ឯកឧត្តម ហ៊ុន ម៉ានី ឧបនាយករដ្ឋមន្រ្តី រដ្ឋមន្រ្តីក្រសួងមុខងារសាធារណៈ និងជា​ប្រធាន​ក្រុមប្រឹក្សា​ភិបាលសាលាភូមិន្ទរដ្ឋបាល នៅថ្ងៃទី២០ ខែមីនានេះ បានអញ្ជើញ​ចូលរួម​ជា​អធិបតី​ក្នុង​ពិធី​បើក​វគ្គបណ្តុះបណ្តាលស្តីពី «ភាពជាអ្នកដឹកនាំ និងនវានុវត្តន៍ ជំនាន់ទី៦» ជូនដល់​សិក្ខាកាម​ដែល​ជាមន្រ្តីជាន់ខ្ពស់ទាំងថ្នាក់ជាតិ ថ្នាក់ក្រោមជាតិ និងស្ថានទូតអូស្រ្តាលី សរុបចំនួន ១៦២​នាក់ ក្នុងនោះស្រ្តីចំនួន២៩នាក់។ ពិធីនេះ រៀបចំធ្វើឡើងនៅសាលាភូមិន្ទរដ្ឋបាល រាជ​ធានី​ភ្នំពេញ។

ថ្លែងក្នុងពិធីបើកវគ្គបណ្តុះបណ្តាល ឯកឧត្តមឧបនាយករដ្ឋមន្រ្តី ហ៊ុន ម៉ានី បានលើកឡើងថា ភាព​ជា​អ្នកដឹកនាំចាំបាច់ត្រូវតែមានកក្តាចំនួន៣រួមមាន៖ ចក្ខុវិស័យ ជំនាញ និង​អត្តចរិត​ទន់​ភ្លន់​តែ​ហ្មត់​ចត់​នឹងការងារ។ ឯកឧត្តមឧបនាយករដ្ឋមន្រ្តីបានបន្តថា ការដាក់​ចេញ​នូវ​យុទ្ធសាស្រ្ត​បញ្ចាកោណ​ដំណាក់កាលទី១ របស់រាជរដ្ឋាភិបាល នីតិកាលទី៧ នៃរដ្ឋសភា បានកំណត់​អាទិភាព​គន្លឹះ​ចំនួន ៥រួមមាន៖មនុស្ស ផ្លួវ ទឹក ភ្លើង និងបច្ចេកវិទ្យា ហើយសិក្ខាសាលា ស្តីពី​ភាព​ជាអ្នក​ដឹកនាំ និងនវានុវត្តន៍នាពេលនេះ ត្រូវបានរៀប​ចំ​ឡើង​ដើម្បី​ឆ្លើយតប​ទៅ​នឹង​អាទិភាព​គន្លឹះទី១.មនុស្ស នៃយុទ្ធសាស្រ្តបញ្ចាកោណដំណាក់កាលទី១ ហើយក៏ស្រប​ទៅតាមអាទិភាព​ដែល​មានចែកក្នុង​មុំទី១,២ នៃស្នូលយុទ្ធសាស្រ្តបញ្ចាកោណ ឆ្លើយតបការពង្រឹង និងកែ​ទម្រង់​ស្ថាប័ន តាមរយៈការពង្រីកសមត្ថភាពជាអ្នកដឹកនាំ និងការរៀបចំបណ្តាអ្នកដឹកនាំ ព្រមទាំង​ការ​លើកកម្ពស់​សមត្ថភាពធនធានមនុស្ស ប្រកបដោយតម្លាភាព ជំនាញ ឆន្ទះ ម្ចាស់ការ និងក្រប​សីលធម៌​វិជ្ជាជីវៈស្របតាមតួនាទី និងការទទួលខុសត្រូវ។

គួរបញ្ជាក់ដែរថា វគ្គបណ្តុះបណ្តាលស្តីពី «ភាពជាអ្នកដឹកនាំ និងនវានុវត្តន៍ ជំនាន់ទី៦» ត្រូវ​បា​ន​រៀប​ចំ​ឡើងក្រោមកិច្ចសហប្រតិបត្តិការរវាងក្រសួងមុខងារសាធារណៈ និងធនាគារពិភពលោក ដោយ​មាន​សាលាភូមិន្ទរដ្ឋបាលជាសេនាធិការ។ វគ្គនេះ មានគោល​បំណង​គាំទ្រ​ការ​អភិវឌ្ឍ​ចំណេះ​ដឹង ជំនាញ និងផ្ដល់នូវឱកាសបណ្ដុះបណ្ដាល ដែលឆ្លើយតប​នឹង​តម្រូវ​ការ​អភិវឌ្ឍ​សមត្ថភាព​ពិតប្រាកដរបស់មន្ត្រីជាន់ខ្ពស់កម្ពុជា៕ អត្ថបទ៖ ទូច សោភ័ណ