ភ្នំពេញ៖ ឯកឧត្តម ឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ នៅថ្ងៃម្សិលមិញ បាន​អនុញ្ញាតអង្គការអភិរក្សអន្តរជាតិ (CI) ដឹកនាំដោយលោកនាយក អ៊ុំ សូនី ជួបសម្តែង​ការ​គួរសម និងពិភាក្សាការងារមួយចំនួនដែលពាក់ព័ន្ធការធ្វើបច្ចុប្បន្នភាព នៃ​ការ​អនុវត្តកម្ម​វិធី​បឹង​ទន្លេសាប។

យោងតាមក្រសួងកសិកម្ម រុក្ខាប្រមាញ់ និងនេសាទ នៅរសៀលថ្ងៃទី២០ ខែមីនា ឆ្នាំ២០២៤នេះ បាន​ឲ្យដឹងថា នៅក្នុងជំនួបនេះ ឯកឧត្តមរដ្ឋមន្ត្រី បានសម្តែង​នូវ​ការ​ស្វាគមន៍​ចំពោះ​អង្គការ​អភិរក្ស​អន្តរជាតិ ដែលស្វែងរកកិច្ចសហប្រតិបត្តិការ និងការគាំទ្រពីក្រសួងកសិកម្ម។ ជា​មួយ​គ្នានេះ​ដែរ ឯកឧត្តម បានគូសបញ្ជាក់អំពីគោលនយោបាយវិស័យកសិកម្ម ក្នុងការ​ធានា​សន្តិសុខ​ស្បៀង ធ្វើឱ្យមានប្រសិទ្ធភាព និងនិរន្តរភាពសេដ្ឋកិច្ចនិងបរិស្ថាន តាមរយៈ​ការ​ជំរុញ​សហគមន៍​កសិកម្ម​ទំនើប និងការដាក់ពង្រាយមន្ត្រីកសិកម្មនៅតាមមូលដ្ឋាន ដើម្បីដោះ​ស្រាយ​បញ្ហា​ជូន​ប្រជា​កសិករ​ទាំងបច្ចេកទេស ទីផ្សារ និងបញ្ហាប្រឈមផ្សេងៗទៀត រួមទាំងការគ្រប់​គ្រង​ធន​ធាន​ធម្មជាតិ​ផង​ដែរ។

បើតាម ឯកឧត្តមរដ្ឋមន្ត្រី អង្គការអភិរក្សអន្តរជាតិ ត្រូវយល់ឱ្យ​បាន​ច្បាស់​លាស់​ពី​គោល​នយោបាយ​ជាតិ​ដែលបានដាក់ចេញនៅអាណត្តិទី៧នេះ និងត្រូវយល់ពីគ្នា សហការជិតស្និទ្ធ​ជា​មួយ​គ្នា ដើម្បីសម្រេចគោលដៅរួម។ លើសពីនេះទៀត ឯកឧត្តម បានបញ្ជាក់បន្ថែមថា អង្គការ ត្រូវ​សិក្សាឱ្យបានគ្រប់ជ្រុងជ្រោយ និងយល់ឱ្យបានច្បាស់ រវាងការអភិរក្ស និងការអភិវឌ្ឍ ដោយ​ត្រូវ​ជំរុញ​ឱ្យមានតុល្យភាពសេដ្ឋកិច្ចដល់កសិករ លើកកម្ពស់ជីវភាពសហគមន៍ និងការចូល​រួម​របស់​សហគមន៍ក្នុងការអភិរក្ស និងការអភិវឌ្ឍធនធានធម្មជាតិ និងកសិកម្ម។

សូមជម្រាបជូនថា អង្គការអភិរក្សអន្តរជាតិ ទទួលបានមូលនិធិពីប្រទេសបារាំង និងបាន​បំពេញ​បេសក​កម្ម​របស់ខ្លួននៅប្រទេសកម្ពុជាប្រមាណជាង ២ទសវត្សន៍មកហើយ ក្នុងកិច្ចការការពារ និង​គ្រប់​គ្រង​ធនធានធម្មជាតិ ព្រមទាំងចូល​រួម​គាំទ្រ​ដល់​ជីវភាព​សហគមន៍​ដោយ​ផ្អែក​លើ​ប្រព័ន្ធ​អេកូ​ឡូស៊ី​៕