ភ្នំពេញ÷ ក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ កំពុងបន្តពង្រឹងសមត្ថភាពអង្គភាពថវិកាថ្មី ដើម្បីប្រែក្លាយទៅជាអង្គភាព ថវិកាអាណាប័កផ្ទេរសិទ្ធិពេញលេញនៅចុងឆ្នាំនេះ ដើម្បីធានាផ្តល់ស្វ័យភាពគ្រប់គ្រាន់ លើការងារដឹកនាំអង្គភាព ទាំងធនធានមនុស្ស និងហិរញ្ញវត្ថុ។

ឯកឧត្តម ហែម វណ្ណឌី រដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ លើកឡើងនៅក្នុងពិធីបើកសិក្ខា សាលាស្តីពី «នីតិវិធីរៀបចំ និងអនុវត្តថវិកាសមិទ្ធកម្ម និងកិច្ចព្រមព្រៀងសមិទ្ធកម្ម» នៅថ្ងៃទី១៩ ខែមីនា ឆ្នាំ ២០២៤ នេះថា សម្រាប់ គោលបំណងផ្សព្វផ្សាយទូលំទូលាយនេះ សំដៅបង្កើនការយល់ដឹង, ការគាំទ្រ និងការចូលរួមចំណែកយ៉ាងសកម្ម ពីគ្រប់អង្គភាពថវិកា ក្រោមឱវាទរបស់ក្រសួង ដើម្បីសម្រេចបានការរៀបចំផែនការយុទ្ធសាស្ត្រថវិកា ការរៀបចំផែនការថវិកា ការអនុវត្តថវិកាសមិទ្ធកម្ម និង ការរៀបចំកិច្ចព្រមព្រៀងសមិទ្ធកម្ម ឱ្យស្របតាមគោលការណ៍នៃថវិកាសមិទ្ធកម្មជាធរមាន។

ឯកឧត្តម បន្តថា នេះជាលើកទី២ហើយ ដែលក្រសួងបានរៀបចំសិក្ខាសាលាពាក់ព័ន្ធ នឹងកម្មវិធីកែទម្រង់ការគ្រប់គ្រង ហិរញ្ញវត្ថុសាធារណៈ ដែលជាគោលនយោបាយប្រែក្លាយប្រព័ន្ធហិរញ្ញវត្ថុសាធារណៈកម្ពុជា ឆ្ពោះទៅកាន់ប្រព័ន្ធហិរញ្ញវត្ថុសាធារណៈ ផ្ដោតលើលទ្ធផល ឬសមិទ្ធកម្ម និងវិមជ្ឈការ ស្របតាមស្ដង់ដារ និងឧត្តមានុវត្តន៍អន្តរជាតិ។ ក្នុងដំណាក់កាលទី៤ (២០២៣-២០២៧) នៃកម្មវិធីកែទម្រង់ការគ្រប់គ្រងហិរញ្ញវត្ថុសាធារណៈនេះ   រាជរដ្ឋាភិបាលបានផ្ទេរសិទ្ធិអំណាច ភាពជាម្ចាស់ និងការទទួល ខុសត្រូវកាន់តែច្រើនទ្បើងដល់ក្រសួង-ស្ថាប័ន ហើយក្រសួង-ស្ថាប័នត្រូវផ្ទេរបន្តដល់អង្គភាពក្រោមឱ្យវាទ ក្នុងការរៀបចំ និងការអនុវត្ត ថវិកាកម្មវិធីពេញលេញ និងអង្គភាពថវិកា។

ឯកឧត្តម ហែម វណ្ណឌី បានគូសរំលេចថា កម្មវិធីកែទម្រង់ការគ្រប់គ្រងហិរញ្ញវត្ថុសាធារណៈ បានឈានដំណាក់កាលទី៤ «គណនេយ្យភាពសមិទ្ធកម្ម» ដែលជាដំណាក់កាលចុងក្រោយរបស់ខ្លួន ដោយសម្រួចទិស និងតម្រង់គោលដៅឆ្ពោះទៅរក «សមិទ្ធកម្ម ឬលទ្ធផល» ។ ដោយឡែក ក្រសួងឧស្សាហកម្ម វិទ្យាសាស្ត្រ បច្ចេកវិទ្យា ដើម្បីធានាអនុវត្តគោលដៅនេះ ឱ្យបានជោគ ជ័យ ក្រសួងនឹងប្រែក្លាយអង្គភាពថវិកាទាំងអស់ ទៅជាអង្គភាពថវិកាអាណាប័កផ្ទេរសិទ្ធិពេញលេញនៅក្នុងរង្វង់ត្រីមាសទី ៣ ឆ្នាំ ២០២៤ នេះផងដែរ ។ ដើម្បីអនុវត្តការងារទទួលបានជោគជ័យ ទាមទារឱ្យមានការអភិវឌ្ឍសមត្ថភាព និងជំនាញរបស់មន្ត្រីក្នុង ក្រសួង ក្នុងការអនុវត្តសូចនាករគន្លឹះសំខាន់ សម្រាប់កំណត់លទ្ធផលការងារ ក្នុងនោះតាមបទពិសោធន៍នាពេលកន្លងមក ការរៀបចំ ថវិកា, ការអនុវត្តថវិកា, ការងារលទ្ធកម្មសាធារណៈ និងកិច្ចបញ្ជិការជ្ជទេយ្យបុរេប្រទានរបស់ក្រសួង បើពិនិត្យជារួមនៅមានតម្រូវការ ក្នុងការកែលម្អបន្ថែម ដើម្បីឆ្លើយតបទៅនឹងគោលបំណងនៃផែនការសកម្មភាព ដែលបានដាក់ចេញឱ្យបានគ្រប់ជ្រុងជ្រោយ និងទទួល បានលទ្ធផលតាមការរំពឹងទុកប្រកបដោយប្រសិទ្ធិភាព និងប្រសិទ្ធិផលខ្ពស់៕

អតបទ៖ សុន រ៉ាឌី