ការស្ទង់មតិរបស់រដ្ឋាភិបាលបានបង្ហាញថា និស្សិត ៤នាក់ក្នុងចំណោម ១០នាក់ នៅក្នុងប្រទេសកូរ៉េខាងត្បូង ជឿថា ការបង្រួបបង្រួមគ្នាឡើងវិញ រវាងប្រទេសកូរ៉េទាំង២ ដែលបានបំបែកចេញពីគ្នានោះ គឺពុំមានភាពចាំបាច់ទៀតឡើយ។

ការស្ទង់មតិដែលធ្វើឡើងក្នុងខែតុលា ឆ្នាំ២០២៣ ដោយក្រសួងបង្រួបបង្រួម ដែលមាននិស្សិតចំនួន ៧៣.៩៩១នាក់អាយុចន្លោះពី ៦ឆ្នាំទៅ ១៨ឆ្នាំ នៅទូទាំងប្រទេស កើតមានឡើងចំពេលដែលភាពតានតឹងអន្តរកូរ៉េកើនឡើងកាន់តែខ្លាំង។ ជាក់ស្ដែង ទីក្រុងព្យុងយ៉ាងបានធ្វើការបាញ់សាកល្បងមីស៊ីលតម្រង់គោលដៅចំនួន ៥លើកហើយមកទល់ពេលនេះ ក្នុងឆ្នាំ២០២៤។

៣៨,៩ភាគរយនៃអ្នកឆ្លើយសំណួរ បានឆ្លើយតបថា ការបង្រួបបង្រួម គឺ «ពុំចាំបាច់ទៀតឡើយ» ដែលជាចំនួនដ៏ខ្ពស់ គិតចាប់តាំងពីការស្ទង់មតិត្រូវបានធ្វើឡើងជាលើកដំបូងក្នុង២០១៤។ ភាគរយនៃសិស្សដែលបានឆ្លើយតបតាមរបៀបនេះ បានកើនឡើងជាលំដាប់ក្នុងប៉ុន្មានឆ្នាំថ្មីៗនេះ ដោយមានចំនួន ២៤,២ភាគរយ នៅឆ្នាំ២០២០ ចំនួន ២៥ភាគរយនៅឆ្នាំ២០២១ និង ៣១,៧ភាគរយនៅឆ្នាំ២០២២។

បរិមាណដែលបានឆ្លើយតបថា ការបង្រួបបង្រួមឡើងវិញ គឺ «ចាំបាច់» មាន ៤៩,៨ភាគរយ ដោយនេះជាលើកដំបូងដែលតួលេខនេះបានធ្លាក់ចុះក្រោមកម្រិត ៥០ភាគរយ គិតចាប់តាំងពីឆ្នាំ២០១៤ មក។ ជាមួយគ្នានេះ ចំណាប់អារម្មណ៍របស់សិស្ស ក្នុងការបង្រួបបង្រួមគ្នាឡើងវិញក៏បានធ្លាក់ចុះផងដែរ នាពេលថ្មីៗនេះ។

ចំណែកឯភាគរយនៃអ្នកឆ្លើយសំណួរដែលនិយាយថា ពួកគេ «មិនចាប់អារម្មណ៍» នៅក្នុងបញ្ហាបង្រួបបង្រួមនេះ បានឡើងដល់កម្រិត ២៨,៣ភាគរយ ក្នុងឆ្នាំ២០២៣ ដោយឡើងពីកម្រិត ២៧ភាគរយកាលពីឆ្នាំមុន។ តួលេខអ្នកមិនចាប់អារម្មណ៍នេះ គឺ ២០,២ភាគរយក្នុងឆ្នាំ២០២០ និង ២២,៤ភាគរយ នៅឆ្នាំ២០២១៕