អាជ្ញាធរអ៊ីស្រាអែល កំពុងរៀបចំបញ្ជូនអ្នកជំងឺប៉ាឡេស្ទីនមួយក្រុម ដែលកំពុងទទួលការព្យាបាល នៅមន្ទីរពេទ្យក្នុងទីក្រុងហ្ស៊េរុយសាឡឹមខាងកើត ត្រឡប់ទៅតំបន់ហ្កាហ្សាវិញ ក្នុងសប្តាហ៍នេះ។

មន្ត្រីមន្ទីរពេទ្យ បាននិយាយថា ជនជាតិប៉ាឡេស្ទីននៅតំបន់ហ្កាហ្សា ២២នាក់ រួមមានទារកទើបនឹងកើត ៥នាក់ និងម្តាយរបស់ពួកគេ អ្នកជំងឺមហារីកឥឡូវនេះ កំពុងសម្រាកព្យាបាល និងអ្នកអ្នកថែទាំមួយចំនួន ដែលបានអមដំណើរពួកគេ។ ពួកគេទាំងអស់ បានទទួលការអនុញ្ញាតពីអាជ្ញាធរអ៊ីស្រាអែលឲ្យធ្វើដំណើរទៅកាន់ទីក្រុងហ្ស៊េរុយសាឡឹមខាងកើតដែលកាន់កាប់ដោយអ៊ីស្រាអែលសម្រាប់ការថែទាំវេជ្ជសាស្រ្តកម្រិតខ្ពស់ ភាគច្រើន មុនពេលការវាយប្រហាររបស់ក្រុមហាម៉ាស នៅថ្ងៃទី៧ ខែតុលា លើអ៊ីស្រាអែល។

មន្ត្រីទាំងនោះ បានប្រាប់សារព័ត៌មាន CNN ថា អស់រយៈពេលជាច្រើនខែ ស្ថាប័នក្រសួងការពារជាតិអ៊ីស្រាអែលដែលទទួលខុសត្រូវលើកិច្ចការប៉ាឡេស្ទីន COGAT បាននិងកំពុងជំរុញមន្ត្រីមន្ទីរពេទ្យក្រុងហ្ស៊េរុយសាឡឹមខាងកើតឲ្យផ្តល់បញ្ជីអ្នកជំងឺដែលលែងត្រូវការការព្យាបាលហើយនោះ ដើម្បីបញ្ជូនពួកគេ ត្រឡប់ទៅតំបន់ហ្កាហ្សាវិញ។

ឈ្មោះអ្នកជំងឺនៅក្នុងបញ្ជីដែលត្រូវបានគេឃើញដោយសារព័ត៌មានCNN ត្រូវបានគេរំពឹងថា នឹងត្រូវជិះ   រថយន្តក្រុងដែលធ្វើដំណើរតាមច្រក Kerem Shalom នៅលើព្រំដែនរវាងអ៊ីស្រាអែល និងហ្កាហ្សា នៅថ្ងៃពុធ។