អ្នកនាំពាក្យ គណៈកម្មាធិការជាតិរៀបចំការបោះឆ្នោត (គ.ជ.ប) បានឱ្យដឹងថា គណៈកម្មការរាជធានី-ខេត្តរៀបចំការបោះឆ្នោតចំនួន១៦ខេត្ត បានបញ្ចប់ការចាប់ឆ្នោតលេខរៀងរបស់គណបក្សនយោបាយ សម្រាប់ការបោះឆ្នោតជ្រើសរើសក្រុមប្រឹក្សារាជធានី ខេត្ត ក្រុង ស្រុក ខណ្ឌ អាណត្តិទី៤ ឆ្នាំ២០២៤។
ថ្លែងប្រាប់ BTV នៅថ្ងៃទី២០ ខែមីនា ឆ្នាំ២០២៤ ឯកឧត្តម ហង្ស ពុទ្ធា សមាជិក និងជាអ្នកនាំពាក្យ គ.ជ.ប. បានឱ្យដឹងថា បន្ទាប់ពីដំណើរការចុះបញ្ជីគណបក្សនយោបាយ និងការចុះបញ្ជីបេក្ខជនឈរបោះឆ្នោតបានបញ្ចប់រួចរាល់ អំឡុងពេលបច្ចុប្បន្ននេះគណៈកម្មការរាជធានី-ខេត្តរៀបចំការបោះឆ្នោតកំពុងដំណើរលើការចាប់ឆ្នោតលេខរៀងរបស់គណបក្សនយោបាយទាំង៥ ដែលចូលរួមការបោះឆ្នោតជ្រើសរើសក្រុមប្រឹក្សារាជធានី ខេត្ត ក្រុង ស្រុក និងខណ្ឌ។ ឯកឧត្តម បន្តថា ការចាប់ឆ្នោតលេខរៀងមានសារៈសំខាន់ ដោយសារសន្លឹកឆ្នោតទាំងនោះត្រូវផ្អែកទៅតាមការចុះបញ្ជីគណបក្សនយោបាយ និងការចុះបញ្ជីបេក្ខជនឈរឈ្មោះបោះឆ្នោត។
ឯកឧត្តមបញ្ជាក់ថា ទោះបីការចាប់លេខរៀងគណបក្សនយោបាយត្រូវធ្វើនៅតាមគណៈកម្មការរាជធានី-ខេត្តរៀបចំការបោះឆ្នោតក្តី ប៉ុន្តែ គ.ជ.ប នៅមានភារកិច្ចទទួលខុសត្រូវបោះពុម្ពសន្លឹកឆ្នោត ដើម្បីឱ្យការរៀបចំបោះពុម្ពសន្លឹកឆ្នោតនោះត្រឹមត្រូវទៅតាមលេខរៀងរបស់គណបក្សនយោបាយ។
អ្នកនាំពាក្យរូបនេះបញ្ជាក់ទៀតថា គិតមកទល់ពេលនេះ ការចាប់ឆ្នោតលេខរៀងគណបក្សនយោបាយបានបញ្ចប់រួចរាល់ក្នុងខេត្តចំនួន១៦ ខណៈខេត្តចំនួន៩ផ្សេងទៀតមានគណបក្សនយោបាយមួយចំនួនពុំទាន់បំពេញឯកសារត្រឹមត្រូវទៅតាមការកំណត់របស់ គ.ជ.ប។
អ្នកនាំពាក្យរូបនេះ បានអំពាវនាវដល់គណបក្សនយោបាយត្រូវធ្វើការរួសរាន់រៀបចំឯកសារការចុះបញ្ជីបេក្ខជនឈរឈ្មោះបោះឆ្នោតនេះឱ្យបានត្រឹមត្រូវទៅតាមច្បាប់ ខណៈ គ.ជ.ប គ្រោងនឹងបញ្ចប់ការចាប់ឆ្នោតលេខរៀងគណបក្សនយោបាយទាំងអស់យ៉ាងយូរត្រឹមដំណាច់ខែមីនានេះ។
សូមជម្រាបថា គ.ជ.ប បានប្រកាសទទួលស្គាល់ជាផ្លូវការចំពោះគណបក្សនយោបាយចំនួន៥ ឱ្យចូលរួមការបោះឆ្នោតជ្រើសរើសក្រុមប្រឹក្សារាជធានី ក្រុមប្រឹក្សាខេត្ត ក្រុមប្រឹក្សាក្រុង ក្រុមប្រឹក្សាស្រុក និងក្រុមប្រឹក្សាខណ្ឌ អាណត្តិទី៤ ក្នុងនោះមាន គណបក្សប្រជាជនកម្ពុជា, គណបក្សឆន្ទៈខ្មែរ, គណបក្សកម្លាំងជាតិ, គណបក្សហ្វ៊ុនស៊ិនប៉ិច និងគណបក្សខ្មែររួបរួមជាតិ។ ការបោះឆ្នោតនេះនឹងប្រព្រឹត្តទៅនាថ្ងៃទី២៦ ខែឧសភា ឆ្នាំ២០២៤ខាងមុខ និងមានអង្គបោះឆ្នោតជាសមាជិកក្រុមប្រឹក្សាឃុំ-សង្កាត់ក្នុងមុខតំណែង៕ អត្ថបទ៖ សេក ឧត្តម
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
