ភ្នំពេញ ៖ ថវិកាចំនួនប្រាំមួយលានប្រាំសែនដុល្លារ ត្រូវបានរដ្ឋាភិបាលអាម៉េរិកប្រគល់ជូនកម្ពុជា តាមរយៈមជ្ឈ មណ្ឌលឯកសារកម្ពុជា ហៅកាត់ថាDCcam។ នេះបើតាមព្រះរាជសារសម្ដេចព្រះមហាក្សត្រី​នរោត្ដម មុនិនាថ សីហនុ ព្រះវររាជ​មាតា​ជាតិខ្មែរ​ក្នុង​សេរីភាព សេចក្តីថ្លៃថ្នូរ និង​សុភមង្គល ជាទីគោរព​សក្ការៈ​ដ៏​ខ្ពង់ខ្ពស់ ព្រះអង្គ​សព្វព្រះរាជហឫទ័យ​ផ្ញើជូន​លោក ឆាំង យុ នាយក​មជ្ឈមណ្ឌល​ឯកសារ​កម្ពុជា និង​ជា​ស្ថាបនិក​វិទ្យាស្ថាន​ស្លឹករឹត។

ប្រភពដដែលបានឱ្យដឹងទៀតថា ថវិកាចំនួនជាងប្រាំមួយលានដុល្លារនេះ គឺរដ្ឋាភិបាលសហរដ្ឋអាម៉េ រិកផ្ដល់ជូនសម្រាប់​គាំទ្រ​ដល់​គម្រោង​ថែទាំ​សុខភាព និង​សេវាកម្ម​សង្គម​សម្រាប់​អ្នក​រស់រានមានជីវិត​ពី​របប​ខ្មែរក្រហម​។​

ក្នុងព្រះរាជសារដដែល សម្ដេចព្រះមហាក្សត្រីក៏បានបង្ហាញព្រះរាជហឫទ័យសោមនស្ស​រីករាយ​ជា​អនេក ដោយបាន​ដឹងថា​ជំនួយ​នេះត្រូវបាន​បម្រុង​ទុក​សម្រាប់​ជួយ​ដល់​ប្រជាជន​ដែលមាន​វ័យ​ជរា និង​ជនពិការ​ដែលជា​អ្នក​រស់រានមានជីវិត​ពី​របប​ដ៏​ជូរចត់​នៃ​ប្រវត្តិសាស្ត្រ​ជាតិ​យើង​។​

ពលរដ្ឋកម្ពុជាដែលនៅសល់ជីវិតរស់រាននៅក្រោយរបបប្រល័យពូជសាសន៍ខ្មែរក្រហមភាគច្រើនមានជំងឺវិបត្តិផ្លូវចិត្ត, ជំងឺរ៉ាំរ៉ៃនានា ព្រមទាំងធ្លាក់ខ្លួនពិការផងដែរ៕ អត្ថបទ៖ គង់ ឌិន