ប្រព័ន្ធផ្សព្វផ្សាយរដ្ឋចិន បានរាយការណ៍នៅថ្ងៃពុធ (២០ មីនា) នេះថា រថយន្តក្រុងដឹកអ្នកដំណើរមួយគ្រឿង បានបើកបុកជញ្ជាំងផ្លូវរូងក្រោមដីក្នុងខេត្ត សានស៊ី (Shanxi) ភាគខាងជើងប្រទេសចិន កាលពីថ្ងៃអង្គារ ដោយបានសម្លាប់មនុស្ស ១៤ នាក់ និងមនុស្ស ៣៧ នាក់ផ្សេងទៀតរងរបួស។

ប្រព័ន្ធផ្សព្វផ្សាយរដ្ឋ CCTV បាននិយាយថា យោងតាមសមត្ថកិច្ចមូលដ្ឋានបានឱ្យដឹងថា គ្រោះថ្នាក់ចរាចរណ៍នេះ បានកើតឡើងនៅវេលាម៉ោង ២ និង៣៧ នាទីរសៀល (ម៉ោងក្នុងស្រុក) នៅលើផ្លូវល្បឿនលឿន ហ៊ូប៉ី (Hubei) ខណៈរថយន្តក្រុងនោះកំពុងដឹកមនុស្ស ៥១ នាក់ ហើយមនុស្សជាច្រើនត្រូវបានបញ្ជូនទៅមន្ទីរពេទ្យដើម្បីព្យាបាល។

ក្រោយពេលកើតហេតុ កម្លាំងសង្គ្រោះបានចុះទៅដល់កន្លែងកើតហេតុ ហើយការស្រាវជ្រាវរកមូលហេតុកំពុងដំណើរការ។

ការិយាល័យសន្តិសុខសាធារណៈក្នុងតំបន់ បានប្រកាសថា ដោយឡែកមនុស្ស ៣ នាក់បានស្លាប់ និង ១៦ នាក់ផ្សេងទៀតរងរបួសក្នុងគ្រោះថ្នាក់មួយផ្សេងទៀត បន្ទាប់ពីរថយន្តមួយគ្រឿងបានបើកបុកហ្វូងមនុស្សនៅឯសាលាវិជ្ជាជីវៈមួយក្នុងទីក្រុង ថៃចូវ (Taizhou) ដែលមានទីតាំងនៅខេត្ត ជឺជាំង (Zhejiang) ភាគខាងកើតប្រទេសចិន កាលពីថ្ងៃអង្គារដូចគ្នានោះ៕