ភ្នំពេញ៖ ក្រសួងបរិស្ថាន អង្គការសំអាតទន្លេសមុទ្រ (ROC) និងក្រុមហ៊ុន Leader Energy បានចាប់សម្ពោធបេសកកម្មសំអាតទន្លេនៅកម្ពុជារយៈពេល ៥ឆ្នាំ ជាផ្លូវការនៅរាជធានីភ្នំពេញ ក្នុងគោលបំណងដោះស្រាយបញ្ហាប្រឈមបរិស្ថាន ពិសេសសំរាមក្នុងទឹកកំពុងបំពុលទឹកទន្លេ ។

ក្នុងពិធីសម្ពោធបេសកកម្មសំអាតទន្លេ នៅថ្ងៃទី២០ ខែមីនា ឆ្នាំ២០២៤ ឯកឧត្តម អ៊ាង សុផល្លែត រដ្ឋមន្ត្រីក្រសួងបរិស្ថាន មានប្រសាសន៍ថា បេសកកម្មនេះ ស្របតាមយុទ្ធសាស្ត្របញ្ចកោណ ដំណាក់កាលទី១ របស់រាជរដ្ឋាភិបាលអាណត្តិទី៧ ក្នុងការកសាង និងពង្រឹងនូវមូលដ្ឋានគ្រឹះ ដើម្បីពន្លឿនការអភិវឌ្ឍន៍ជាតិ និងគាំទ្រដល់យុទ្ធសាស្ត្រចក្រា របស់ក្រសួងបរិស្ថាន ស្អាត បៃតង និងចីរភាព និងរួមចំណែកដល់ យុទ្ធនាការទឹកស្អាត ការកាត់បន្ថយប្លាស្ទិក និងគោលដៅអភិវឌ្ឍន៍ប្រកបដោយចីរភាព ។

លោក Dato Sean H'ng Chun Hsiang អនុប្រធានក្រុមហ៊ុន Leader Energy បានឲ្យដឹងថា ភាពជាដៃគូជាមួយ ROC ឆ្លុះបញ្ចាំងពីការប្តេជ្ញាចិត្តដ៏មុតមាំក្នុងការលើកកម្ពស់សេដ្ឋកិច្ចចក្រា ឲ្យមានភាពល្អប្រសើរ និងការថែទាំសហគមន៍ តាមរយៈបេសកកម្មនេះ មានបំណងមិនត្រឹមតែកាត់បន្ថយផលប៉ះពាល់ដ៏អាក្រក់ នៃការបំពុលនៅក្នុងទឹក នៃទន្លេរបស់កម្ពុជាប៉ុណ្ណោះទេ ថែមទាំងផ្តល់សិទ្ធិអំណាច ដល់សហគមន៍មូលដ្ឋាន ឱ្យក្លាយជាអ្នកថែរក្សាបរិស្ថានធម្មជាតិរបស់ពួកគេផងដែរ ។

លោក នូ សុវណ្ណ នាយកប្រតិបត្តិអង្គការសំអាតទន្លេសមុទ្រ លើកឡើងថា យើងអាចសំអាតកាកសំណល់ចាស់ឱ្យអស់ពីទន្លេ និងច្រាំងទន្លេក្នុងរយៈពេលតែពី៥ ទៅ៦ឆ្នាំបាន ប៉ុន្តែដើម្បីរក្សានូវទន្លេឲ្យមានអនាម័យជារៀងរហូត ហេដ្ឋារចនាសម្ព័ន្ធគ្រប់គ្រងកាកសំណល់ ការអប់រំ និងការពង្រឹងច្បាប់គឺជាគន្លឹះដ៏សំខាន់ ដែលត្រូវអនុវត្តន៍ ដោយទន្លេគឺជាសសៃឈាម នៃជីវិតរបស់ប្រព័ន្ធអេកូឡូស៊ី និងជាប្រភពផ្គត់ផ្គង់ចំណីអាហារដល់មនុស្សសត្វ ខណៈស្ថានភាពទន្លេកំពុងប្រឈមមុខនឹងការគំរាមកំហែង នៃការបំពុលដោយកាកសំណល់ប្លាសិ្ទក សំណល់ផ្សេងៗទៀត ដែលមិនត្រឹមតែបង្កគ្រោះថ្នាក់ដល់តុល្យភាព នៃធម្មជាតិប៉ុណ្ណោះទេ ថែមទាំង ប៉ះពាល់ដល់ប្រជាពលរដ្ឋ ដែលរស់នៅពឹងផ្អែកលើប្រភពទឹកទាំងនេះទៀតផង ។

យុវជនជាបុគ្គល ROC និងយុវជនស្ម័គ្រចិត្ត បានបង្ហាញនូវការគាំទ្រចំពោះបេសកកម្មនេះ ហើយពួកគេប្ដេជ្ញាចូលរួមឲ្យទទួលបានជោគជ័យ ខណៈពួកគេក៏បានមើលឃើញពីការកែប្រែ នៃការចោលសំរាមរបស់ប្រជាពលរដ្ឋ កំពុងប្រកបដោយភាពវិជ្ជមាន ជាពិសេសអ្នករស់នៅតាមមាត់ទន្លេ ។

គួរបញ្ជាក់ថា គំនិតផ្តួចផ្តើមរួមគ្នានេះ គ្រោងនឹងដំណើរការរហូតដល់ ឆ្នាំ២០២៨ ហើយរួមបញ្ចូលផែនការទូលំទូលាយមួយ រួមមានប្រតិបត្តិការសំអាតតាមដងទន្លេមេគង្គ ទន្លេសាប និងទន្លេបាសាក់ ព្រមទាំងកម្មវិធីអប់រំ ដែលផ្តោតលើការអប់រំការយល់ដឹង អំពីការទុកដាក់សំរាមរបស់ពលរដ្ឋនៅក្នុងមូលដ្ឋាន ជាមួយនឹងការគាំទ្រថវិការដែលមានទឹកប្រាក់សរុបចំនួន ជាង៤៦ម៉ឺនដុល្លារ ។ ចាប់ពីខែតុលា ឆ្នាំ២០២៣ ដល់ខែមីនា ឆ្នាំ២០២៤ កាកសំណល់ប្រមាណជាង៨០តោនត្រូ វបានប្រមូលចេញពីទន្លេក្នុងរាជធានីភ្នំពេញ ទូកកំចាត់សំរាម ដោយមានការចូលរួមពីប្រជាពលរដ្ឋនៅក្នុងសហគមន៍មូលដ្ឋានតាមដងទន្លេ ជាភ្នាក់ងារប្រមូលសំរាមរបស់អង្គការ ។

អត្ថបទ បាន សុខរិទ្ធិ