បាល់ទាត់៖ ក្រុមភ្នំពេញក្រោន និងក្រុមព្រះខ័នរាជស្វាយរៀងបានត្រឹមចែកគ្នា ១ពិន្ទុម្នាក់ប៉ុណ្ណោះបន្ទាប់ពីប្រកួតស្មើគ្នា ៣-៣ ក្នុងជំនួបសប្ដាហ៍ទី៨ នៃពានរង្វាន់មិត្តហ្វូនខេមបូឌានលីគនៅកីឡដ្ឋាន Smart RSN កាលពីល្ងាចថ្ងៃទី១៥ ខែកក្កដា ឆ្នាំ២០២១ ម្សិលមិញ។
ការប្រកួតដ៏ជក់ចិត្តនេះ ក្រុមព្រះខ័នរាជស្វាយរៀងបានស៊ុតបំប៉ោងសំណាញ់ទីក្រុមម្ចាស់ផ្ទះ ២គ្រាប់មុនដោយខ្សែប្រយុទ្ធកាមេរ៉ូន Privat នៅនាទី៣៩ និងនាទី៤៥។ ប៉ុន្ដែមុនបញ្ចប់វគ្គទី១ ក្រុមភ្នំពេញក្រោនក៏វាយបកបាន ១គ្រាប់វិញដែលធ្វើសម្រេចដោយខ្សែប្រយុទ្ធវ័យក្មេង លឹម ពិសុទ្ធ នៅនាទី៤៥+២។ លុះចូលវគ្គទី២ ក្រុមសិង្ហក្រហមភ្នំពេញក្រោនបានវាយបកនាំមុខក្រុមលោក Conor Nestor ៣-២ វិញបន្ទាប់ពីរកបាន ២គ្រាប់បន្ថែមដោយកីឡាករ លឹម ពិសុទ្ធ នៅនាទី៧២ និង ប្រាក់ ធីវ៉ា នៅនាទី៧៣ មុនកីឡាករ Lopez Mendy រកបានគ្រាប់បាល់វាយបកតាមស្មើ ៣-៣ វិញនៅនាទី៨០ ហើយលទ្ធផលនេះបានរក្សារហូតដល់ចប់ការប្រកួតតែម្ដង។
ក្រោយចែកគ្នា ១ពិន្ទុម្នាក់ បានធ្វើឲ្យក្រុមទាំងពីររក្សាកៅអីលេខ៥ និងលេខ៦ ជាបណ្ដោះអាស្នដោយរកបាន ១៣ពិន្ទុស្មើគ្នា តែក្រុមភ្នំពេញក្រោនមានប្រៀបជាង ដ្បិតពួកគេទើបប្រកួតបាន ៥ប្រកួតឈ្នះ ៤ និងស្មើ ១ ស្របពេលក្រុមព្រះខ័នរាជស្វាយរៀងប្រកួត ៧ប្រកួត ឈ្នះ៤ ស្មើ ១ និងចាញ់ ២ តាមពីក្រោយក្រុមកំពូលតារាងអង្គរថាយហ្គឺរដែលរកបាន ១៩ពិន្ទុជាមួយលទ្ធផល ៨ប្រកួតឈ្នះ ៦ ស្មើ ១ និងចាញ់ ១៕
អត្ថបទ៖ លី ឈុនឡា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
