គម្រោង SWITCH to Solar នៅព្រឹកថ្ងៃទី២០ ខែមីនា ឆ្នាំ២០២៤នេះ បានរៀបចំ​សិក្ខាសាលា​មួយ​​ស្តីពី​ការជំរុញ​សហហិរញ្ញប្បទាន ដើម្បី​លើក​កម្ពស់​សហគ្រិន​បច្ចេក​វិទ្យា​ថាមពល​ព្រះអាទិត្យ​ក្នុង​វិស័យ កសិវារីវប្បកម្ម ក្នុង​គោល​បំណង​ស្វែង​រក​ដំណោះ​ស្រាយ​ហិរញ្ញ​វត្ថុ​ប្រកប​ដោយ​ភាព​ច្នៃ​ប្រឌិត និងការវិនិយោគសម្រាប់ការអភិវឌ្ឍន៍ថាមពលស្អាត សម្រាប់ការវិនិយោគក្នុងទម្រង់ចម្រុះ ទាំង​ជំនួយ និងកម្ចី។

លោក Michael Renfrew នាយកប្រតិបត្តិ និងកម្មវិធី EnergyLab បានឲ្យដឹងថា គម្រោង SWITCH to Solar បានចាប់ផ្តើមនៅឆ្នាំ ២០២០ មាន​គោល​បំណង​លើក​កម្ពស់​ការ​អនុវត្ត​ការ​ប្រើប្រាស់​ប្រកបដោយនិរន្តរភាព ក្នុងចំណោមសហគ្រាសធុនតូច ខ្នាតតូច និងមធ្យម ដោយ​បង្កើន​លទ្ធភាពទទួលបានដំណោះស្រាយថាមពលព្រះអាទិត្យ និងហិរញ្ញវត្ថុ។

លោកបានពន្យល់ថា បច្ចេកវិទ្យាស្អាត ដូចជាថាមពលពន្លឺព្រះអាទិត្យ គឺជា​កត្តា​សំខាន់​ក្នុង​ការ​ដោះ​ស្រាយ​បញ្ហាប្រឈមទ្វេរដងនៃការបន្សាំនៃការប្រែប្រួលអាកាសធាតុ និងតម្រូវការ​កាត់​បន្ថយ​ការ​ប្រើប្រាស់ទុ​នបម្រុងឥន្ធនៈហ្វូស៊ីលដែលថយចុះ។ នៅក្នុងវិស័យជលផល សហគ្រាសធុនតូច និង​មធ្យម ដែលកំពុងរីក​ចម្រើន​កំពុង​ត្រួស​ត្រាយ​ផលិត​ផល​ដើម្បី​ដោះស្រាយ​បញ្ហា​ប្រឈម​ទាំង​ពីរ​ក្នុង​ពេល​ដំណាលគ្នា។ លោកបន្ថែមថា ទោះជាយ៉ាងណាក៏ដោយ កំណើន និងស្ថិរភាព​របស់​ពួក​គេ​ជារឿយៗត្រូវបានរារាំងដោយលទ្ធភាពមានកម្រិតចំពោះជម្រើសហិរញ្ញប្បទានសមរម្យ។

នៅក្នុងបទបង្ហាញរបស់លោកស្រី ខៀវ ធីតា នាយកប្រតិបត្តិ និងជាស្ថាបនិកក្រុមហ៊ុន SOGE Cambodia ដែលជាក្រុមហ៊ុនបច្ចេកវិទ្យាថាមពលព្រះអាទិត្យ បានអះអាងថា លទ្ធភាព​ទទួល​បាន​ហិរញ្ញ​ប្បទាន​ប្រកប​ដោយភាព​ច្នៃ​ប្រឌិត​នៅ​តែ​ជា​ឧបសគ្គ​ដ៏សំខាន់​សម្រាប់​សហគ្រិន​បច្ចេក​វិទ្យា​ថាមពល​ព្រះអាទិត្យក្នុងវិស័យកសិកម្មនេសាទ និងបានជំរុញឱ្យភាគី​ពាក់ព័ន្ធ​រៀបចំ​ដំណោះ​ស្រាយ​ហិរញ្ញប្បទានប្រកបដោយភាពច្នៃប្រឌិតដើម្បីគាំទ្រ។ លោកស្រីបន្តថា កំណើនសហគ្រិន​បច្ចេក​វិទ្យា​ពន្លឺព្រះអាទិត្យនៅកម្ពុជា។ លោកស្រី បានបញ្ជាក់ថា ក្នុងប៉ុន្មានឆ្នាំថ្មីៗនេះ ការលេច​ឡើង​នៃ​ការ​ចាប់ផ្តើមអាជីវកម្មបច្ចេកវិទ្យាថាមពលព្រះអាទិត្យ បានក្លាយទៅ​ជា​កម្លាំង​ស្នូលដែ​ល​ជំរុញ​ការ​អនុវត្តកសិកម្មប្រកបដោយនិរន្តរភាព និងការអភិវឌ្ឍ​នៅ​ទូទាំង​ខ្សែ​សង្វាក់​ផ្គត់ផ្គង់​ទាំ​ង​មូល ចាប់ពីការផលិត និងការកែច្នៃ ការផ្ទុក និងការដឹកជញ្ជូន។

សូមជម្រាបជូនដែរថា តាមរយៈសិក្ខាសាលានេះ វាគ្មិនជំនាញ បានធ្វើបទ​បង្ហាញ​អំពី​របៀប​នៃ​ការ​បញ្ចូល​គ្នា​នៃ​ជម្រើសហិរញ្ញប្បទានប្រកបដោយភាពច្នៃប្រឌិតផ្សេងៗគ្នា ដើម្បីគាំទ្រដល់​គំនិត​ផ្តួច​ផ្តើម​នៃ​បច្ចេកវិទ្យាស្អាត។ ព្រឹត្តិការណ៍នេះក៏បានដើរតួជាវេទិកាអន្តរកម្មមួយដើម្បីពិភាក្សាអំពី «ការ​ជំរុញផ្នែកហិរញ្ញវត្ថុចម្រុះ ដើម្បី​លើក​កម្ពស់​សហគ្រិនភា​ពប​ច្ចេក​វិទ្យា​ថាមពល​ព្រះ​អាទិត្យ​ក្នុង​វិស័យ​កសិកម្មនេសាទ» ដោយមានការចូលរួមពីតួអង្គសំខាន់ៗនៅក្នុងខ្សែសង្វាក់ហិរញ្ញវត្ថុ រួមមាន​ស្ថាប័នរដ្ឋាភិបាល ស្ថាប័នហិរញ្ញវត្ថុ វិនិយោគិនផងដែរ៕ អត្ថបទ៖ ឈិត បូរ៉ាវី