បាល់ទាត់៖ បន្ទាប់ពីរងបរាជ័យ ៥ប្រកួតជាប់គ្នា ក្រុមបាល់ទាត់អគ្គិសនីកម្ពុជាបានរកឃើញជ័យជម្នះលើកទី២ របស់ខ្លួន ក្រោយយកឈ្នះក្រុមម្ចាស់ផ្ទះសូលទីឡូអង្គរដោយលទ្ធផល ១-០ ក្នុងជំនួបសប្ដាហ៍ទី៨ នៃពានរង្វាន់មិត្តហ្វូនខេមបូឌានលីគឆ្នាំ២០២១ នៅកីឡដ្ឋាន SRU ខេត្តសៀមរាបកាលពីល្ងាចថ្ងៃទី១៥ ខែកក្កដានេះ។
ការប្រកួតដើម្បីស្វែងរកពិន្ទុធានាកៅអីសុវត្ថិភាពនេះ ក្រុមទាំងពីរបើកការវាយសម្រុកគ្នាពេញ ៩០នាទី តែមានគ្រាប់បាល់កើតឡើង ១គ្រាប់ប៉ុណ្ណោះដែលធ្វើសម្រេចដោយខ្សែប្រយុទ្ធអគ្គិសនីកម្ពុជា ចន្ថា ចន្ទាកា នៅនាទី៣៦ ហើយគ្រាប់បាល់ជ័យជម្នះលើក្រុមម្ចាស់ផ្ទះសូលទីឡូអង្គរផងដែរ បន្ទាប់ពីក្រុមមានមូលដ្ឋាននៅខេត្តសៀមរាបនេះ ព្យាយាមរកគ្រាប់បាល់តែមិនបានសម្រេច។ លទ្ធផលនេះបានធ្វើឲ្យក្រុមអគ្គិសនីកម្ពុជា រំកិលមកឈរលេខរៀងទី១០ ដោយមាន ៦ពិន្ទុស្មើក្រុមអាស៊ីអឺរ៉ុបបន្ទាប់ពីឆ្លងកាត់ ៧ប្រកួតឈ្នះ ២ និងចាញ់ ៥ ហើយជ័យជម្នះលើកដំបូងរបស់ក្រុមប្រើធនធានកីឡាករក្នុងស្រុកសុទ្ធនេះ គឺបានយកឈ្នះក្រុមនគរបាលជាតិ ៣-២ តាំងពីប្រកួតបើករដូវកាលថ្មីមកម្ល៉េះ។ រីឯក្រុមសូលទីឡូអង្គរវិញបន្ដឈរបាតតារាង និងមិនទាន់មានពិន្ទុរាប់ឡើយក្រោយឆ្លងកាត់ ៧ប្រកួតចាញ់ទាំង ៧ប្រកួត។
ដោយឡែកក្រុមបាល់ទាត់អង្គរថាយហ្គឺរបានស្គាល់បរាជ័យលើកដំបូង ក្នុងក្របខណ្ឌមិត្តហ្វូនខេមបូឌានលីគ ឆ្នាំ២០២១ ហើយក្រោយប្រកួតចាញ់ក្រុមម្ចាស់ផ្ទះវិសាខា ៣-១ នៅក្នុងជំនួបសប្ដាហ៍ទី៨ កាលពីល្ងាចថ្ងៃទី១៥ ខែកក្កដានៅកីឡដ្ឋានព្រីនស៍។ ទោះបីរបូត ៣ពិន្ទុលើកដំបូងក៏ពិតមែន តែក្រុមអង្គរថាយហ្គឺរនៅតែបន្ដឈរកំពូលតារាងបណ្ដោះអាសន្ន ដោយមាន ១៩ពិន្ទុក្នុងដៃជាមួយលទ្ធផល ៨ប្រកួតឈ្នះ ៦ ស្មើ ១ និងចាញ់ ១ តាមពីក្រោយដោយក្រុមវិសាខាដែលរកបាន ១៥ពិន្ទុ តែនៅសល់ប្រកួតចំណេញក្នុងដៃ ១ប្រកួត ពោលគឺក្រុមសេះជំទង់នេះទើបប្រកួតបាន ៧ប្រកួតប៉ុណ្ណោះជាមួយលទ្ធផលឈ្នះ ៤ និងស្មើ ៣ មិនទាន់ស្គាល់ចាញ់ឡើយ៕
អត្ថបទ លី ឈុនឡា,
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
