ភ្នំពេញ ៖ ឧត្តមមន្ត្រីឌីជីថលអាស៊ាន ដែលជាក្រុមការងារមកពីបណ្ដាប្រទេសអាស៊ានបានបើកកិច្ចប្រជុំលើកទី១ ស្ដីពី ការប្រយុទ្ធប្រឆាំងការឆបោកតាមអនឡាញ ដែលកិច្ចប្រជុំនេះគឺកម្ពុជាធ្វើជាម្ចាស់ផ្ទះ និងថៃធ្វើជាប្រធាន។

ឧត្តមមន្ត្រីឌីជីថលអាស៊ានបានបើកកិច្ចប្រជុំលើកទី១នៃក្រុមការងារអាស៊ាន ស្តីពី ការប្រយុទ្ធប្រឆាំងការឆបោកតាមអនឡាញ “THE 1st ASEAN WORKING GROUP ON ANTI-ONLINE SCAM MEETING” នាថ្ងៃទី១៩ ខែមីនា ឆ្នាំ២០២៤ នៅសណ្ឋាគារភ្នំពេញ ដែលកម្ពុជាធ្វើជាម្ចាស់ផ្ទះ និងដឹកនាំជាប្រធានកិច្ចប្រជុំដោយឧត្តមមន្ត្រីឌីជីថលមកពីប្រទេសថៃ។ កិច្ចប្រជុំនេះមានការអញ្ជើញចូលរួមពីឧត្តមមន្ត្រីឌីជីថលអាស៊ាន(ADGSOM) អមដោយប្រតិភូនៃបណ្តាប្រទេសជាសមាជិក ប្រធានមជ្ឈមណ្ឌលបច្ចេកវិទ្យានិងព័ត៌មានអាស៊ាន (Asean ICT Centre) និងតំណាងលេខាធិការដ្ឋានអាស៊ាន ។

ឯកឧត្តម កែវ សុទ្ធិ រដ្ឋលេខាធិការ ក្រសួងប្រៃសណីយ៍និងទូរគមនាគមន៍បានឱ្យដឹងថា កិច្ចប្រជុំនេះគឺកម្ពុជាធ្វើជាម្ចាស់ផ្ទះ ហើយថ្ងៃនេះគឺជាប្រកាសសម្ពោធក្រុមការងារស្ដីពីអាស៊ាន ដែលប្រយុទ្ធប្រឆាំងនឹងការឆបោកតាមប្រព័ន្ធអ៊ិនធឺណែត។ កិច្ចប្រជុំនេះប្រធានគឺដឹកនាំដោយឧត្តមមន្ត្រីមកពីប្រទេសថៃ ដែលស្របតាមស្មារតីកិច្ចប្រជុំរដ្ឋមន្ត្រីឌីជីថលអាស៊ាន នៅសាំងហ្គាពួរ ស្របតាមស្មារតីកិច្ចប្រជុំនោះ គឺក្រុមការងារនេះបានសម្ពោធ និងបើកកិច្ចប្រជុំលើកដំបូងរបស់ខ្លួននៅកម្ពុជា ក្នុងខណៈដែលកម្ពុជាធ្វើជាម្ចាស់ផ្ទះកិច្ចប្រជុំក្រៅផ្លូវការថ្នាក់ឧត្ដមមន្ត្រីឌីជីថល។ 

ឯកឧត្តម កែវ សុទ្ធិ បន្ថែមថា ខ្លឹមសារសំខាន់នៃកិច្ចប្រជុំនេះគឺបានផ្លាស់ប្ដូរយោបល់ពីក្នុងក្របខណ្ឌលិខិតគតិយុត្ត ក៏ដូចជាវិធានការសំខាន់ៗក្នុងការប្រយុទ្ធប្រឆាំងការឆបោកតាមប្រព័ន្ធអ៊ិនធឺណែតពីបណ្ដាប្រទេសសមាជិកអាស៊ានទាំងអស់ លើកលែងតែវៀតណាមដែលមិនបានអញ្ជើញមកផ្ទាល់ ដោយធ្វើតាមប្រព័ន្ធអនឡាញ។ វិធានការការពារដោយច្បាប់ហើយនឹងការដាក់ចេញនូវគោលនយោបាយ និងសកម្មភាពសំខាន់ៗក្នុងការប្រយុទ្ធប្រឆាំងនេះ គឺប្រទេសទាំង១០ បានធ្វើរបាយការណ៍រៀងៗខ្លួន អំពីវិធានការ ក៏ដូចជាសមិទ្ធផល ចែករំលែកបទពិសោធន៍ ព័ត៌មាន និងឧត្ដមនវានុវត្តក្នុងការប្រយុទ្ធប្រឆាំងការឆបោកតាមប្រព័ន្ធអ៊ិនធឺណែតនេះ។ បន្ទាប់មកអង្គប្រជុំបានកំណត់នឹងជ្រើសរើសមន្ត្រីបង្គោលបណ្ដាប្រទេសរៀងខ្លួន ដើម្បីផ្លាស់ប្ដូរយោបល់គ្នាក្នុងការរៀបចំផែនការសកម្មភាពសម្រាប់អនុវត្តបន្ត។ 

ឯកឧត្តមរដ្ឋលេខាធិការ បន្ថែមទៀតថា ក្រុមការងារនឹងធ្វើការតាមប្រព័ន្ធអនឡាញថែមទៀត ដើម្បីកសាងផែនការ និងចុងក្រោយនឹងយកទៅពិភាក្សាក្នុងកិច្ចប្រជុំលើកក្រោយនៅអាទិត្យទី៣ នៃខែកុម្ភៈ នៅហ្សាកាតា នៅពេលដែលប្រទេសឥណ្ឌូនេស៊ី ដល់វេនធ្វើជាម្ចាស់ផ្ទះកិច្ចប្រជុំក្រៅផ្លូវការនៅឆ្នាំ២០២៥ ដូច្នេះមានពេលមួយឆ្នាំសម្រាប់ក្រុមការងារធ្វើផែនការសកម្មភាពនេះ។

សូមជម្រាបថា ប្រធានកិច្ចប្រជុំក្រុមការងារអាស៊ាន ស្តីពី ការប្រយុទ្ធប្រឆាំងការឆបោកតាមអនឡាញ គឺមានអាណត្តិពីរឆ្នាំ សម្រាប់ឆ្នាំនេះគឺថៃជាប្រធានពីរឆ្នាំ វៀតណាមជាអនុប្រធាន បន្ទាប់មកគឺវៀតណាមជាប្រធានក្នុងអាណត្តិក្រោយ និងបន្តប្ដូរវេនគ្នាតាមលំដាប់អក្សរនៃបណ្ដាប្រទេសអាស៊ាន៕ ​

អត្ថបទ ៖ ប្រាក់ វ៉ាន់ដា