វប្បធម៌ខ្មែរ ដើម្បីត្រៀមធ្វើកម្មវិធីសម្តែងល្ខោន សិល្បៈ ប្រគុំតន្ត្រី លេងល្បែងប្រជាប្រិយខ្មែរជាដើម។
ចំណែកប្រធានមន្ទីរទេសចរណ៍រាជធានីភ្នំពេញ លោក ម៉ម វាសនា បានឱ្យដឹងថា បច្ចុប្បន្នមន្ទីរបាន និងកំពុងផ្សព្វផ្សាយជំរុញឲ្យអាជីវកម្មទេសចរណ៍នានា ដូចជាសណ្ឋាគារ ផ្ទះសំណាក ភោជនីយដ្ឋាន រមណីយដ្ឋានទេសចរណ៍នានារៀបចំសម្អាតបរិស្ថាន តុបតែងភ្លើងពណ៌លម្អមូលដ្ឋានអាជីវកម្មរបស់ខ្លួន និងរៀបចំសន្តិសុខ សណ្តាប់ធ្នាប់ ការពារសុខសុវត្ថិភាពជូនភ្ញៀវទេសចរជាតិ អន្តជាតិ ដើម្បីបង្កលក្ខណៈសប្បាយរីករាយនៅថ្ងៃបុណ្យចូលឆ្នាំថ្មីប្រពៃណីជាតិខ្មែរខាងមុខ។
សូមបញ្ជាក់ថា នៅថ្ងៃទី១៨ ខែមីនា ឆ្នាំ២០២៤ម្សិលមិញនេះ រដ្ឋបាលសាលារាជធានីភ្នំពេញ បានចេញសេចក្តីណែនាំឲ្យគ្រប់មូលដ្ឋានអាជីវកម្មនានា និងមន្ទីរអង្គភាពជំនាញនៅក្រោមឱវាទទាំងអស់ រៀបចំបុណ្យចូលឆ្នាំថ្មីប្រពៃណីជាតិខ្មែរ ឆ្នាំរោង ព.ស ២៥៦៨ ឲ្យបានល្អប្រសើរ ដើម្បីញ៉ាំងឲ្យពិធីបុណ្យចូលឆ្នាំថ្មីប្រពៃណីជាតិខ្មែរ មានភាពអធឹកអធម សប្បាយរីករាយ រក្សាបាននូវប្រពៃណីទំនៀមទម្លាប់ និងមានសន្តិសុខ សណ្តាប់ធ្នាប់ល្អប្រសើរ ទាក់ទាញទេសចរជាតិ អន្តរជាតិមកទស្សនាកម្សាន្តឱ្យបានច្រើន៕ អត្ថបទ ស៊ុម សុខជា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
