ភ្នំពេញ ៖ គណៈកម្មការគ្រប់គ្រងល្បែងពាណិជ្ជកម្មកម្ពុជា បង្កើនកិច្ចសហការជាមួយអាជ្ញាធរមានសមត្ថកិច្ចពាក់ព័ន្ធខេត្តកំពង់ចាម ដើម្បី គ្រប់គ្រង តាមដាន ត្រួតពិនិត្យ និងចាត់វិធានការតាមសមត្ថកិច្ចរៀងៗខ្លួន លើការធ្វើអាជីវកម្មល្បែងស៊ីសងខុសច្បាប់គ្រប់ប្រភេទ និង ល្បែងផ្សងសំណាងដែលមិនមានអាជ្ញាបណ្ណ។

​អគ្គលេខាធិការដ្ឋាននៃគណៈកម្មការគ្រប់គ្រងល្បែងពាណិជ្ជកម្មកម្ពុជា គ.ល.ក. នៅថ្ងៃទី១៩ ខែមីនា ឆ្នាំ២០២៤ នេះ បាន សហការជាមួយរដ្ឋបាលខេត្តកំពង់ចាម រៀបចំកិច្ចប្រជុំពិភាក្សា ស្តីពីការគ្រប់គ្រងល្បែងផ្សងសំណាង និងការគ្រប់គ្រងផលប៉ះពាល់ ពីល្បែងស៊ីសងខុសច្បាប់គ្រប់ប្រភេទ ដោយកិច្ចប្រជុំពិភាក្សានេះ រៀបចំឡើងក្នុងគោលបំណង បង្កើតឱ្យមានវេទិកាពិភាក្សា ពិគ្រោះ និងផ្លាស់ប្តូរមតិយោបល់ រវាងអគ្គលេខាធិការដ្ឋាននៃ គ.ល.ក. និងអាជ្ញាធរមានសមត្ថកិច្ចពាក់ព័ន្ធនៅក្នុងខេត្តកំពង់ចាម លើការគ្រប់ គ្រងអាជីវកម្មល្បែងផ្សងសំណាង នៅក្នុងព្រះរាជាណាចក្រកម្ពុជា ដើម្បីកំណត់ និងដោះស្រាយនូវបញ្ហាប្រឈម និងផលប៉ះពាល់ពី ល្បែងស៊ីសងខុសច្បាប់គ្រប់ប្រភេទ ដែលកំពុងកើតមានឡើង នៅក្នុងកិច្ចដំណើរការអាជីវកម្មល្បែងផ្សងសំណាង។

ក្រៅពីវិធានខាងលើ, គណៈកម្មការគ្រប់គ្រងល្បែងពាណិជ្ជកម្មកម្ពុជា បានកំពុងបង្កើនកិច្ចសហការយ៉ាងជិតស្និទ្ធ ជាមួយ អាជ្ញាធរមានសមត្ថកិច្ចពាក់ព័ន្ធនៅខេត្តកំពង់ចាម សំដៅផ្លាស់ប្តូរព័ត៌មាន និងសហការក្នុងការគ្រប់គ្រង តាមដាន ត្រួតពិនិត្យ និង ចាត់វិធានការតាមសមត្ថកិច្ចរៀងៗខ្លួន លើការធ្វើអាជីវកម្មល្បែងស៊ីសងគ្រប់ប្រភេទ ក៏ដូចជាល្បែងផ្សងសំណាងដែលមិនមាន អាជ្ញាបណ្ណ អាជ្ញាបណ្ណសាខា និងលិខិតអនុញ្ញាតប៉ុស្តិ៍សេវាពី គ.ល.ក .ជាដើម។ ក្នុងពិធីនេះដែរ ក៏ជាលើកកម្ពស់ការយល់ដឹងឱ្យ កាន់តែទូលំទូលាយនូវច្បាប់ និងលិខិតបទដ្ឋានគតិយុត្តជាធរមាន ពាក់ព័ន្ធនឹងការគ្រប់គ្រងអាជីវកម្មល្បែងផ្សេងសំណាង ដើម្បី ជំរុញអនុលោមភាព ការទទួលខុសត្រូវរបស់ប្រតិបត្តិករល្បែងផ្សងសំណាង និងការកាត់បន្ថយផលប៉ះពាល់អវិជ្ជមានជាអតិបរមា ពី ល្បែងស៊ីសងខុសច្បាប់គ្រប់ប្រភេទ។

សូមបញ្ជាក់ថា កិច្ចប្រជុំពិភាក្សា ស្តីពីការគ្រប់គ្រងល្បែងផ្សងសំណាង និងការគ្រប់គ្រងផលប៉ះពាល់ពីល្បែងស៊ីសងខុសច្បាប់គ្រប់ ប្រភេទខាងលើកនេះ បានប្រព្រឹត្តិទៅក្រោមអធិបតីភាព ឯកឧត្តម រស់ ភីរុណ អគ្គលេខាធិការ គ.ល.ក. ក្នុងនោះមានការអញ្ជើញ ចូលរួមពីសមាជិកគណៈកម្មការទី២ នៃរដ្ឋសភា, ប្រធានក្រុមប្រឹក្សា និងអភិបាលនៃគណៈអភិបាលខេត្តកំពង់ចាម, ប្រធានសាលា ដំបូងខេត្ត, ព្រះរាជអាជ្ញានៃអយ្យការអមសាសាដំបូងខេត្ត, ស្នងការនៃស្នងការដ្ឋាននគរបាលខេត្ត, មេបញ្ជាការនៃបញ្ជាការដ្ឋាន កងរាជអាវុធហត្ថខេត្ត, មេបញ្ជាការតំបន់ប្រតិបត្តិការសឹករងខេត្ត, គណៈបញ្ជាការឯកភាពក្រុង-ស្រុក-ឃុំ-សង្កាត់, រដ្ឋបាលក្រុង-ស្រុក-ឃុំ-សង្កាត់, មន្ទីរជំនាញពាក់ព័ន្ធ និងមន្ត្រីជំនាញពាក់ព័ន្ធនៃរដ្ឋបាលខេត្តកំពង់ចាម ព្រមទាំងប្រតិបត្តិករល្បែងផ្សេងសំណាង ប្រមាណ ៣៨០ នាក់៕

អត្ថបទ៖ សុន រ៉ាឌី