ភ្នំពេញ៖ អាជ្ញាធរខណ្ឌឫស្សីកែវបានចុះត្រួតពិនិត្យ និងអប់រំណែនាំ ដល់ទីតាំងយានដ្ឋានប្រកបអាជីវកម្មនូវឧបករណ៍ស៊ីផ្លេ និងបំពង់ស៊ីម៉ាំងកែច្នៃខុស លក្ខណៈបច្ចេកទេស ត្រូវធ្វើការបញ្ឈប់សកម្មភាពលក់ជាបន្ទាន់ បើពុំដូចនេះទេអាជ្ញាធរនិងចាត់វិធានការផ្លូវច្បាប់។

ជាក់ស្ដែង នៅព្រឹកថ្ងៃពុធទី ២០ ខែមីនា ឆ្នាំ២០២៤ លោក​ ជិន​ ប៊ុន​ធឿន​ អភិបាល នៃគណៈអភិបាលខណ្ឌឫស្សីកែវបានចាត់ឲ្យ លោក​ ផល្លា​ ផល​សម្បត្តិ​ នាយក​រង​រដ្ឋបាល​ខណ្ឌ​ បាន​ដឹកនាំ​ការិយាល័យ​សាធារណការ​ អនាម័យ​ បរិស្ថាន​និង​សណ្តាប់​ធ្នាប់​សាធារណៈ​ សហការជាមួយរដ្ឋបាលសង្កាត់​​គីឡូម៉ែត្រ​លេខ​៦​ ចុះ​ស្រង់​ស្ថិតិ​ ទីតាំង​យានដ្ឋាន​ជួសជុល​រថយន្ត។ ​ ​ក្នុងនោះផងដែរក៏បានណែនាំ​ដល់​យានដ្ឋាន​ជួសជុល​រថយន្ត​ មិន​អមិនអោយមានការកែឆ្នៃបំពង់ស៊ីម៉ាំងខុសលក្ខណៈបច្ចេកទេស សុីផ្លេ​ រថយន្ត​ផ្សេងៗ​ និង​បាន​ជំរុញ​អោយ​ម្ចាស់​យានដ្ឋាន​ដែរ​ពុំមាន​ច្បាប់​ ត្រូវ​ធ្វើការ​សុំ​ច្បាប់​អនុញ្ញាតិអោយ​បាន​ត្រឹម​ត្រូវ​។

គួរបញ្ជាក់ផងដែរ កាលពីព្រឹកថ្ងៃទី១៩ ខែមិនា ឆ្នាំ២០២៤ ឯកឧត្តម ឃួង ស្រេង អភិបាលរាជធានីភ្នំពេញបានចេញសេចក្ដីជូនដំណឹង មួយ ស្ដីពីការ ហាមឃាត់ការប្រើប្រាស់ ការតាំងលក់ និងការកែច្នៃ ស៊ីផ្លេ និងបំពង់ស៊ីម៉ាំងខុសលក្ខណៈបច្ចេកទេស នៅរាជធានីភ្នំពេញ ដោយទុកឪសានវាទ ១សប្ដាហ៍ ត្រូវធ្វើការបញ្ឈប់សកម្មភាពលក់ជាបន្ទាន់ ក្នុងករណីនៅតែបន្តលក់ឧបករណ៍ ទាំងនោះ អាជ្ញាធរមានសមត្ថកិច្ចនឹងធ្វើការដកហូត ព្រមទាំងបិទទីតាំងអាជីវកម្មតែម្តង៕

អត្ថបទ៖ កុម្ភៈ