ក្រសួងការបរទេសគុយបា បាននិយាយថា ខ្លួនបានកោះហៅប្រមុខការទូត របស់សហរដ្ឋអាមេរិក នៅប្រទេសកោះនេះទៅក្នុងកិច្ចប្រជុំមួយ បន្ទាប់ពីមានការតវ៉ា កាលពីថ្ងៃអាទិត្យ ដោយចោទប្រកាន់ស្ថានទូតសហរដ្ឋអាមេរិក នៅទីក្រុង ឡាហាវ៉ាន់ ថាបានព្យាយាមបង្កការបះបោរប្រឆាំងរដ្ឋាភិបាលដ៏ទូលំទូលាយ និងជ្រៀតជ្រែកក្នុងកិច្ចការផ្ទៃក្នុងរបស់ប្រទេសគុយបា។

ប្រព័ន្ធផ្សព្វផ្សាយរដ្ឋបាននិយាយថា ការប្រមូលផ្តុំគ្នាតវ៉ាចំពោះការគៀបសង្កត់ ការដាច់ភ្លើងរយៈពេលជាច្រើនម៉ោង និងកង្វះខាតស្បៀងអាហារ បានផ្ទុះឡើងនៅក្នុងទីតាំងយ៉ាងតិចចំនួន ៥ នៅទូទាំងប្រទេសកោះនេះកាលពីថ្ងៃអាទិត្យ រួមទាំងទីក្រុង សានទីអាហ្គោ (Santiago) ដែលជាទីក្រុងធំទីពីររបស់ប្រទេសគុយបាផងដែរ។

រដ្ឋាភិបាលសហរដ្ឋអាមេរិក បាននិយាយនៅលើបណ្ដាញសង្គម X កាលពីល្ងាចថ្ងៃអាទិត្យថា ខ្លួនកំពុងតាមដានការតវ៉ានេះយ៉ាងដិតដល់ ហើយអ្នកនាំពាក្យក្រសួងការបរទេសសហរដ្ឋអាមេរិក បានច្រានចោលការចោទប្រកាន់របស់គុយបាន ដោយនិយាយថា វាជារឿង «មិនសមហេតុផលខ្លាំងណាស់» ក្នុងការលើកឡើងថាទីក្រុងវ៉ាស៊ីនតោន ជាអ្នកនៅពីក្រោយការតវ៉ានេះ។

ភាពតានតឹងចុងក្រោយនៃទំនាក់ទំនងរវាងសត្រូវដ៏យូរអង្វែងទាំងពីរនេះ បានគូសបញ្ជាក់អំពីទំនាក់ទំនងដ៏ត្រជាក់រវាងគុយបា និងសហរដ្ឋអាមេរិក ដែលស្ទើរតែមិនមានភាពប្រសើរឡើងចាប់តាំងពីប្រធានាធិបតីអាមេរិកលោក ចូ បៃដិន (Joe Biden) ចូលកាន់តំណែងនៅឆ្នាំ ២០២១ មក៕