លោក ដូណាល់ ត្រាំ (Donald Trump) ដែលនឹងក្លាយជាបេក្ខជនប្រធានាធិបតីសហរដ្ឋអាមេរិក មកពីគណបក្សសាធារណរដ្ឋ បានរងការខឹងសម្បារយ៉ាងខ្លាំងពីសេតវិមាន គណបក្សប្រជាធិបតេយ្យ និងមេដឹកនាំក្រុមជ្វីហ្វ ចំពោះការនិយាយថា ជនជាតិជ្វីហ្វអាមេរិក ដែលបោះឆ្នោតឱ្យគណបក្សប្រជាធិបតេយ្យ ស្អប់សាសនារបស់ពួកគេ និងស្អប់អ៊ីស្រាអែល។

លោក ត្រាំ ដែលសង្ឃឹមថានឹងដកតំណែងប្រធានាធិបតីពីលោក ចូ បៃដិន (Joe Biden) មកពីគណបក្សប្រជាធិបតេយ្យ នៅក្នុងការបោះឆ្នោតសហរដ្ឋអាមេរិកនៅថ្ងៃទី០៥ ខែវិច្ឆិកា បាននិយាយថា «ជនជ្វីហ្វរូបណាដែលបោះឆ្នោតឱ្យអ្នកប្រជាធិបតេយ្យ អ្នកនោះកំពុងស្អប់សាសនារបស់ពួកគេ ពួកគេស្អប់អ្វីគ្រប់យ៉ាងអំពីអ៊ីស្រាអែល ហើយពួកគេគួរតែខ្មាសខ្លួនឯងចំពោះការធ្វើបែបនោះ»។

ក្រុមជាច្រើន រួមទាំងសម្ព័ន្ធប្រឆាំងការបរិហារកេរ្តិ៍ គណៈកម្មាធិការជ្វីហ្វអាមេរិក និងក្រុមប្រឹក្សាប្រជាធិបតេយ្យជ្វីហ្វអាមេរិក បានថ្កោលទោសការលើកឡើងរបស់លោក ត្រាំ ចំពោះការចងភ្ជាប់សាសនាទៅនឹងការបោះឆ្នោត។

ដោយត្រូវសាកសួរយោបល់លើការលើកឡើងរបស់លោក ត្រាំ អ្នកនាំពាក្យសេតវិមានលោក អាន់ឌ្រូ បេតស៍ (Andrew Bates) បាននិយាយនៅក្នុងសេចក្តីថ្លែងការណ៍មួយកាលពីថ្ងៃអង្គារថា «មិនមានហេតុផលសមស្របណាមួយក្នុងការផ្សព្វផ្សាយអំពីការបំពុលសង្គម និងលក្ខណៈមិនពិត ដែលគំរាមកំហែងដល់ប្រជាពលរដ្ឋរួមនោះទេ»៕