អគ្គលេខាធិការអង្គការ ណាតូ លោក ជេនស៍ ស្តុលថិនប៊ឺក (Jens Stoltenberg) កាលពីថ្ងៃអាទិត្យ (១៧ មីនា) បានសង្កត់ធ្ងន់លើតម្រូវការក្នុងការប្រយុទ្ធប្រឆាំងនឹងការឡើងកម្ដៅផែនដី ហើយបានហៅបម្រែបម្រួលអាកាសធាតុថាជា «មេគុណ-វិបត្តិ» ជាមួយនឹងផលប៉ះពាល់ដល់សន្តិសុខពិភពលោក។

លោក ស្តុលថិនប៊ឺក បានធ្វើការលើកឡើងនេះក្នុងអំឡុងសន្និសីទសារព័ត៌មាននៅទីក្រុងបាគូ រួមជាមួយប្រធានាធិបតី អាស៊ែរបៃហ្សង់ លោក អ៊ីលហាម អាលីយេវ (Ilham Aliyev) ដែលជាប្រទេសសម្បូរថាមពល ហើយនឹងរៀបចំធ្វើជាម្ចាស់ផ្ទះសន្និសីទអង្គការសហប្រជាជាតិស្តីពីបម្រែបម្រួលអាកាសធាតុ (COP29) នៅខែវិច្ឆិកា ខាងមុខនេះ។

ដោយសរសើរ អាស៊ែរបៃហ្សង់ សម្រាប់ «តួនាទីដ៏សំខាន់របស់ខ្លួនក្នុងការផ្តល់ឧស្ម័នធម្មជាតិទៅឱ្យសម្ព័ន្ធមិត្តសំខាន់របស់ណាតូ» លោក ស្តុលថិនប៊ឺក បាននិយាយថា «បញ្ហាប្រឈមសំខាន់បំផុតនោះគឺថា ពិភពលោកត្រូវការថាមពលប្រើប្រាស់បន្ថែម ប៉ុន្តែក្នុងពេលជាមួយគ្នានេះ យើងក៏ត្រូវប្រយុទ្ធប្រឆាំងនឹងការឡើងកម្ដៅផែនដីផងដែរ»។

ប្រមុខអង្គការណាតូ រូបនេះបាននិយាយថាការជ្រើសរើសរបស់ អាស៊ែរបៃហ្សង់ ក្នុងការធ្វើជាម្ចាស់ផ្ទះនៃកិច្ចប្រជុំអាកាសធាតុ COP29 ចាប់ពីថ្ងៃទី១១ ដល់ថ្ងៃទី២៤ ខែវិច្ឆិកា គឺជា «សញ្ញានៃការទទួលស្គាល់កិច្ចខិតខំប្រឹងប្រែងលើការផ្លាស់ប្តូរបៃតង»។

នេះនឹងក្លាយជាឆ្នាំទី២ ជាប់ៗគ្នាដែលសន្និសីទអាកាសធាតុនឹងត្រូវរៀបចំឡើងដោយប្រទេសសម្បូរប្រេងខ្នាតយក្ស ដោយព្រឹត្តិការណ៍ដដែលនេះកាលពីឆ្នាំ២០២៣ ត្រូវបានធ្វើឡើងនៅប្រទេសអារ៉ាប់រួម៕